Read bassa IZIKƐL 47 Bible Online

IZIKƐL 47 - bassa bible

IZIKƐL 47

¹Nazhɛ bụtụ ata n zeriji bee n gwuricinji no odubo umwono wa Agwatana. Meni mu ko ma banɛ nu ukaka idwɛtwɛ yo odubo ata maa fwunga moo zwo geri bu uwaŋna-banụ, geri ata umwono wa Agwatana peni eshe. Ma banɛ tuta tu ukaka umwono wa Agwatana maa fwunga moo hwulo tuta tu utukwu-ụrụpɛ.

²Nazhɛ bụtụ ata m bɛcinjɛ ya du nu umwono ata wa Agwatana hwɛ hwɛɛ no odubo ata namɛ tuzuba, bee ringeni ne mi geri bo odubo ata ngbaracɛ geri bu uwaŋna-banụ. Meni ma ata ma fwunga tu maa banɛ geri bo odubo ata namɛ tuta.

³Gana na ta bụtụ ata hwuri geri bu uwaŋna-banụ, bee kwuni meni ma ata tumanganga no bukwuto ata baa 'waŋnɛ nu u'ala ubwa, bee mengenji, maa namɛ avwuna ugbaa uko (2,000). Bɛɛ hiɛŋ ge me teni meni ma ata, Ngee teni ga, me'ilwo mu muba mu namɛ ni i'ilu ivwunɛ mi.

⁴Nazhɛ bee mengenji sasana avwuna ugbaa uko, bee n tecinji ne meni ma ata, mee n ci shilulo. Bee mengeneni avwuna ugbaa uko, bee n tecinji sasana ne meni ma ata, mee n ci ya embi.

⁵Bee mengenji sasana avwuna ugbaa uko, apata meni mu hwuri mi iri ya, ti mɛɛ shɛŋ maa shɛ ya Urefu, N eri shi mo tono mu ya o. Mu hwuleji me'ilwo maa ma kasha ya ni ivwunɛ, mu waŋnɛ ya ataga tɛnda.

⁶Bɛɛ n hiɛŋ, Ɛ-yɛu bụtụ, bụ kwụbɛ yibwa ijɛ hŋ? Nazhɛ bụtụ ata n gwuricinji nu ukwoswo Urefu ata.

⁷Aka na Ngee ci, Ngaa kwụbɛ ti i'wɛ'wɛ nɛ gembi ufwugwo tebiye shikekeni nu ukwoswo Urefu ata, ti hileniye ti hileni na.

⁸Bɛɛ n hiɛŋ, Meni mu ga ma fwunga tutu geri bu uwaŋna-banụ moo zwo nu ulomu Jodan maa zha tutu Itekwu Manɛ. Aka na mee teni Itekwu ɛtɛ Manɛ, muba ma jɛshɛrɛga meni mi itekwu ɛtɛ maa mɛ shɛ meni mu ufwo.

⁹Ofwo elele na uhwulwo ga wa fwunga woo zwo, apata a 'yaga usunda keeni ijɛnɛ iyiri yiri. Uhwulwo ga zhɛ wa nda maa meni mi Itekwu ɛtɛ Manɛ mɛ shɛ meni mu ufwo no ofwo elele na waa fwunga, iyi elele ya sha buumwa apata.

¹⁰Te kwune nɛ ɛmɛzhinjɛ Ɛngɛdi uuwa i ci ɛmɛzhinjɛ Ɛnɛglim, ekwuzhi zhɛ a bala nu ukwoswo itekwu ɛtɛ, apata ɛɛ zhɛ na gatagana n-ngwuno ma aba maa mu hweteni. Ijɛnɛ iyiri yiri zhɛ ya nama apata gana na ti yaa namɛ ni Itekwu ɛtɛ I'wɛtwɛ.

¹¹Ama meni mu na mu namɛ na ahwacɛ keeni ɛjingbɛ mu zha shɛ ma sha mu ufwo. Mi zhɛ ma nama gana ata, maa mɛ shɛ ofwo na manɛ mi zhɛ mu na banɛ.

¹²I'wɛ'wɛ iyiri swoswoswo zhɛ na waŋna nu ukwoswo Urefu ata, iwɛ maa iyimɛyɛ bala. Ambɛ ibɛ zha shɛ a lụmba kwukwuŋ, i zha shɛ kaa ya ta ụhinjanụ tụ'walụ tu'wala o. I zhɛ na 'yaga tụ'walụ tu ufwo upiana upiana, iwɛnɛ tu uhwulwo na wɛ fwunjɛ tu waa banɛ no ohwolu tijilo wo zwogono iŋ meni. Tụ'walụ ti i'wɛ'wɛ ɛtɛ tɛ shɛ iwɛ iyimɛyɛ, ambɛ ibɛ a shɛ unibi na ɛɛ zhɛ na nɛnga atwa.

¹³AGWANGWAMA Mokondo hiɛŋ, Gana tugwungwu ta cɛnjɛ tu na aa shɛ o dwotwogonu alamụ miaụŋ mi Isrɛl umpwa-na-ba-eyebi tu namɛ na: ga ụlamụ Josɛf[141] leshiji eluji eyebi.

¹⁴N shileni la ogwunukwoshi hiŋ unu ta 'yajɛ ikɛnyi maa N zhɛ ma pana aŋ cɛnjɛ tu ga maa a 'yaga. Mizha dwotwogonu tu ma ta nangatangwụ.

¹⁵Tugwungwu ta tuba tụ ụzalụ tuzuba ti imɛ uwaŋna-banụ Itekwu ɛtɛ I'wɛtwɛ uuwa i ci ụshɛpwụ ata ụ'wụtụ ɛɛ hiɛŋ Hɛtlon, uuwa i ci Hamat-pas tutu i ci ụshɛpwụ ata ɛɛ hiɛŋ Zidad,[142]

¹⁶tutu imɛ ụshɛpwụ ata ɛɛ hiɛŋ Bɛrota keeni Sibraim (ata namɛ na ashashɛ tugwungwu ta cɛnjɛ ta atwa Damaskos na atwa Hamat).

¹⁷Tugwungwu ta ata tu tuzuba tu kwune ni itekwu ɛtɛ uwaŋna-banụ uuwa i ci ụshɛpwụ ata ɛɛ hiɛŋ, Haza-inon, uuwa imɛ tuzuba to tugwungwu ta atwa Damaskos na atwa Hamat.

¹⁸Tugwungwu tu uwaŋna-banụ tu kwune tuzuba ne eririri tugwungwu tu Damaskos nu Hauran, nu Urefu Jodan, apata shɛ tugwungwu ta cɛnjɛ ti Isrɛl geri bu uwaŋna-twonuo, na atwa Gilead a na namɛ nu uwaŋna-banụ, uuwa i ci Tama[143] ata namɛ ni Itekwu ɛtɛ Manɛ.

¹⁹Tugwungwu tu ụzalụ tuta ti imɛ geri bu uwaŋna-twonuo Tama uuwa i ci uwapa Kadɛsh, keeni tuta to tugwungwu ta atwa Ijipti uuwa i ci Itekwu ɛtɛ I'wɛtwɛ.

²⁰Itekwu ɛtɛ I'wɛtwɛ ibɛ shɛ tugwungwu tu ụzalụ bu uwaŋna-twonuo uuwa i ci tuzuba to ofwo ata ɛɛ hiɛŋ Hamat-pas.

²¹Bɛɛ hiɛŋ, Dwotwogonu ma cɛnjɛ tu ga nu gana na ta alamụ Isrɛl namɛ:

²²Tɛ shɛ me ti hiŋ unyizo-nom. Agaiŋ a na namɛ na ashashɛ hiŋ, a na du meci miaụŋ-me-eyi a shɛ du a 'yaga urobwo wa aba na aka na te ehi dwotwogonu tu. A shɛ a nda aŋ gana amamata Isrɛl, a shɛ a 'waŋ icɛcɛ na atwa Isrɛl maa du e leshiji cɛnjɛ ta aba.

²³Bugaiŋ be elele na jɛjɛ na ashashɛ hiŋ, bi zhɛ ba lashɛga cɛnjɛ tu bwa nụ ụlamụ ata baa jɛjɛ nu bwa. Gamba AGWANGWAMA Mokondo N dumwa.