Read bassa IZIKƐL 4 Bible Online

IZIKƐL 4 - bassa bible

IZIKƐL 4

¹Nazhɛ Agwatana n hiɛŋ, Ɛ-yɛu bụtụ, jarɛ utemberi uko, maa shiri uŋ nu umbe bu, maa njɛ ufwoto Jɛrusalɛm nu bwa.

²Nda ufwoto wa atwa ata jwe tugwubi, nda ufwoto wo okporo ijilɛni ɛtɛ atwa ata shikecenji, to ofwoto agba ejeshi, tutu rungwutwonu ụshɛpwụ ata.

³Shapa ụpalụ ụshɛmbɛrɛ maa shikicinji uŋ na ashashɛ bụ nụ ụshɛpwụ ata gana uba ụshɛmbɛrɛ, ngbaraka geri bụ ụshɛpwụ ata. Ɛ zhɛ a hwala uŋ, gabụ kaa bɛ shɛ bụtụ na bi zhɛ ba hwala uŋ. Inɛ gɛ kaa zhɛ ya shana atwa Isrɛl tusokono.

⁴Woto na bụ'aŋbụ bụ bu u'ala ugwulwo, N zhɛ ma bụ[15] patana ulwapɛ wa atwa Isrɛl.

⁵Bi zhɛ ba nama apata ijitɛ kpakwụ-ni-dipi-tɛtu-na-buhanda (390) bu na nda ụbaụta iwɛ ulwapɛ wa aba. Gabụ kaa Ngee peni ulwapɛ wa aba na aa ga shɛ a nda. Uwaŋna uko ụ shɛ iwɛ uywa uko na aa ga shɛ a nda ulwapɛ ata.

⁶Aka na ebu hwuwi inɛ ɛtɛ, jɛshɛrɛga bụ'aŋbụ bụ bu u'ala ubiye maa njɛ ụbaụta iwɛ ulwapɛ wa atwa Juda ijitɛ buhanda (40), ụjita uko ụ shɛ iwɛ uywa uko na aa ga shɛ a nda ulwapɛ ata.

⁷Jɛshɛrɛga maa zweni atwa ata hweri Jɛrusalɛm igbɛtɛtɛ. 'Nyama ivwɛ i'ɛlɛ bu nazhɛ dumanganɛ ụshɛpwụ ata ụ'wụtụ tigesere tu na ti zhɛ ta wumana uŋ.

⁸N zhɛ mo bu umpo ni ihwehwe iwɛ maa kede eri bulama tɛnda ti beye tu bana uuwa i ci aka na ijitɛ ɛtɛ tuhwala tụ bụ i ulwa o.

⁹Hwuwayɛ go sugo izɛgwu iyimɛyɛ nɛ ɛɛ hiɛŋ wit keeni inɛɛ nɛ ɛɛ hiɛŋ bali, ti ikɛpɛ, ti igenyi, ta ashina. Hiŋtotongo iŋ hwɛɛ maa njɛ akara. Iyi nɛ ɛbi zhɛ bu na ya ni ijitɛ ɛtɛ kpakwụ-ni-dipi-tɛtu-na-buhanda (390) nɛ abɛ shɛ bo woto na bụ'aŋbụ bụ bu u'ala ugwulwo ta.

¹⁰Bɛ shɛ bu na nda iyimɛyɛ ɛtɛ ne bimenji bi ikpɛji ike uwaŋna uwaŋna, bɛ shɛ bu na ya iŋ na aka na ebi teri maa na ya iŋ.

¹¹Bɛ shɛ bu na swa meni ta gwumwa ne ekwepi eyebi iyi-heri na aka na ebi teri maa na swa mụ.

¹²Shana ulwa ne tuwiŋ ta butugwumwa tu na tu hweteni maa njɛ akara ni izɛgwu bali nu ulwa ata, nazhɛ gɛga nu ukpogwu no ofwo na atwa zhɛ ma bu ngbaraka ta ba ya iyimɛyɛ ɛtɛ.

¹³AGWANGWAMA hiɛŋ, Gana ga ibɛ atwa Isrɛl zhɛ na ya iyimɛyɛ nɛ hashɛganụ, nɛ undwa leni shi, na aka na Ngee gereteji aŋ hwuŋ maa e zhe nu u'una unya.

¹⁴Nazhɛ Ngɛɛ hiɛŋ AGWANGWAMA Mokondo, Awo! N te meme heshigeni shi kwukwuŋ. Te kwune na tuwaŋnɛ ti mi uuwa i ci aka ga, N ta yɛ shɛ usunda na meme 'weji o, kwo kaa unaa na unya usunda kwụnɛ o. I zasa iyimɛyɛ nɛ hashɛganụ i twonuo unu mu kwukwuŋ o.

¹⁵Nazhɛ Agwatana hiɛŋ, Bwonu ga, asha nda iyimɛyɛ bu nu ulwa na ɛbi zhɛ ba shana ne tuwiŋ ti inɛ.

¹⁶Bɛɛ hiɛŋ sasana, Ɛ-yɛu bụtụ, N zhɛ ma nda maa Jɛrusalɛm vwụnjɛ iyimɛyɛ. Atwa ata zhɛ na manganga iyimɛyɛ nɛ shɛ maa a yɛ keeni meni mu na maa e swe ni inyɛsɛ keeni ohwulu tɛnda bwuu bwuu.

¹⁷Iyimɛyɛ keeni meni zhɛ yo hwuwonowuŋ aŋ, amɛ aba zhɛ a hashagaganụ no ohwulu na a nda aŋ bwuu bwuu, ɛ zhɛ a 'nyangana iwɛ ulwapɛ wa aba na aa nda.