Read bassa IZIKƐL 29 Bible Online

IZIKƐL 29 - bassa bible

IZIKƐL 29

¹Ta atu ulwa shiywa umpwa ni ipiɛnɛ umpwa, ni ijitɛ umpwa-ni-bɛ-yebi na ti'ima, nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, pana eshe bu geri Faro agwuma Ijipti maa dumanganɛ bụ tigesere tu na ti zhɛ ta wumana bụ. Mbiso bu gana na ɛɛ zhɛ a pana bụ ulwapɛ, ta cɛnjɛ ti Ijipti hwɛɛ.

³Hiɛŋ bụ, Iyi nɛ AGWANGWAMA Mokondo o mbiso Faro agwuma Ijipti na, bi hiɛŋ, Mo bu imo, gabụ buduwo ata bụ 'wụtụ na shiyeji na ashashɛ ohwulwo. Ɛbi hiɛŋ Gamba n 'yajɛ Urefu Nayɛl, ɛbi hiɛŋ maa gabụ bɛ njɛ uŋ iwɛ ikɛnyi bụ.[84]

⁴N zhɛ ma bụ sapa shɛkama maa shɛ 'imɛ shɛpa shɛ bụ, N zhɛ ma nda maa ijɛnɛ nɛ namɛ no ohwulwo bu zhajɛ maa ibu ndapangana na ashasha tu'waba tụ bụ. Nazhɛ mɛ bu bwɛ no ohwulwo ata bụ, maa mo bu shilo no tupohondo, ti ijɛnɛ ɛtɛ ibu ndapanganɛ na ashasha tu'waba tụ bụ hwɛɛ.[85]

⁵N zhɛ ma bu kala nụ ụshɛka, ti ijɛnɛ ɛtɛ hwɛɛ. Tu'waba tụ bụ ti zhɛ to shilo na cɛnjɛ; i zasa kaa bụtụ zhɛ mo bu no. N zhɛ ma shapa tụ ma pana shanụnụ keeni isundɛ ehilo maa a yɛ.

⁶Nazhɛ atwa Ijipti kpaaŋ zhɛ a mapa maa Gamba n shɛ AGWANGWAMA. AGWANGWAMA hiɛŋ, Atwa Isrɛl datanɛ atwa Ijipti iwɛ maa o no mbiyono aŋ, ama e hwuri shi kaa bukwuto be bininjidegbe o.

⁷Aka na aa bu 'imɛ la ni i'ɛlɛ, abu bwadụ, abɛ shɛlanjɛ aŋ no shitutu, aka na ee bi leyiteni, abu hinyanjɛ aŋ shimbi.[86]

⁸Iwɛbɛ po Ngaa jɛmɛ Gamba AGWANGWAMA Mokondo, Ngɛɛ hiɛŋ, N zhɛ ma jarɛ atwa na zhɛ ma bu sukakana no otokwobi, maa a kwụnɛ atwa bụ ti iyimabiga bu hwɛɛ.

⁹Cɛnjɛ ti Ijipti ti zhɛ ta sha osombo gana ụshɛka. Nazhɛ ɛɛ zhɛ a mapa maa Gamba n shɛ AGWANGWAMA. Iwɛnɛ ɛbi hiɛŋ,[87] Urefu Nayɛl ụ shɛ unaa bụ, ɛbi hiɛŋ maa gabụ bɛ njɛ ụŋ,

¹⁰iwɛbɛ po Ngaa shɛ bụtụ bu bi i'ime, to ohwulwo ata bụ. N zhɛ ma nda Ijipti hwɛ hwɛɛ osombo maa u nama bohondo, te kwune nụ ụshɛpwụ ata ɛɛ hiɛŋ Migdol ata namɛ tuzuba tutu i ci ụshɛpwụ ata ɛɛ hiɛŋ, Aswan ata namɛ tuta, uuwa i ci tugwungwu ta atwa Itiopia.

¹¹I zasa bụtụ be elele okwo usunda ehilo we elele na uvwuna ubwa zhɛ wa fwunda uŋ o. I zasa iyi elele zhɛ ya nama apata kwukwuŋ uuwa i ci shiywa buhanda o.

¹²N zhɛ ma nda cɛnjɛ ti Ijipti osombo na wụmangwụ uhwuri shisombo shɛ vwɛ hwɛ hwɛɛ nu unyizo. Ashɛpwụ Ijipti zhɛ a sha shisombo shiywa buhanda, osombo na gbazhɛgwa uhwuri shisombo sha ashɛpwụ elele. N zhɛ ma 'waŋtatanga atwa Ijipti na ashashɛ edenji, N zhɛ ma garataga aŋ maa o zwogono na a'una anya.

¹³AGWANGWAMA Mokondo hiɛŋ, Na aba na ta shiywa buhanda shɛ ulwa, N zhɛ ma bacanjɛ atwa Ijipti no olugwo elele na Ngee gereteji aŋ la me gwuricinje aŋ.

¹⁴N zhɛ mo lono maa a nama tuzuba ti Ijipti, na shɛ ihwɛ ya aba i tugom.[88] Ɛ zhɛ a sha cɛnjɛ-ta-tugwama tu na tu lweji apata.

¹⁵Ti zhɛ ta sha cɛnjɛ tu na tu lweji tu hwuri cɛnjɛ te elele hwɛɛ, a zha shɛ momo mungicingo ya kwukwuŋ maa a untangana edenji elele o, N zhɛ ma nda aŋ te lweji duwa maa kede e eri ya udenji we elele tu'untangana gana na kwụlanɛ aŋ o.

¹⁶Atwa Isrɛl zha shɛ a datana ya atwa Ijipti iwɛ timbiyono te elele kwukwuŋ. Iyi nɛ jiteni atwa Ijipti zhɛ ne teyingeni atwa Isrɛl gana na yaa zhɛshɛ maa a na datana aŋ. Nazhɛ atwa Isrɛl zhɛ a mapa maa Gamba n shɛ AGWANGWAMA Mokondo.

¹⁷Tu upiana Bihiiŋ namɛ ụjita uko, aka na atu ulwa shiywa woshi-na-shɛba-shi-cenje, nu upiana uko nụ ujita uko na ti'ima, nazhɛ AGWANGWAMA jɛmɛ n-ndumwa ne mi, bɛɛ hiɛŋ,

¹⁸Ɛ-yɛu bụtụ, gɛ Nɛbukadnɛza agwuma Babulon sukakanɛ ba Taya ne ejeshi ubwa ta 'yajɛ ikɛnyi. Ohiuhiu atwa hwagatagwụ hwɛɛ, otutu aba bwurangwụ hwɛɛ. Taa hwayɛ kaa, tu bwa te ejeshi ubwa a zasa iyi elele nɛ ee gwushiji maa e leshiji, nɛ zhɛ ya sha utashɛ wa aba na ɛɛ zhɛ a lashɛga iwɛ ugondu wa aba na aa njɛ nu Taya o.

¹⁹Iwɛbɛ po Ngaa jɛmɛ Gamba AGWANGWAMA Mokondo, Ngɛɛ hiɛŋ, N zhɛ ma shapa cɛnjɛ ti Ijipti ma pana agwuma Nɛbukadnɛza. Bi zhɛ ba lashɛga tụ, bo sugo uduciya[89] Ijipti maa ụ shɛ iyi nɛ bɛɛ zhɛ ba tụpa ejeshi ubwa utashɛ.

²⁰Ijipti ubwa Ngɛɛ zhɛ ma tụpa bu utashɛ ugondu na baa njɛ, iwɛnɛ ti yaa shɛ Gamba ejeshi ubwa a ndana ugondu. Gamba AGWANGWAMA Mokondo N dumwa.

²¹Aka na ti inɛ ɛtɛ njɛ hwuŋ, N zhɛ ma nda maa mahiuaŋ mu unshɛ ni Isrɛl,[90] nazhɛ Ngɛɛ zhɛ ma bu nda gabụ ge Izikɛl, maa jɛmɛ n-ndumwa no ofwo na bụtụ be elele zhɛ ma bu hwulagana, iwɛ maa e mepi maa Gamba n shɛ AGWANGWAMA.