Read bassa IZIKƐL 46 Bible Online

IZIKƐL 46 - bassa bible

IZIKƐL 46

¹Nazhɛ AGWANGWAMA Mokondo hiɛŋ, Odubo ata namɛ geri bu uwaŋna-banụ oo tono ukpogwu wa amɛ, a shɛ aa na kapa ni ijitɛ ɛtɛ icihiŋ nɛ shɛ ijitɛ ugondu tɛnda, ama a shɛ a na kapɛshɛnga aŋ nu Ụjita-ụhinjanụ keeni ụjita isene upiana ufwo.

²Agwuma na ta patanɛ zhɛ no dulo ukpogwu ata u tupohondo bo tono angba ata, bo shikono nụ ụ'wụ'wụ ukpa ata no odubo maa onongbo to ụrụpɛ ubwa u tuhwoŋzhingo keeni maa o to du ụrụpɛ ubwa wa amɛ-olom. No odubo ata bɛɛ zhɛ ba nda tɛzhɛba tu bwa nazhɛ ba bana. A shɛ shɛ a kapa kaa odubo ata o, semi nụ ụrụmɛ.

³Atwa cɛnjɛ ta ata hwɛɛ aba shɛ a zhɛba AGWANGWAMA nu umbe odubo ata nụ ụjita isene Ụjita-ụhinjanụ we elele, tụ ụjita isene upiana ufwo we elele.

⁴Nụ Ụjita-ụhinjanụ ibɛ agwuma na ta patanɛ na tugwama zhɛ ba 'waŋnanɛ AGWANGWAMA iyi ụrụpɛ tuhwoŋzhingo, ibɛ shɛ miaụŋ-agwụdụ mi cihiŋ, nu udagba uko, a shɛ shɛ a 'yaga ụngwụ we elele o.

⁵Ụrụpɛ tiya na baa shɛ ba pana iwɛ udagba ata uko ụ shɛ wa sha ne bimenji bi ifa bu ko. Inɛ ụgwụdụ we elele, i shɛ ya sha gana na baa jala maa pana. Bɛ shɛ ba pana manɛbɛ ma buta ne bimenji bi ifa bu ko iwɛ ụrụpɛ ata tiya.

⁶Bɛ shɛ ba ta ụrụpɛ nu usemberi buna uko, na miaụŋ-ma-agwụdụ mi cihiŋ, nu udagba uko nụ ụjita isene upiana ufwo, hwɛɛ ibɛ shɛ ya nama uzawa ụngwụ we elele.

⁷Bɛ shɛ ba pana ụrụpɛ tiya ne bimenji bi ifa bu ko iwɛ usemberi buna be elele, keeni bimenji bu uko iwɛ udagba we elele. Inɛ miaụŋ-ma-agwụdụ i shɛ agwuma eri ba pana gana elele na kwụlanɛ bụ, bimenji bụ ụrụpɛ tiya be elele bɛ shɛ ba 'yaga manɛbɛ ma buta ne bimenji bi ifa bu ko.

⁸Agwuma shɛ ba banɛ na angba ata tedure no odubo ata bee ge teni.

⁹Aka na atwa cɛnjɛ ta ata zhajɛ maa a zhɛbɛ AGWANGWAMA ni isene ye elele, atwa elele na ge teni no odubo ata namɛ tuzuba a shɛ a bana ya no odubo ata namɛ tuta, ti yaa shɛ ee hwuwi tɛzhɛba ta aba. Atwa elele na tuba ge teni no odubo ata namɛ tuta, aba zhɛ a bana ya no odubo ata namɛ tuzuba. I zasa bụtụ be elele shɛ ba bana no odubo ata bee ge teni o, semi bɛ shɛ ba bana ya no odubo ata namɛ ririri na a na ata bee ge teni.

¹⁰Agwuma shɛ e teni na aka na ta atwa teni, baa shɛ ba bana na aka na ta atwa beni du.

¹¹A shɛ a pana ụrụpɛ tiya ne bimenji bi ifa bu ko iwɛ usemberi buna be elele keeni iwɛ udagba we elele nụ ụjita titeyinje ti isene ye elele. Bụtụ eri ba pana gana elele na kwụlanɛ bụ iwɛ yɛu ụgwụdụ ike. Manɛbɛ ma buta mɛ shɛ ma sha ne bimenji bi ifa bu ko.

¹²Aka na agwuma a jala maa pana AGWANGWAMA upwaŋ u tukwulangana, okwo yaa shɛ ụrụpɛ tuhwoŋzhingo, okwo yaa shɛ una wa amɛ-olom, a shɛ a kapɛshɛngana bu odubo ata ukpogwu wa amɛ ata namɛ nu uwaŋna-banụ. Bɛ shɛ ba ta ụrụpɛ ata gana na tu baa shana ba ta nụ Ụjita-ụhinjanụ, yaa shɛ bee beni a shɛ a kapa ya odubo ata.

¹³Ibɛ AGWANGWAMA hiɛŋ, Ga a na pana bụ yɛu-ụgwụdụ nɛ ta namɛ uywa uko te e meci bu nụ ụrụpɛ tuhwoŋzhingo. A shɛ a na pana ụrụpɛ ata iyi-heri.

¹⁴A shɛ du a na pana ụrụpɛ tiya ne bimenji bi ifa bu ko na oo dwotwogonu orubwo ecihiŋ nu uvwungwa uvwungwa, na manɛbɛ ma buta ne bimenji bi ifa bu ko keeni bimenji bi hiŋ bu tatụ maa e hiŋtetenji mu nụ ụrụpɛ tiya. Undwa na shɛ maa a na pana AGWANGWAMA ụrụpɛ ga ụ shɛ wo shikono unyizo-nom.

¹⁵Yɛu-ụgwụdụ, ni inɛmɛ, na manɛbɛ ma buta, i shɛ aa na pana AGWANGWAMA uvwungwa uvwungwa tutu unyizo-nom.

¹⁶AGWANGWAMA Mokondo hiɛŋ, Yaa shɛ agwuma na ta patanɛ na tugwama shepi cɛnjɛ tu na baa ga 'yajɛ baa njɛ miaụŋ mu bwa me eyi upwaŋ, cɛnjɛ ta ata ti zhɛ ta sha ma tu tu miaụŋ ma ata nu umwamwa ubwa.

¹⁷Ama yaa shɛ agwuma na ta patanɛ na tugwama shepi cɛnjɛ tu na baa ga 'yajɛ bee peni bụtụ na ba ndana bụ ugondu, cɛnjɛ ta ata ti zhɛ ta shaanana hwuŋ ma tu ta agwuma ata tu uywa iyi tugwuricingo[140] u ci. Ti zhɛ ta shaanana ma tu bwa, ubwa na miaụŋ mu bwa me eyi kiri tee eri ta sha ma ta aba unyizo-nom.

¹⁸Agwuma na ta patanɛ shɛ shɛ ba lashɛga atwa mi iyi elele nɛ shɛ inɛ ya aba o. Cɛnjɛ te elele ee peni bu, ga shɛ tuba bee peni miaụŋ mu bwa, iwɛ maa kede lashɛga bụtụ be elele cɛnjɛ no tuhwulo.

¹⁹Nazhɛ bụtụ ata n zeriji no odubo shimwono sha ata shɛ ngbaracɛ tuzuba to dongonu odubo ata namɛ tuta tu ukpogwu wa amɛ. Shimwono sha ata shɛ shɛ shimwono shi tijilo, shɛ na onongbo a nama. Bee n sekeni ofwo oko na namɛ geri bu uwaŋna-twonuo ba shɛmɛ sho shimwono sha ata.

²⁰Bɛɛ hiɛŋ, Epe onongbo a shɛ o no shitogo usunda ụrụpɛ tụwụma keeni una ụrụpɛ iwɛwɛ, maa a na nda akara ni inɛmɛ nɛ oo to ụrụpɛ tiya, iwɛ maa kede iyi tijilo ye elele beni no tupohondo, no ofwo na yee eri ya zala atwa ata o.

²¹Bee n zeriji nu ukpogwu u tupohondo, eti rinji esugwulumi ubwa eneshi, Ngaa kwụbɛ maa usugwulumi we elele 'yajɛ ukpogwu ubwa.

²²Okpogwu ata namɛ ne esugwulumi ata gwụmwatangwụ, ụnjɛswa una una ụ shɛ avwuna dupu-ne-eshe-umpwa-na-ba-atụndatụ (68), uholo wa aba ụ shɛ avwuna dupu (50).

²³U 'yajɛ ụdatụ na oo mo na atayɛ tutu rungwutwonu uŋ, a njɛ ofwo ulwa tishana to dongonu ụdatụ ata.

²⁴Nazhɛ bụtụ ata m mbishi, bɛɛ hiɛŋ, No shimwono shɛ ga shi ciyikwo, shɛ ba anjɛ-ugondu umwono wa Agwatana o shitogo iyi elele nɛ atwa to ụrụpɛ.