Read bassa IZIKƐL 37 Bible Online

IZIKƐL 37 - bassa bible

IZIKƐL 37

¹Ti yee ci aka oko, Ngaa hwụjɛ ukpahiŋ u'ala wa AGWANGWAMA nu u'waba mu, nazhɛ mpiala mu bwa mi n shepi mee shiri nu ulomu[110] uko na o'umpwo hwoo barɛ na cɛnjɛ.

²Baa njɛ maa mo rungo ulomu ata, Ngaa kwụbɛ maa o'umpwo ata gembi ufwugwo tebiye, ee hweteni du kaa tebiye.

³Bee n heŋteni, bɛɛ hiɛŋ, Ɛ-yɛu bụtụ, o'umpwo ga te eri a sha buumwa waa hŋ? Ngɛɛ jishijɛ bụ, Ngɛɛ hiɛŋ, AGWANGWAMA Mokondo, gabụ kiri bi mepi.

⁴Bɛɛ n hiɛŋ sasana, Dumangana o'umpwo ga tigesere. Hiɛŋ o'umpwo ga, Ahiɛba o'umpwo ga hweteni, shɛlaga ma n-ndumwa ma AGWANGWAMA.

⁵Mbiso aŋ maa AGWANGWAMA Mokondo hiɛŋ, N zhɛ mo hi zwono ihwungwɛ,[111] nazhɛ ɛhi zhɛ hia sha buumwa.

⁶N zhɛ mo hi zwono tini keeni usunda, nazhɛ mo hi ubo tu'waba. N zhɛ mo hi zwono ihwungwɛ nazhɛ ɛhi zhɛ hia sha buumwa sasana. Nazhɛ ɛhi zhɛ hia mapa maa Gamba n shɛ AGWANGWAMA.

⁷Ngaa jɛmɛ ga tigesere ta ata, Ngaa hwụjɛ rundu zhakwụ zhakwụ, nazhɛ o'umpwo ata kwuni tusotulongonu na anya, una una wo tono wo cimbono nu una ubwa.

⁸Tu Ngaa ngbaracɛ aŋ, Ngaa kwụbɛ te tini ti zweni o'umpwo ata, tu usunda, ta tu'waba hwɛɛ, ama tuba a ta zasa ihwungwɛ o.

⁹Nazhɛ Agwatana n hiɛŋ, Ɛ-yɛu bụtụ, dumangana mpiala tigesere, dumangana mpiala[112] tigesere maa AGWANGWAMA Mokondo hiɛŋ, Banɛ nu mpiala mi neshi, maa zhajɛ maa hwulupeni atwa ga 'wegeni maa a shɛ buumwa sasana.

¹⁰Ngaa jɛmɛ ga tigesere gana na te e m peni-unu. Nazhɛ ihwungwɛ teni na shɛmɛ sha atwa ata, aa shɛ ga buumwa. Ɛɛ ishijɛ ee Shikekeni ni ivwunɛ ya aba, aa shɛ ejeshi a'wụtụ a'wụtụ.

¹¹Nazhɛ bɛɛ n hiɛŋ, Ɛ-yɛu bụtụ, o'umpwo ga shɛ ụsụbwa wa atwa Isrɛl hwɛ hwɛɛ. Ɛ hiɛŋ, O'umpwo tu hweteni, tu zasa ya kaa ashɛlatụ o, inee tu petenji ya.

¹²Iwɛ ecilo ata dumangana atwa Isrɛl tigesere tɛ ga maa, AGWANGWAMA Mokondo hiɛŋ, Oo ahiɛba atwa mi, N zhɛ ma kapashanga e'uye hiŋ. N zhɛ ma hiɛ bacanjɛ me hi gwuricinje na cɛnjɛ ti Isrɛl.

¹³Aka na Ngee kepeshenji e'uye na ee hi ni la ahiɛba atwa mi, Ngaa hiɛ bacanjɛ, nazhɛ ɛhi zhɛ hia mapa maa Gamba n shɛ AGWANGWAMA.

¹⁴N zhɛ mo hi zwono ihwungwɛ mi, N zhɛ ma nda maa hi shaananɛ buumwa, Ngɛɛ zhɛ ma nda maa hi nama na cɛnjɛ ti hiŋ. Nazhɛ ɛhi zhɛ hia mapa maa Gamba n shɛ AGWANGWAMA. N shiri-unu maa N zhɛ ma nda ijɛ, N zhɛ kaa ma nda iŋ ga. Gamba AGWANGWAMA N dumwa.

¹⁵Nazhɛ AGWANGWAMA dumananɛ n-ndumwa ne mi, bɛɛ hiɛŋ,

¹⁶Ɛ-yɛu bụtụ, shapa bukwuto bụ ụ'wụ'wụ uko, 'nyata nu bwa maa, Bu na bu Juda keeni miaụŋ mi Isrɛl a na togotogwu nu bwa na, nazhɛ shapa bukwuto bụ ụ'wụ'wụ bi nya, 'nyata nu bwa maa, Bu na Josɛf (na shɛ bukwuto Ifrem) keeni atwa Isrɛl a na togotogwu nu bwa na.

¹⁷Nazhɛ togwu shu maa shɛ shɛ ya bukwuto bu ko ni i'ɛlɛ bu.

¹⁸Aka na atwa bu ubu hiɛŋ, Iti mbishi de iyi nɛ shɛ ecilo ijɛ abɛ njɛ,

¹⁹mbiso aŋ maa, Gamba AGWANGWAMA Mokondo, N hiɛŋ, N zhɛ ma shapa bukwuto Josɛf (na namɛ nu u'ala Ifrem) keeni edenji Isrɛl mo togwu nu bwa; nazhɛ Ngɛɛ zhɛ mo togwu bu na bu Juda maa shɛ shɛ bukwuto bu ko nu u'ala mu hwɛɛ.

²⁰Untangana shekwute sha ata ebi 'nyeci nu u'ala bụ maa atwa ata kwụbɛ.

²¹Nazhɛ mbiso aŋ maa, Gamba AGWANGWAMA Mokondo, n hiɛŋ, N zhɛ ma bacanjɛ atwa Isrɛl hwɛɛ na ashashɛ edenji ata ee ge zwegeni la, maa mo sotulonu aŋ urubwo uko maa me jicinje aŋ na cɛnjɛ ta aba.

²²N zhɛ mo togwu aŋ ma nda aŋ udenji uko gba na cɛnjɛ ta ata, nu nshama mi Isrɛl. Ɛ zhɛ a 'yaga agwuma oko na zhɛ ba untangana aŋ, a zha shɛ o bogotogwu ya maa a shɛ edenji eyebi o, cɛnjɛ-ta-tugwama ta aba du kaa tɛ zha shɛ ta sha ya ti yebi o.

²³A zha shɛ mama hashɛgana ya na azhɛba aba keeni ntatanuwaŋ ma aba mu tupwaŋ o, a zha shɛ du kaa momo tocingo ya ụdamụ na andwa aba tubwada o. N zhɛ mɛ jwɛ aŋ nu ugwulwo wa aba ukwunyi kpaaŋ, nu uhwaŋna na aa njɛ la iwɛwɛ keeni andwa aba tubwada. N zhɛ ma nyashɛnga aŋ rụmbɛɛ, nazhɛ ɛɛ zhɛ a sha atwa mi, Ngɛɛ zhɛ du ma sha Agwatana aba.

²⁴Ɛ zhɛ a 'yaga bi'iywa-ba-agwụdụ bu ko gana Devid yɛu mi ugondu, ɛ zhɛ o togwu a 'yaga agwuma oko, ɛ zhɛ a hwuga-unu wa andwa mi na tɛcara.

²⁵Ɛ zhɛ a nama na cɛnjɛ tu na Ngee peni la yɛu mi ugondu ge Jekob, tuba tɛ shɛ cɛnjɛ ta ata ogwunukwoshi aba namɛ la. Ɛ zhɛ a nama apata unyizo-nom, na miaụŋ ma aba keeni ajalụ aba. Bụtụ na shɛ gana Devid yɛu mi ugondu, ubwa zhɛ ba sha agwuma aba unyizo-nom.

²⁶N zhɛ ma twa-unu wa amɛ-olom unyizo-nom na aba maa i zasa iyi elele zhɛ ya nda aŋ ya o.[113] N zhɛ mo shikicingo aŋ, Ngɛɛ zhɛ ma nda maa e keeni ufwugwo, N zhɛ mo shikicingo ohwolu mi tijilo na ashashɛ aba, unyizo-nom.

²⁷N zhɛ ma nama apata na aba; N zhɛ ma sha Agwatana aba, ɛɛ zhɛ a sha atwa mi.

²⁸Aka na Ngee shikicinji ohwolu mi tijilo na ashashɛ aba unyizo-nom, nazhɛ edenji zhɛ a mapa maa Gamba AGWANGWAMA n teri atwa Isrɛl maa a shɛ atwa mi.