Read bassa IZIKƐL 35 Bible Online

IZIKƐL 35 - bassa bible

IZIKƐL 35

¹Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, ngbaraka geri bi Ishɛmɛ Idụm maa dumanganɛ iŋ tigesere tu tuwumana.

³Mbiso aŋ maa AGWANGWAMA Mokondo hiɛŋ, N shɛ bụtụ bụ bi i'ime, gabụ Ishɛmɛ Idụm! N zhɛ ma bu nda osombo.

⁴N zhɛ mo hwuŋzotongo ashɛpwụ bụ, Ma nda cɛnjɛ tụ bụ osombo; Nazhɛ ɛbi zhɛ ba mapa maa Gamba n shɛ AGWANGWAMA.

⁵Gabụ bu to atwa Isrɛl ni i'ime aka elele, abụ kwụnɛ atwa aba no otokwobi bụ, na aka na ta Abara-ne-ebe jiteni aŋ la, na aka na ta a kwunanjɛ ulwapɛ wa aba.

⁶Iwɛ ecilo ata gana na tu Ngaa shɛ AGWANGWAMA Mokondo na shɛ buumwa. N zhɛ mo bu utogono atwa na o dudwogo mehieŋ, ɛ zhɛ mo bu urugono nu usumwa. Gana na ebi imi shi mehieŋ tududwogo,[107] edudweji mehieŋ zhɛ mo bu urugono du nu usumwa.

⁷N zhɛ mo hwuŋzo Ishɛmɛ Idụm maa ma nda iŋ osombo, bụtụ be elele na duri iŋ okwo tudulo, N zhɛ ma kwụna bụ.

⁸N zhɛ mo tulogono n'wo nu nshama mụ ụshɛka ata, n'wo ma atwa na aa kwụnɛ nu ujasa mi zhɛ ma bala nu nshama ma ata to olomu hwɛɛ.

⁹N zhɛ ma bu nda osombo unyizo-nom, i zasa kaa bụtụ be elele zhɛ ba nama ya na ashɛpwụ bụ o. Nazhɛ ɛbi zhɛ ba mapa maa Gamba n shɛ AGWANGWAMA.

¹⁰Bi hiɛŋ ree edenji ga eyebi keeni cɛnjɛ ta aba tɛ shɛ ma tụ bụ, maa bi zhɛ ba lashɛga aŋ ba 'yaga, okwo tu Gamba na n shɛ AGWANGWAMA Ngaa shɛ Agwatana aba.

¹¹Iwɛ ecilo ata, gana na tu Gamba na n shɛ AGWANGWAMA Mokondo, Ngaa shɛ buumwa, N zhɛ ma bu tụpana te teni cɛŋ gana na ta abɛ njɛ isɛbwɛ keeni gana na abɛ njɛ isɛbwɛngwɛ iwɛnɛ obu to aŋ ni i'ime. Ɛ zhɛ a mapa maa Gamba[108] ma bu pana ulwapɛ iwɛ iyi nɛ abɛ njɛ aŋ.

¹²Nazhɛ ɛbi zhɛ ba mapa maa Gamba na n shɛ AGWANGWAMA, N hwụjɛ la n-ndumwa mụ wɛ mu na aba dumangana nshama mi Isrɛl, ɛbi hiɛŋ, Mɛ shɛ ya osombo, e ti peni mu maa ta 'yaga.

¹³N hwụjɛ tubusa tu na aba busa abu ma n sukakana nu n-ndumwa mụ wɛ mu na abu ma dumangana.

¹⁴Gamba AGWANGWAMA Mokondo, N hiɛŋ, N zhɛ ma bu nda osombo maa cɛnjɛ tu unyizo hwɛ hwɛɛ tu bweji unyasa.

¹⁵Gana na ta aba bwada la unyasa ta cɛnjɛ ta atwa Isrɛl, a na shɛ atwa mi na Ngaa 'yajɛ tɛ shɛ osombo. Ishɛmɛ Idụm, ta cɛnjɛ ti Idụm ti zhɛ ta sha du osombo hwɛɛ. Nazhɛ bụtụ aba be elele zhɛ ba mapa maa Gamba n shɛ AGWANGWAMA.