Read bassa IZIKƐL 39 Bible Online

IZIKƐL 39 - bassa bible

IZIKƐL 39

¹Nazhɛ AGWANGWAMA Mokondo hiɛŋ, Ɛ-yɛu bụtụ, dumangana Gog ata shɛ uhiu shɛgwuma she edenji Mɛshɛk keeni Tubal tigesere, mbiso bu maa, N to bu ni i'ime.

²N zhɛ ma bu jɛshɛrɛga nu uhwaŋna unya, N zhɛ mo bu kokwulo, N zhɛ ma bu 'yagajɛ maa banɛ taa tuzuba tu umɛwɛɛ uuwa i ci aka na ebi ci nshama mi Isrɛl.

³Nazhɛ Ngɛɛ zhɛ ma pa uta ata bụ abu 'waŋnɛ nu u'ala bu ugwulwo iyi keeni a'inla ata bụ abu 'waŋnɛ nu u'ala bu ubiye maa a 'waŋ.

⁴Gabụ, te ejeshi bu hwɛɛ, ta atwa ata abu twa-unu na aba, hi zhɛ hio 'wogono hio tulogono nu nshama ma ata mi Isrɛl. N zhɛ ma nda maa n'wo mi hiŋ mɛ shɛ iyimɛyɛ shanụnụ keeni isundɛ ehilo.

⁵Hi zhɛ hio 'wo ne ehilo ata, Gamba AGWANGWAMA Mokondo N dumwa.

⁶N zhɛ ma sapa cɛnjɛ tu Magog ulwa hwɛɛ, tụ ụpalanụ ata atwa namɛ uzawa ukwurishi we elele, nazhɛ bụtụ aba be elele zhɛ ba mapa maa Gamba n shɛ AGWANGWAMA.

⁷N zhɛ ma nda maa atwa mi Isrɛl mepi izeci ɛtɛ mi tijilo, N zha shɛ kaa mo lono maa e heshigeni ya izeci ɛtɛ mi kwukwuŋ. Nazhɛ edenji zhɛ a mapa maa Gamba AGWANGWAMA n shɛ Bụtụ ata bi Tijilo bi Isrɛl.

⁸AGWANGWAMA Mokondo hiɛŋ, Ụjita ga Ngaa jɛmɛ iwɛ ubwa we ci ba gom.

⁹Nazhɛ atwa na namɛ na ashɛpwụ Isrɛl zhɛ a zha e suje i'wɛŋnɛ ɛtɛ ujasa ee ge genji. Ɛ zhɛ a shana ulwa na shabula shɛ ujasa, ti itɛ, ta a'inla, tu nsanu hwɛɛ, te tidingbengbere, ɛ zhɛ a shana ulwa ni ibɛ shiywa shi cenje.

¹⁰A zha shɛ a dwajɛ ya i'wɛ'wɛ ne ehilo, a zha shɛ du kaa o logo ya i'wɛ'wɛ na awapa o. Ama ni i'wɛŋnɛ gɛ ujasa ibɛ ɛɛ zhɛ na shana ya ulwa. Atwa elele na njɛ aŋ la ufwu, ee suji i'wɛŋnɛ ya aba, ɛ zhɛ du a nda aŋ ufwu, o sugo du inɛ ya aba i'wɛŋnɛ. AGWANGWAMA Mokondo ubwa dumwa.

¹¹AGWANGWAMA hiɛŋ, Aka na ti ijɛ njɛ hwuŋ hwɛɛ, N zhɛ ma pana Gog cɛnjɛ tu na ɛɛ zhɛ o no bu ni Isrɛl, nu Ulomu we Ezhe-tahaŋnụ[117] a na namɛ nu uwaŋna-banụ Itekwu. Ti zhɛ ta kapa uhwaŋna we ezhe-tahaŋnụ, iwɛnɛ po apata ɛɛ zhɛ o no Gog tu unyama we ejeshi ubwa hwɛɛ, ɛ zhɛ a pa Ulomu ata izeci maa, Ulomu we Ejeshi Gog.[118]

¹²I zhɛ yo to ipiɛnɛ icenje nazhɛ atwa Isrɛl hwuwi n'wo mu ga tuno maa cɛnjɛ tu nama rụmbɛɛ sasana.

¹³Bụtụ be elele na namɛ na cɛnjɛ ta ata zhɛ bo mbiyono aŋ n'wo mu ga tuno, ɛ zhɛ a muna aŋ ụjɛrụma nụ ụjita mu ụ tụlasụ. Gamba AGWANGWAMA Mokondo N dumwa.

¹⁴Na aba ipiɛnɛ gɛ icenje, ɛ zhɛ a tala atwa na zhɛ o hikokono cɛnjɛ ta ata hwɛɛ maa ofwo elele aa ta kwụbɛ ru'wo[119] maa e shepi ru e ni, iwɛ maa cɛnjɛ ta ata tu nama rụmbɛɛ.

¹⁵Gana na to o rungo u'una ata, ofwo elele aa kwụbɛ u'umpwo bụtụ, ɛ zhɛ a nda uŋ useyida, iwɛ maa atwa na o hino e'uye zhajɛ maa e ni uŋ nu Ulomu we Ejeshi Gog.

¹⁶Ɛ zhɛ ɛ hiɛŋ izeci ụshɛpwụ ata dongonu apata maa Hamona[120] Gana ɛɛ zhɛ a nda cɛnjɛ ta ata rụmbɛɛ ta.

¹⁷Nazhɛ AGWANGWAMA Mokondo n hiɛŋ, Ɛ-yɛu bụtụ, suyana shanụnụ shi iyiri elele, ti isundɛ ehilo kpaaŋ maa a bananjɛ no olugwo elele maa a zhajɛ a yɛ iyimɛyɛ ụrụpɛ na Ngee teji aŋ nu nshama mi Isrɛl. Sotulononu ma ụrụpɛ ụ'wụtụ na Ngoo to maa hiɛ yɛ usunda maa hi swe mehieŋ.

¹⁸Hi zhɛ hia ya usunda we ejeshi ukpahiŋ, ɛhi zhɛ hia swa mehieŋ ma shɛgwuma shɛ cɛnjɛ tu unyizo, na mu na ma adagba, na miaụŋ-ma-gwụdụ, ta mu na mi iyweywe, ta mu na mi inɛ ye eyi, hwɛɛ aba nyemenji gana inɛ nɛ namɛ nu Bashan.

¹⁹Aka na Ngaa kwụnɛ atwa ga gana iyi ụrụpɛ, shanụnụ shɛ ga, ti isundɛ gɛ ehilo hwɛɛ zhɛ ya ya manɛbɛ me elele mu na aa kwụbɛ, ɛɛ zhɛ a swa mehieŋ uuwa mu na ngba aŋ.

²⁰Hi zhɛ hia ya ti idɛkwɛ keeni asụcɛ ibɛ hwɛɛ, te ejeshi na ahiɛ kwụbɛ ni ikwede mi. Gamba AGWANGWAMA Mokondo N dumwa.

²¹AGWANGWAMA hiɛŋ, N zhɛ mo mbisono edenji ụjɛrụma mu, mo mbisono aŋ ukpahiŋ mu keeni gana na Ngaa jɛmɛ ụshɛrɛya na tuhaŋsa ti mi ti tishiriri.

²²Atwa Isrɛl zhɛ a mapa te kwuni na aka ata maa Gamba n shɛ AGWANGWAMA na shɛ Agwatana aba.

²³Edenji elele zhɛ a mapa maa ti'ima tu na atwa Isrɛl namɛ na tuba tɛ shɛ iwɛ iwɛwɛ nɛ aa njɛ. Ibɛ po Ngee genji aŋ Ngee leni maa atwa i'ime ya aba lasụ aŋ maa a kwụnɛ aŋ nu ujasa nu utokwobi.

²⁴N tụpanɛ aŋ iyi nɛ teni cɛŋ nu uzawa tụrụmbɛɛ ta aba keeni andwa aba tubwada, iwɛbɛ po Ngee genji aŋ.

²⁵AGWANGWAMA Mokondo hiɛŋ, N zhɛ mo hioko ya inyɛmɛnyɛmɛ ya ajalalo Jekob a na shɛ atwa Isrɛl hwuwayɛ go, N zhɛ ma nda maa iyi zhɛmanɛ aŋ sasana. N zhɛ ma jilanɛ izeci ɛtɛ mi tijilo.

²⁶Aka na aa namananɛ na cɛnjɛ ta aba lapiya, yaa zasa bụtụ be elele na bo zwono aŋ inyɛsɛ, nazhɛ isɛbwɛ zhɛ yo 'wo aŋ iwɛ ezuye na shɛ aŋ la iwɛ uzawa tɛcara ta aba kpaaŋ no ofwo mi.

²⁷N zhɛ mo mbisono edenji ga gembi ufwugwo tijilo ti mi, na aka na tu Ngaa bacanjɛ atwa mi na a'una na ee ge zwegeni na ashashɛ edenji no ofwo na atwa i'ime ya aba ga namɛ.

²⁸Nazhɛ atwa mi zhɛ a mapa maa Gamba n shɛ AGWANGWAMA na shɛ Agwatana aba. Ɛ zhɛ a mapa ijɛ iwɛnɛ ti Ngee leni la maa a 'imɛ aŋ, Ngaa bacanjɛ aŋ sasana Ngee jicinje aŋ maa o sotulonu na cɛnjɛ ta aba, N genji shi kaa okwo bụtụ aba bu ko ne ekwunyi o.

²⁹N zhɛ mo zwono atwa Isrɛl Mpiala mi mi, N zha shɛ ma pashɛnga ya ụpɛshɛka mu no olugwo aba kwukwuŋ. Gamba AGWANGWAMA Mokondo N dumwa.