Read bassa IZIKƐL 3 Bible Online

IZIKƐL 3 - bassa bible

IZIKƐL 3

¹Nazhɛ Agwatana n hiɛŋ, Ɛ-yɛu bụtụ, ya utakada ga u tukwungwulo, Ngee bi peni, nazhɛ hwuri maa jɛmɛ n-ndumwa na atwa Isrɛl.

²Ngee kepishinji ga unu mu, bee m peni utakada ata u tukwungwulo maa ma ya.

³Bɛɛ hiɛŋ, Ɛ-yɛu bụtụ, ga amɛ bu shiji nu utakada ga tukwungwulo Ngee bi peni. Ngaa yɛ uŋ ga, ụlatụ ubwa ụ shɛ gana meni mi iswɛ.

⁴Nazhɛ Agwatana n hiɛŋ, Ɛ-yɛu bụtụ, zhaga no ofwo atwa Isrɛl maa mbishi aŋ n-ndumwa me elele na Ngee bi mbishi.

⁵Shɛ no ofwo udenji na wa duma rɛjɛmɛ ru na rụ gwụmɛ, ru na abu hwụjɛ shɛ, Ngaa bu tumwanɛ o, ama no ofwo atwa Isrɛl.

⁶Yaa ga shɛ no ofwo edenji ofwugwo a na a duma rɛjɛmɛ ru na rụ gwụmɛ, ru na abu hwụjɛ shɛ, Ngaa bu tumwanɛ, ɛ gɛ zhɛ ma bu shɛlagana.

⁷I zasa bụtụ bi Isrɛl be elele yɛɛ zhɛ ya kwulana maa ma bu shɛlagana o, okwo yaa shɛ Gamba, i kwụlanɛ shɛ aŋ maa a shɛlaga iwɛ mi o. A shɛshɛpanɛ hwɛɛ aba, aa shɛ atwa na hweteni.

⁸Hioko, N zhɛ ma bu nda maa shɛshɛpanɛ maa hweteni du gana aba.

⁹N zhɛ ma bu nda maa shikono dimi gana uparatayɛ maa hweteni gana ụshɛmbɛrɛ maa kede njɛ inyɛsɛ ya aba o, maa kede o no bu holono, okwo ta a shɛ atwa na hweteni o.

¹⁰Nazhɛ Agwatana to tuhwulo, bɛɛ hiɛŋ, Ɛ-yɛu bụtụ, pana abashɛ, maa ne teyinje iyi elele nɛ Ngee bi mbishi.

¹¹Zhagana atwa cɛnjɛ tụ bụ a na namɛ na ti'ima maa mbishi aŋ maa, iyi nɛ AGWANGWAMA Mokondo jɛmɛ na. Okwo ee peni abashɛ iyi nɛ aba njɛ, okwo ee peni shi.

¹²Nazhɛ Mpiala ma Agwatana mi n shepi na azuba, Ngaa hwụjɛ iyi nɛ rụhwụŋ ru ko rụ 'wụtụ ra njɛ na aba mi, gana rundu ra cɛnjɛ-tuhwuŋzwo, rɛɛ hiɛŋ, Shɛtana ma AGWANGWAMA na namɛ na azuba iwɛ ụjɛrụma ubwa![13]

¹³Ngaa hwụjɛ ta apiambɛ iyi-uumwa ɛtɛ a pagana ni inyɛ na azuba, to rundu ri ikɛgbɛ ɛtɛ. Rundu ra ata ra nda duwa duwa gana maa cɛnjɛ ti zhɛ to hwuŋzwo.

¹⁴Nazhɛ Mpiala ma Agwatana mi n zhaganɛ nu ukpahiŋ ụ'wụtụ, gana na tu mpiala ma ata mu bwa mi n shepi, yaa n gwumanɛ tebiye, Ngaa njɛ isɛbwɛ.

¹⁵Iwɛbɛ po Ngaa zhajɛ no ofwo Tel-abib na namɛ nụ ụpalanụ Urefu Kiba, no ofwo na atwa ata ti'ima namɛ. Ngaa namɛ apata ijitɛ cenje, iyi nɛ Ngaa kwụbajɛ ni iyi nɛ Ngaa hwụgajɛ hwɛɛ ikɛnyi mi ci shi iŋ o.

¹⁶Ti ijitɛ gɛ icenje keshici, nazhɛ AGWANGWAMA jɛmɛ n-ndumwa ne mi, bɛɛ hiɛŋ.

¹⁷Ɛ-yɛu bụtụ, M bɛ njɛ bi'yacɛ ba atwa Isrɛl. Bɛ shɛ bu no mbiso aŋ unu-tɛtɛtagana we elele na Ngee bi peni maa tɛtaganɛ aŋ unu.

¹⁸Yaa shɛ Ngee mbishi ugworozwo maa, Bi zhɛ bo 'wo tilɛɛ, yaa shɛ abu tɛtaganɛ shɛ bụ unu, maa mbishi bu maa jɛshɛrɛga iwɛ maa uraiŋ ubwa bini, ugworozwo ata zhɛ wo 'wo ni iwɛwɛ ibwɛ, asha gabụ Ngɛɛ zhɛ ma untangana iwɛ tu'wo tu bwa.

¹⁹Ama yaa shɛ abu tɛtaganɛ ugworozwo ata unu, baa lacɛ maa jɛshɛrɛga maa ganga tugworozwo tu bwa keeni iwɛwɛ ibwɛ, bi zhɛ bo 'wo ni iwɛwɛ ibwɛ, ama tuba asha bi bicinji uraiŋ bụ.

²⁰Yaa shɛ bụtụ bi tiririri genji sasana tiririri tu bwa, bee kwuni iyi iwɛ tɛnda, nazhɛ Ngee shileni bu utayɛ udukwutwa, bi zhɛ bo 'wo ti yaa shɛ abu tɛtaganɛ shɛ bụ unu maa jɛshɛrɛga. Bi zhɛ bo 'wo iwɛnɛ baa njɛ iwɛwɛ, a zha shɛ e teyinje ya kaa iyi tiririri nɛ baa nduwa la o. N zhɛ tuba ma bu untangana iwɛ tu'wo tu bwa.

²¹Yaa shɛ kaa abu tɛtaganɛ bụtụ ata bi tiririri unu maa ganga iwɛwɛ tɛnda, bee genji ga iwɛwɛ tɛnda, bụtụ ata zhɛ ba ya uraiŋ, asha unaa bụ uraiŋ du benengeni.

²²Tu Ngaa hwụjɛ maa u'ala wa AGWANGWAMA namba ne mi, Ngaa hwụjɛ ti bɛɛ n hiɛŋ, Ishijɛ beni maa zhe nu ulomu.[14] N zhɛ ma dumanga n-ndumwa na bụ apata.

²³Ngee beni ga Ngee zhe nu ulomu ata, Ngaa kwụbɛ ụjɛrụma wa AGWANGWAMA apata, gana na tu Ngaa kwụbɛ la nu ụpalanụ Urefu Kiba. Ngee leyi Ngee ubi eshe na cɛnjɛ.

²⁴Nazhɛ Mpiala ma Agwatana mi teni na amɛ mi, mɛɛ n ishicinjɛ mee n shikicinji, nazhɛ AGWANGWAMA n hiɛŋ, Zhaga jiyo maa mama kapɛ odubo nu umwono bu.

²⁵Ɛ-yɛu bụtụ, ɛ zhɛ mo bu umpo ni ihwehwe, bi zha shɛ ba ala ya maa beni maa no rungo no ofwo atwa ofwugwo.

²⁶N zhɛ ma kwusa bụratụ bụ maa kede eri ya atwa ga tigezhe tuvwulo.

²⁷Nazhɛ aka na Ngɛɛ zhɛ ma dumanana iwɛ na bụ, Ngɛɛ zhɛ ma bu pana ukpahiŋ n-ndumwa tụdụmanga sasana, bi zhɛ bo mbiso aŋ, bɛ hiɛŋ, Iyi nɛ AGWANGWAMA Mokondo a njɛ na, bi hiɛŋ. Atwa na zhɛ a shɛlaga, ga a shɛlaga, ama atwa na zha shɛ a shɛlaga, ga a lacɛ tɛshɛlaga, iwɛnɛ aa shɛ atwa tigezhe.