Read bassa IZIKƐL 45 Bible Online

IZIKƐL 45 - bassa bible

IZIKƐL 45

¹Aka na te ehi dwotwogonu cɛnjɛ maa udenji we elele 'yaga ma ta aba, hiɛ shɛ hio shilono AGWANGWAMA ụpadụ uko. Ga ụnjɛswa tuba ụ shɛ avwuna igbɛɛ-woshi-ni-bɛ-yebi-na-akpakwụ-a-ta (45,000), go uholo tuba ụ shɛ avwuna igbɛɛ-woshi (40,000), cɛnjɛ ta ata hwɛɛ tuba tɛ shɛ to jirimo.

²Na cɛnjɛ ta ata ɛɛ zhɛ a ma ohwolu tijilo, tɛ shɛ ta nangwụ ụnjɛswa tu uholo hwɛɛ, tɛ shɛ ta sha avwuna akpakwaụ-eneshi-na-buhanda (840), tu uholo hwɛɛ tụ ụnjɛswa. Cɛnjɛ ta ata tɛ shɛ ta 'yaga ohwolu na haŋpɛ, a na zha shɛ a 'yaga iyi elele tutu rungwutwonu tu, ohwolu ata a shɛ a sha avwuna dupu-nu-talacɛ-na-ba-eneshi (840).

³Ɛ zhɛ a jaja cɛnjɛ ta ata na ashashɛ, ashashɛ oko aba ɛɛ zhɛ a ma Ohwolu Tijilo me Tijilo, ụnjɛswa tuba zhɛ wa sha avwuna igbɛɛ-woshi-ni-bɛ-iyebi-na-akpakwụ-a-ta (45,000), uholo tuba zhɛ wa sha avwuna igbɛɛ-woshi (40,000), ofwo ata aba zhɛ a sha ofwo na jirimi uhwuri ofwo vwɛ hwɛɛ.

⁴Apata aba zhɛ a sha ofwo tijilo nu u'una ata, aba ee shileni onongbo na a nda ugondu no ohwolu tijilo. Apata shimwono sha aba shi zhɛ sha nama hwɛɛ, to ofwo ata ɛɛ zhɛ a ma ohwolu tijilo.

⁵Ashashɛ cɛnjɛ ta ata tụ vwɛ a shɛ ma tu ta Alivai na a nda ugondu nu umwono wa Agwatana. Apata ashɛpwụ aba a na ɛɛ zhɛ namanga zhɛ a nama.[137] Ụnjɛswa tuba ụ shɛ avwuna igbɛɛ-woshi-ni-bɛ-iyebi (44,000) uholo tuba ụ shɛ avwuna igbɛɛ-woshi (40,000).

⁶Ụnjɛswa wo ofwo ata na 'wa ofwo tijilo ụ shɛ avwuna igbɛɛ-woshi-ni-bɛ-iyebi-na-akpakwụ-a-ta (45,000) uholo tuba ụ shɛ avwuna igbɛɛ-itɛ (10,000), aba ɛɛ zhɛ o shilo swooŋ iwɛ maa atwa Isrɛl avwɛ a nama.

⁷A shɛ o shilo cɛnjɛ tu ko swooŋ iwɛ bụtụ be elele na patanɛ na tugwama na aka ata. Tɛ shɛ te kwune no tugwungwu tu uwaŋna-twonuo uuwa maa tu twa na cɛnjɛ ta ata te tijilo, uuwa i ci Itekwu ɛtɛ I'wɛtwɛ, te kwune sasana no tugwungwu tu uwaŋna-banụ uuwa i ci geri ata bu uwaŋna-twonuo bu u'una ata. Iwɛ maa ụnjɛswa tuba nangwụ na ma tu ta ee peni alamụ Isrɛl.

⁸Cɛnjɛ ta ata tuba agwuma elele na ta patanɛ na tugwama ti Isrɛl ɛ shɛ ba 'yaga, iwɛ maa kede bu na nda atwa tuhwulo. Maa tuba ba gangana atwa Isrɛl cɛnjɛ tu ta tu vwɛ.

⁹AGWANGWAMA Mokondo hiɛŋ, Ahiɛba shɛgwuma, hi nduwa iwɛwɛ te ilegeji, ni Isrɛl! Ganga ma ya abwagara ata hiŋ keeni tuhwulo tɛnda. Na nda ma ya iyi nɛ teni cɛŋ keeni iyi tishiriri. Hiɛ shɛ shɛ hio unzo ya atwa mi na cɛnjɛ ta aba sasana o. Gamba AGWANGWAMA Mokondo N dumwa!

¹⁰Bụtụ be elele shɛ bu na nda uhwara ne bimenji na teni cɛŋ.

¹¹Bimenji na aa manga iyimɛyɛ hwoo, bɛ shɛ ba nangwụ ne bimenji na aa manga iyi nɛ shɛ meni. Inɛɛ nɛ shɛ bimenji bu hwɛ hwɛɛ i shɛ uhomɛ. Gana na timenji ti ifa umpwa, tɛ shɛ uhomɛ uko, timenji tu bat umpwa, tɛ shɛ du uhomɛ uko.

¹²Gana timenji ti hiŋ tɛ shɛ ta sha na: timenji ta agira woshi tɛ shɛ ushɛkɛl uko, timenji tɛ ɛshɛkɛl dupu-ne-eshe-umpwa tɛ shɛ mina uko.[138]

¹³Timenji tu na ahiɛ shɛ hi na pana upwaŋ hiŋ na: Yaa shɛ ebu jwe iyimɛyɛ wit, dwotwogonu iŋ orubwo ecihiŋ, urubwo uko abɛ shɛ ba pana. Yaa shɛ ebu jwe ụshɛkapa, dwotwogonu uŋ orubwo ecihiŋ, urubwo uko abɛ shɛ ba pana.

¹⁴Yaa shɛ manɛbɛ ma buta, zwogono mu agaruwa umpwa, ugaruwa uko abɛ shɛ ba pana. (Manganga mu ne bimenji ata ɛɛ hiɛŋ bat: abat umpwa aba oo zwono nu uhomɛ uko).

¹⁵Na amɛ agwụdụ kpakwụ, ụgwụdụ uko abɛ shɛ ba pana, Bɛ shɛ ba 'waŋnɛ ti iyi ụrụpɛ tiya, ni iyi ụrụpɛ tuhwoŋzhingo, ti iyi ụrụpɛ wa amɛ-olom, iwɛ maa e hi gengeni iwɛwɛ hiŋ. Gamba AGWANGWAMA Mokondo m peni-unu ga.

¹⁶Atwa cɛnjɛ tu ga hwɛɛ a shɛ o sugo apwaŋ ga no ofwo agwuma ata Isrɛl na ta patanɛ na tugwama.

¹⁷Ugondu ubwa waa shɛ maa bwɛ iyimabiga nɛ ɛɛ zhɛ a ta ụrụpɛ tuhwoŋzhingo kwunduu, tụ ụrụpɛ tiya, tụ ụrụpɛ tuswa iwɛ alamụ Isrɛl hwɛ hwɛɛ na aka bi isene upiana ufwo, ti Ijitɛ-ụhinjanụ keeni nsono mu vwɛ. Ubwa shɛ bɛ bwɛ iyi iwɛ ụrụpɛ iwɛwɛ, tụ ụrụpɛ tiya, ti iyi ụrụpɛ tuhwoŋzhingo, keeni iyi ụrụpɛ wa amɛ-olom, maa e gengeni atwa Isrɛl iwɛwɛ ya aba.

¹⁸AGWANGWAMA Mokondo hiɛŋ, Nụ ụjita uhiiŋ nu upiana uhiiŋ,[139] bɛ shɛ ba ta ụrụpɛ nu usemberi buna na zasa ụngwụ we elele iwɛ maa nyashɛnjɛ ohwolu ata tijilo.

¹⁹Onongbo zhɛ a sala mehieŋ mụ ụrụpɛ ata iwɛwɛ maa a sụkwụtwa mụ ni i'wɛ'wɛ ukpa wo odubo umwono wa Agwatana, te esugwulumi ata utukwu-ụrụpɛ eneshi, keeni i'wɛ'wɛ ya akpa odubo ukpogwu wa amɛ.

²⁰Aka na tu upiana ata ulwa ijitɛ icenje, hiɛ shɛ hia ndaanana ijɛ iwɛ bụtụ be elele na njɛ iwɛwɛ nu umepiteshi kwo kaa no tugbodu. Gana ga ibɛ ɛhi zhɛ hi na nda umwono ata wa Agwatana tijilo.

²¹Nụ ụjita umpwa-ni-bɛ-neshi nu upiana ata uhiiŋ ibɛ ɛhi zhɛ hio kwuno titeyinje ti isene tɛkashɛka. Ijitɛ icenje ibɛ bụtụ be elele bɛ shɛ ba ya iyimɛyɛ nɛ zasa Ifucingɛ.

²²Jita ata isene kwuni, agwuma na ta patanɛ shɛ ba ta ụrụpɛ iwɛ iwɛwɛ ibwɛ keeni iwɛ inɛ ya atwa cɛnjɛ ta ata kpaaŋ nu usemberi buna.

²³Ga bu na kwụna esemberi inɛ ecenje, na adagba ecenje a na zasa ụngwụ we elele iyi-heri uuwa i ci ijitɛ icenje nụ ụrụpɛ tuhwoŋzhingo. Ga bu na ta ụrụpɛ iwɛwɛ nu upi iyi-heri.

²⁴Gɛ bi nɛ vwɛ mihiuŋ iwɛ ụrụpɛ tiya ne bimenji bi ifa bu ko iwɛ usemberi buna be elele keeni udagba we elele, baa shɛ bɛ vwɛ manɛbɛ ma buta ne bimenji bi ifa bu ko.

²⁵Agwuma ata shɛ bɛ vwɛ iyi ụrụpɛ iwɛwɛ gana na ti bɛɛ vwɛ iyi ụrụpɛ tuhwoŋzhingo gana ebe ti bɛɛ gɛ vwɛ iyi ụrụpɛ tiya, ta manɛbɛ ma buta, iwɛ isene yo obodongomu, nɛ zhɛ yo kwuno nụ ụjita umpwa-ni-bɛ-tɛ nu upiana ata ucenje.