Read bassa IZIKƐL 5 Bible Online

IZIKƐL 5 - bassa bible

IZIKƐL 5

¹Nazhɛ AGWANGWAMA hiɛŋ, Ɛ-yɛu bụtụ, shapa utokwobi na lacɛmɛ maa njɛ uŋ asuka u'nyanga maa waŋfwụnjɛ uhiuhiu bu, te tizholu tụ bụ hwɛɛ. Nazhɛ shapa bimenji bu ko maa dwotwogonu tihiŋzhe ta ata orubwo atatụ maa mengenji tu ta nangatangwụ.

²Aka na ụjita tuhweri tụ bụ ulwa hwuŋ, nazhɛ hwoŋzhingo urubwo uko na amɛ ụshɛpwụ ata ụ'wụtụ. Nazhɛ shapanana urubwo uyebi maa kekebi tu nu utokwobi bu no tupohondo tụ ụshɛpwụ ata. 'Waŋ urubwo utatụ maa mpiala na mo vwugo mu suji tu, N zhɛ mo hwucice utokwobi mu mo urugono tu nu usumwa.

³Waŋpana tihiŋzhe tu ko kwurɛ, fwulogo tu ni izhɛmi utogwo bu.

⁴Tala tụ kwurɛ sasana maa 'wɛŋ tụ nu ulwa, ge tu hwoŋni kwunduu. Ulwa ata tuba zhɛ wa zalanga uuwa wo botogwu nhwaŋ ma atwa Isrɛl hwɛɛ.

⁵AGWANGWAMA Mokondo hiɛŋ, Kwụba ma de Jɛrusalɛm, Gamba N shikicinji uŋ na ashashɛ edenji, nazhɛ a'una vwɛ hwɛɛ rungwutwonu uŋ.

⁶Ama atwa Jɛrusalɛm to tigezhe no onu mi tụpana, ɛɛ mɛmɛ bɛcinjɛ maa aba shɛ ogworozwo na hwuri edenji vwɛ, aa lacɛ unu mu tuhwaga uhwuri edenji na rungwotwonu aŋ. Atwa Jɛrusalɛm jineci onu mi tụpana, aa lacɛ maa a untangana andwa mi.

⁷Iwɛbɛ po ahiɛba atwa Jɛrusalɛm, shɛlaga ma n-ndumwa mu na Gamba na n shɛ AGWANGWAMA Mokondo jɛmɛ, N hiɛŋ. Iwɛnɛ ahiɛ njɛ shɛ iyi nɛ andwa mi hiɛŋ, kwo kaa tulaka tu na ahiɛ lacɛ maa hi untangana andwa mi, hiɛ shɛ atwa tigezhe uhwuri okwo edenji na ihi rungwutwonu, ahiɛ 'wa iyi yo ovwovwu edenji.

⁸Iwɛbɛ po Gamba na n shɛ AGWANGWAMA Mokondo mo hi mbiso maa N shɛ ya bụtụ bi i'ime hiŋ. N zhɛ kaa ma hi pana ulwapɛ na edenji kpaaŋ zhɛ a kwụba.

⁹N zhɛ ma pana atwa Jɛrusalɛm ulwapɛ na Ngee te peni shi aŋ la kwukwuŋ, iwɛ iyi-tupwaŋ nɛ ahia ndangana. N zha shɛ du kaa ma pana aŋ ya ulwapɛ gana ata kwukwuŋ.

¹⁰Iwɛ ulwapɛ ata kaa eshi zhɛ a kwụna miaụŋ ma aba me eyi maa a yɛ na ashashɛ hiŋ, miaụŋ du mi zhɛ ma kwụna eshi aba maa a yɛ. N zhɛ ma pana atwa elele na ta vwɛ ulwapɛ maa ma garataga aŋ no ovwugo.

¹¹AGWANGWAMA Mokondo hiɛŋ, Gana na tu Ngoo momo to, N zhɛ ma hi vwalaga uzawa inyɛmɛnyɛmɛ tihioko, iwɛnɛ te ehi heshigeni ohwolu mi tijilo ni iyi iwɛ keeni iyi-tupwaŋ nɛ ahia ndangana.

¹²Tudwonu ti hiŋ tu ko ti zhɛ to 'wo ni igwumɛgwumɛ iwɛ keeni imunɛ-tiya na amɛ ụshɛpwụ ga hiŋ ụ'wụtụ, ɛɛ zhɛ a kaba tudwonu ti hiŋ ti yebi no otokwobi no tupohondo tụ ụshɛpwụ; ɛɛ zhɛ a garataga tudwonu ti hiŋ tu tatụ maa uvwugo suji aŋ, aba tuba Ngɛɛ zhɛ me hwucice utokwobi mu mo urugono nu usumwa.

¹³Hi zhɛ hia hwuga-ụngwụ ni isɛbwɛ mi ti'ishijɛ uuwa i ci aka na yɛɛ zhɛ ma n gwumwa. Aka na ti ijɛ njɛ hwuŋ hwɛɛ, nazhɛ ɛhi zhɛ hia mapa maa, Gamba AGWANGWAMA N jɛmɛ ga n-ndumwa ne hiŋ, iwɛnɛ ta amɛ mi hashɛganụ iwɛnɛ ta ahiɛ shɛ shɛ atwa tɛcara.

¹⁴Shɛ inɛ ɛtɛ kiri o, N zhɛ ma hi nda osombo keeni iyi tutwa na amɛ edenji elele na ihi rungwutwonu keeni ne eshe atwa elele na a kashɛka, ɛ zhɛ mo hi sumono.

¹⁵Aka na amɛ mi hashɛganụ, ta Ama nda isɛbwɛ ne hiŋ, Ngee hi peni ulwapɛ, inyɛsɛ zhɛ ya sha edenji na ihi rungwutwonu. Ɛ zhɛ ma hi ngbaraka fwufwurɛnjɛ, ɛ zhɛ no hi holono, a na hi nda asada.

¹⁶N zhɛ ma nda maa kede hi no gwushigo ya iyimɛyɛ tiya kwukwuŋ, Ngɛɛ zhɛ ma hi ta a'inla[16] imunɛ-tiya, keeni a na ti'iricingo, imunɛ ɛtɛ zhɛ ma hi gwuma uuwa i ci aka na ehi ileni.

¹⁷N zhɛ ma karɛ imunɛ-tiya, Ma tumwanɛ du isundɛ mazhanga maa i kwụnɛ miaụŋ mi hiŋ, Ngɛɛ zhɛ du kaa ma tumwanɛ igwumɛgwumɛ iwɛ, ta abwagara, tu ujasa maa a hiɛ kwụnɛ no otokwobi. Gamba AGWANGWAMA N dumwa.