Read bassa IZIKƐL 42 Bible Online

IZIKƐL 42 - bassa bible

IZIKƐL 42

¹Nazhɛ bụtụ ata n zeriji eti teni nu ukpogwu u tupohondo geri bu umwono uko na namɛ tuzuba tu umwono ata wa Agwatana, ụ dụlụmɛ shɛ nu umwono ata shikeni geri bu uwaŋna-twonuo umwono wa Agwatana o.

²Ụnjɛswa umwono ata odubo ubwa ngbaracɛ tuzuba ụ shɛ avwuna dipi-tɛtu-nu-woshi (170), uholo ubwa ụ shɛ avwuna dupu-nu-talacɛ-na-ba-a-ta (85).

³Ụpadụ shimwono sha ata uko ngbaracɛ ohwolu ata namɛ geri bu umwono wa Agwatana i ci gana avwuna talacɛ-na-ba-eneshi, geri vwɛ ngbaracɛ angba ata namɛ geri bu ukpogwu u tupohondo. O mo shu tusata tu tatụ, ɛɛ kwushɛ tusata tusata uhwuri ma tu ta tu namɛ tuta.

⁴Ohwolu tudulo namba tuzuba tu umwono ata, uholo wa aba ụ shɛ avwuna umpwa-na-ba-ecenje, ụnjɛswa wa aba ụ shɛ avwuna dipi-tɛtu-nu-woshi (170), u 'yajɛ du shidubo geri ata.

⁵Shimwono shɛ na shɛ namɛ na azuba umwono ata shɛ namɛ mwee mwee uhwuri ma shɛ shɛ ashashɛ keeni ma shɛ shɛ tuta, iwɛnɛ tɛ ɛ kwushɛ shụ na tuma.

⁶Gana na te e te shi shimwono shɛ ga atukpa na tuma ta shɛ ba gana me shi ye, iwɛbɛ po ɛɛ kwushɛ shụ na tuma te kwune taa nu uvwi ubwa.

⁷I 'yajɛ tuma tu ko ti shiyeni tu ngbaracɛ shimwono sha ata geri bu ukpogwu ata u tupohondo, hileniye, ụnjɛswa shimwono sha ata ụ shɛ avwuna dupu-nu-talacɛ-na-ba-a-ta (85).

⁸Iwɛnɛ po ụnjɛswa shimwono sha ata ee jejeji to dongonu ukpogwu ata u tupohondo ụ shɛ avwuna dupu-nu-talacɛ-na-ba-a-ta (85). Nazhɛ ụnjɛswa ma shɛ ta shɛ mama ngbarakanụ nu umwono wa Agwatana ụ shɛ avwuna dipi-tɛtu-nu-woshi (170).

⁹Shimwono sha ata shɛ tɛjajaga shɛ namɛ tuta,[126] shɛ 'yajɛ odubo tutono geri bu uwaŋna-banụ, ti yaa shɛ bụtụ teni shu geri bu ukpogwu ata u tupohondo.

¹⁰Shɛmɛ sho shimwono shi ko shɛ namba shɛ palanganɛ tuta tụ ụnjɛswa umwono ata wa Agwatana, geri bu ukpogwu ata u tupohondo. Shɛ dụlụmɛ shɛ nu umwono ata shikeni nu ukwunanga umwono wa Agwatana geri bu uwaŋna-twonuo bu umwono wa Agwatana o.

¹¹Uhwaŋna uko namɛ nu umbe shimwono sha ata gana ma shɛ ta shɛ namɛ tuzuba. Ụnjɛswa tu uholo shɛ ba nangwụ. Tisemberi tu na aa njɛ uŋ tɛ shɛ tu ko, uhwaŋna ata kaa shɛ uko uko no odubo ata namɛ tuzuba.

¹²Shimwono sha ata shɛ 'yajɛ odubo oko geri ata bu tuta, geri bu uwaŋna-banụ no olugwo ata ụdatụ ata kwune.

¹³Nazhɛ bụtụ ata n hiɛŋ, Shɛmɛ sho shimwono shɛ ga shɛ tuzuba keeni tuta, shɛ gata shɛ mama ngbarakanụ nu ukpogwu umwono wa Agwatana, shɛ shɛ shɛmɛ shi tijilo. Apata onongbo na o tono no ofwo na AGWANGWAMA namɛ a ya iyi ụrụpɛ nɛ shɛ inɛ tijilo nɛ hwuri inɛ vwɛ hwɛɛ. Apata oo tulono iyi ụrụpɛ tijilo nɛ hwuri inɛ vwɛ hwɛɛ, iwɛnɛ ta apata shɛ ofwo tijilo. Iyi nɛ oo tulono apata i shɛ: iyi ụrụpɛ tiya, ni iyi ụrụpɛ iwɛwɛ keeni iyi ụrụpɛ tụwụma.

¹⁴Aka na onongbo ata ga namɛ nu umwono wa Agwatana, a jala ya maa e zhe nu ukpogwu u tupohondo, a shɛ a bwacaga ya i'wɛŋnɛ ɛtɛ tijilo ee ge hwuŋtengeni na aka na ta a ndana AGWANGWAMA ugondu. A shɛ o hwuŋtono ya i'wɛŋnɛ inyɛ nazhɛ e teni umwono ata atwa vwɛ ụlwatagwụ.

¹⁵Aka na ta bụtụ ata hwuwi amɛ ukpogwu ata umwono wa Agwatana tumanganga, nazhɛ bee m becinji nu ukpogwu no odubo geri bu uwaŋna-banụ, bee mengenji tupohondo tu umwono wa Agwatana tutu rungwutwonu.

¹⁶Bee shepi bukwuto ata bi iyi tumanga bee mengenji geri bu uwaŋna-banụ, yaa namɛ avwuna akpakwaụ-eneshi-na-buhanda (840).

¹⁷Bee mengenji tuzuba, yaa namɛ avwuna akpakwaụ-eneshi-na-buhanda (840).

¹⁸Bee mengenji tuta, yaa namɛ avwuna akpakwaụ-eneshi-na-buhanda (840).

¹⁹Bee mengenji geri bu uwaŋna-twonuo, yaa namɛ avwuna akpakwaụ-eneshi-na-buhanda (840).

²⁰Bee mengenji ukpogwu ata hwɛɛ aba apada eneshi tutu rungwutwonu uŋ, yaa shɛ avwuna akpakwaụ-eneshi-na-buhanda (840). Ụdatụ ata ubwa bogwu iyi tijilo ni inɛɛ nɛ jirimi shi.