Read bassa IZIKƐL 32 Bible Online

IZIKƐL 32 - bassa bible

IZIKƐL 32

¹Aka na atu ulwa shiywa umpwa-na-shɛba-shi-yebi ni ipiɛnɛ umpwa-ni-bɛyebi nụ ụjita uko na ti'ima, nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, twana Faro u'wo ga ụzhɛla maa, Gabụ bɛ shɛ gana bizeci na ashashɛ edenji, abɛ shɛ gana buduwo ata namɛ nu ntokwu. Obo vwundoko meni ni ivwunɛ bu, ibɛ po ohwulwo bu vwundwo.

³AGWANGWAMA Mokondo hiɛŋ: N zhɛ ma bu 'wanga igwune mi, maa ma bu ima, nazhɛ Ngɛɛ zhɛ ma suyanɛ atwa gembi ufwugwo maa o bu gbodongonu maa ɛ bu bwɛ[97] nu uhaŋsa.

⁴N zhɛ ma bu kala na cɛnjɛ, mo bu vwurungono taa ne ehilo, Ma suyanɛ shanụnụ maa shɛ zhajɛ shɛ bɛ yɛ, ti isundɛ ehilo, maa i zhajɛ ibu dwetweji.

⁵Tufwoso tụ bụ ti zhɛ ta bala nu nshama to olomu[98] hwɛɛ.

⁶N zhɛ mɛ bɛcinjɛ mehieŋ mụ bụ maa mu na fwunga nu nshama to ohwulwo hwɛɛ.

⁷Aka na Ngee bi iricinji hwɛɛ, nazhɛ Ngɛɛ zhɛ mo urugono tụla mo 'woricingo mkpasu. Uwaŋna zhɛ wo tono no odomu, upiana zha shɛ wa ta ya o.

⁸N zhɛ mo 'worocongo ohioko-uhwaŋna na namɛ na azuba mo ubo unyizo ne tishi. Gamba AGWANGWAMA Mokondo N dumwa.

⁹N zhɛ mo horukono atwa ofwugwo shihwulu, aka na ti Ngee mbishi edenji unabarɛ ti'ilono[99] tụ bụ na a'una na ebi mepi shi.

¹⁰N zhɛ ma nda maa iwɛ bu dama atwa ni iyi nɛ ibu vwuteni. Aka na Ngee vwurenji utokwobi mu, atwa zhɛ ɛ bwɛ na tɛzhɛgɛda, ɛ zhɛ na zhɛgɛda aka elele, bụtụ bụtụ zhɛ na zhɛgɛda iwɛ uhiuhiu ubwa, nụ ụjita na ebi leyi.

¹¹AGWANGWAMA Mokondo hiɛŋ agwuma Ijipti, Utokwobi wa agwuma Babulon zhɛ ma bu tafwulaga.

¹²N zhɛ ma nda maa atwa na 'yajɛ ukpahiŋ kwụnɛ unyama wa atwa bụ no otokwobi, hwɛ hwɛɛ aba 'yajɛ abwagara ee hwuri edenji elele. Ɛ zhɛ a kwụna atwa Ijipti hwɛɛ, ti iyi elele nɛ aa busa iwɛ ibɛ zhɛ ya nda ufwu hwɛɛ.

¹³N zhɛ ma kwụna iyimabiga bu hwɛɛ nụ ụpalanụ meni me elele; i zasa kaa uvwɛvwɛjɛ ụ bụtụ be elele kwo kaa ugwogwozwo iyimabiga ye elele zhɛ yo vwundo ya meni ma ata o.

¹⁴N zhɛ ma nda maa meni mi hiŋ mu nama rụmbɛɛ, maa erefu hiŋ na fwunga pece gana manɛbɛ. AGWANGWAMA Mokondo ubwa jɛmɛ.

¹⁵Aka na Ngaa njɛ cɛnjɛ ti Ijipti osombo, Ngaa kwụnɛ iyi elele nɛ namɛ na tuba, Ngaa njɛ iyi elele ufwu, nazhɛ ɛɛ zhɛ a mapa maa Gamba n shɛ AGWANGWAMA.

¹⁶U'wo-ụzhɛla na aa shɛ a twa na. Eyikwo edenji zhɛ a twa uŋ ta a ta-ụkwụla iwɛ Ijipti keeni iwɛ atwa ubwa. Gamba AGWANGWAMA Mokondo N dumwa.

¹⁷Aka na atu ulwa shiywa umpwa-na-shɛba-shi-yebi nu upiana uko[100] ni ijitɛ umpwa-ni-bɛ-tɛ na ti'ima, nazhɛ AGWANGWAMA jɛmɛ n-ndumwa ne mi, bɛɛ hiɛŋ,

¹⁸Ɛ-yɛu bụtụ, tana atwa Ijipti ụkwụla, sugo aŋ te edenji ata 'yajɛ ukpahiŋ ne e'uye.

¹⁹Hiɛŋ aŋ: Hi heŋshi ree maa i 'yajɛ bụtụ ehi hwuri na tụpilanụ? Hi zhɛ hio zwo ne e'uye hio wotogo apata na atwa ata mepi shi Agwatana.

²⁰Atwa Ijipti zhɛ a 'waŋ na atwa ata aa kwụnɛ nu ujasa. A imwangwa utokwobi maa a kwụnɛ unyama ubwa hwɛɛ.

²¹Atwa ikɛnyi a na beni urishi a na njɛ la ujasa na atwa Ijipti zhɛ a dumangana aŋ n-ndumwa, ta atwa ata aa 'yajɛ la tutogwu na aba a na banɛ ne e'uye. Ɛ zhɛ ɛ hiɛŋ, E zwe du maa ee ci atwa na mepi shi Agwatana, aba shɛ atwa ata aa kwụnɛ la nu ujasa.

²²Atwa Asiria namba apata, ta atwa na 'wa aŋ la kpaaŋ, e'uye aba rungwutwonu bu, a shɛ atwa na aa kwụnɛ la nu utokwobi hwɛɛ aba.

²³E'uye aba iri ee hwuri a na elele, atwa vwɛ aba rungwutwonu e'uye aba, nu utokwobi kaa aa kwụnɛ aŋ la hwɛɛ aba, aba zweni cɛnjɛ ta atwa na ta hwungwa inyɛsɛ.

²⁴Atwa Ilam du namba apata ne e'uye ejeshi ubwa, nu ujasa du aa kwụnɛ aŋ, aba shɛ atwa na jeji shi teleyi, e zwi du ne e'uye, aba zweni cɛnjɛ ta atwa na ta hwungwa inyɛsɛ, e zwi ne e'uye ne ezuye na atwa vwɛ aba.

²⁵A ndanɛ bu ogodo na ashashɛ unyama wa aba na aa kwụnɛ, e'uye aba rungwutwonu bu, hwɛɛ aba a shɛ atwa na jeji shi teleyi, nu utokwobi aa kwụnɛ aŋ la hwɛɛ. Inyɛsɛ ya aba 'imɛ cɛnjɛ ta atwa na ta hwungwa. E zhe ne e'uye ne ezuye na atwa vwɛ aba; o togwu aŋ na atwa na aa kwụnɛ la.

²⁶Atwa Mɛshɛk na atwa Tubal namba apata, nu unyama wa aba, e'uye aba rungwutwonu aŋ, hwɛɛ aba a shɛ atwa na jeji shi teleyi; nu utokwobi aa kwụnɛ aŋ la; inyɛsɛ ya aba 'imɛ cɛnjɛ ta atwa na ta hwungwa.

²⁷A zasaba na atwa cala[101] a na shɛ atwa ukpahiŋ a na zhɛ ne e'uye ni i'wɛŋnɛ ya aba ujasa o, a na ee petengeni ohiuhiu aba no otokwobi aba, a na shabula sha aba shɛ ujasa shɛ patanganɛ no o'umpwo aba[102] o. Iwɛnɛ po inyɛsɛ ya atwa ata ikɛnyi 'imɛ cɛnjɛ ta atwa na ta hwungwa.

²⁸Gana ata du ɛɛ zhɛ ma hi bwarataga maa hi woto na atwa na jeji shi teleyi, aba shɛ atwa na aa kwụnɛ nu utokwobi.

²⁹Atwa Idụm du namba apata na shɛgwuma sha aba keeni ehiu aba kpaaŋ. A shɛ la ejeshi na 'yajɛ ukpahiŋ, ama hwuwayɛ go, e weteji ya ne e'uye na atwa na jeji shi teleyi, a na aa kwụnɛ la no otokwobi.

³⁰Miaụŋ mu tugwama mu tuzuba, ta atwa Saidụn namba apata, hwɛ hwɛɛ aba zwi ne e'uye ne ezuye na atwa na aa kwụnɛ la no otokwobi. Okwo te e zweni atwa inyɛsɛ nu ukpahiŋ na aa 'yajɛ, e weteji ne teleyi ta ata ta aba ti jeji shi na atwa ata aa kwụnɛ la no otokwobi, aa 'waŋnɛ ezuye aba na atwa ata ee zhe ne e'uye na aba.

³¹Aka na ga Faro kwụbɛ aŋ, bi zhɛ mama ingatanga nu unyama ubwa, ubwa shɛ ga Faro ne ejeshi ubwa a na aa kwụnɛ la no otokwobi, AGWANGWAMA Mokondo ubwa dumwa.

³²Gamba n njɛ[103] maa agwuma Ijipti mburusonu inyɛsɛ na cɛnjɛ ta atwa na ta hwungwa, ama ɛ zhɛ o wocicingo bu na atwa na jeji shi teleyi, na atwa na aa kwụnɛ la no otokwobi, ubwa shɛ ga Faro nu unyama ubwa hwɛɛ. AGWANGWAMA Mokondo ubwa dumwa.