Read bassa IZIKƐL 7 Bible Online

IZIKƐL 7 - bassa bible

IZIKƐL 7

¹AGWANGWAMA jɛmɛ n-ndumwa ne mi, bɛɛ hiɛŋ.

²Ɛ-yɛu bụtụ, Gamba AGWANGWAMA Mokondo, Mo mbiso cɛnjɛ tu ga ti Isrɛl, Ngɛɛ hiɛŋ, Ukwunanga! Ukwunanga cɛnjɛ tu ga hwɛ hwɛɛ u ci ya!

³Gabụ ge Isrɛl, ukwunanga bụ u ci ya. Bi zhɛ ba hwuga-ụngwụ isɛbwɛ mi, iwɛnɛ ti Ngɛɛ zhɛ ma duma ụshɛrɛya bụ iwɛ iyi nɛ abɛ njɛ. N zhɛ ma bu pana ulwapɛ iwɛ tupwaŋ tu na abu ndanjɛ kpaaŋ.

⁴N zha shɛ ma bu haba o, N zha shɛ du kaa mo hioko inyɛmɛnyɛmɛ bu o. N zhɛ ma bu pana ulwapɛ iwɛ ihwɛŋnɛ nɛ abu ndanjɛ iyi keeni iwɛ iyi-tupwaŋ ye elele nɛ abɛ njɛ, iwɛ maa mepi maa Gamba n shɛ AGWANGWAMA.

⁵Iyi AGWANGWAMA Mokondo jɛmɛ na: bi hiɛŋ, Abara-ne-ebe na zhɛ mo bu jitono zhɛ mama 'wanụ!

⁶Ukwunanga ci ya! Ukwunanga ci ya! U ishijɛ maa ubu sukakanɛ. Bɛ njɛ ufwu.

⁷Inee hiŋ ahiɛba na hiɛ namɛ na cɛnjɛ tu ga petenji ya. Aka ci ya, ụjita ata gwumwongonu ya, ta tụlagwụ tu unyasa tubwada te elele tɛ zha shɛ ta nama ya na shɛrugbada sha ata shɛ namɛ nu nshama o, semi iyi kiri zhɛ yo sukwutwogonu atwa.

⁸Aka Gwumwongonu ya tɛ ɛhi zhɛ hia hwuga-ụngwụ ni isɛbwɛ mi. N zhɛ ma duma ụshɛrɛya hiŋ ni iyi nɛ ahiɛ njɛ, Ngɛɛ zhɛ kaa ma hi pana ulwapɛ iwɛ iyi-tupwaŋ nɛ ahiɛ njɛ kpaaŋ.

⁹N zha shɛ ma hi haba o, N zha shɛ kaa mo hioko inyɛmɛnyɛmɛ hiŋ o. N zhɛ ma hi pana ulwapɛ iwɛ iyi-tupwaŋ nɛ ahiɛ njɛ na ashashɛ hiŋ, iwɛ maa hi mepi maa Gamba n shɛ AGWANGWAMA ata na ihi peni ulwapɛ.

¹⁰Ụjita na ufwu ata tɛnda zhɛ wo jitono atwa Isrɛl we ci ba. Tumama sata ti zhɛ ta nda tusumbo.[18] Tubusa ti zhɛ ta mata.

¹¹Abwagara waŋnɛ aa shɛ bukwuto na zhɛ ba pana tugworozwo ulwapɛ. I zasa iyi elele zhɛ ya vwana aŋ na amɛ ibɛ o, tu uduciya wa aba hwɛɛ, tu urishi wa aba, tụ ụjɛrụma wa aba hwɛɛ.

¹²Aka e ci ba, ụjita ata kaa gwumwongonu, kede atwa na a sa iyi bweji unyasa, kede atwa na a sanga kaa du o to-ụkwụla o, iwɛnɛ ti isɛbwɛ ya Agwatana zhɛ ya ima bụtụ be elele.

¹³I zasa bihinya zhɛ ba ya uraiŋ na waŋnɛ maa gwushigonono iyi nɛ ndanɛ bu ufwu o, iwɛnɛ ta Agwatana 'yajɛ isɛbwɛ na bụtụ be elele. Atwa na shɛ atwa awɛ zha shɛ a banangana o.

¹⁴Ɛ zhɛ a 'nyamana utiitidi ujasa, nazhɛ bụtụ be elele zhɛ mama ima. Ama i zasa kaa bụtụ be elele beni maa zha ujasa o, iwɛnɛ ta Agwatana 'yajɛ isɛbwɛ na bụtụ be elele.

¹⁵Otokwobi mburusonu no tupohondo tụ ụshɛpwụ, igwumɛgwumɛ iwɛ keeni imunɛ-tiya tuba mburusonu na amɛ ụshɛpwụ. Bụtụ be elele na beni nu u'una ata, ɛ zhɛ a kwụna bụ nu utokwobi ata, bụtụ be elele kaa jɛjɛ na amɛ ụshɛpwụ, bi zhɛ bo 'wo tu'wo ti igwumɛgwumɛ ɛtɛ iwɛ keeni imunɛ-tiya.

¹⁶Atwa elele a na benengeni a na ta vwɛ, ɛ zhɛ o gozhogo nu nshama gana nkwucimo mu na iyi bwajɛ no olomu. Hwɛɛ aba zhɛ a ta-ụkwụla[19] iwɛ iwɛwɛ ya aba.

¹⁷I'ɛlɛ bụtụ be elele zhɛ yo lwogo, olulo aba zhɛ na nda rekpe rekpe gana meni.

¹⁸Ɛ zhɛ o urogogono tugwuno tụ ụcɛnjɛ tɛnda a na zhɛgɛdaga hwɛɛ aba. Ɛ zhɛ a waŋfwunga ohiuhiu aba tukpala, ụpụrụsa zhɛ wa ima aŋ hwɛɛ aba.

¹⁹Ɛ zhɛ o sugo azụrụfa na azhɛnarɛya aba a 'waŋ ni ihwɛŋnɛ ya amɛ ụshɛpwụ gana aswala, iwɛnɛ ta azụrụfa na azhɛnarɛya ata eri shi o bicingo aŋ na aka na AGWANGWAMA zhɛ e duduje isɛbwɛ ibwɛ. E eri shi kaa o sugo aŋ maa e gwushiji iyi nɛ kwụlanɛ aŋ kwo kaa maa a yɛ iyi nɛ zhɛ ye shigogo aŋ o. Azhɛnarɛya na azụrụfa ata, aba eni aŋ iwɛwɛ tɛnda.

²⁰A busa la iwɛ i'wɛŋnɛ ya aba i tisemberi nɛ pilanụ, ama ibɛ ee suji ya aa njɛ ntatanuwaŋ mu tupwaŋ. Iwɛbɛ po AGWANGWAMA njɛ maa ga uduciya ata wa aba shanɛ aŋ iyi nɛ zasa shɛshɛshɛ.

²¹AGWANGWAMA hiɛŋ, N zhɛ ma nda maa agaiŋ leshiji aŋ iyi ni iji, ogworozwo aba tuba zhɛ o sugo aduciya wa aba hwɛɛ a nda ufwa ujasa, maa e heshigeni iŋ hwɛɛ.

²²N zha shɛ me teni kwukwuŋ aka na ta a hashɛgana uduciya umwono[20] mu, ibɛ shɛ aka na ta ashɛrɛ bweji uŋ ee teni maa e heshigeni uŋ.

²³Sutono shigbo,[21] iwɛnɛ te mehieŋ tududwogo mu barɛ na cɛnjɛ tu ga, abwagara kaa barɛ na ashɛpwụ.

²⁴N zhɛ me suje edenji a na wumanjɛ no tugworozwo tɛnda maa e leshiji nhwaŋ mi hiŋ. Aka na Ngee leni maa edenji heshigeni ofwo na ahia nda tɛzhɛba, ibɛ po atwa hiŋ a na ga 'yajɛ ukpahiŋ uhwuri atwa vwɛ zhɛ a vwunga ya ohwulu ti'inso.

²⁵Inyɛsɛ tɛ ye ci. Hi zhɛ hia jalakaka amɛ-olom ama hi zha shɛ kaa hia kwụba aŋ o.

²⁶Abara-ne-ebe a na zhɛ na hi nda, zhɛ na mama 'wanụ, unabarɛ iyi iwɛ zhɛ no rungo aka elele. Hi zhɛ hi na lụpa egesere maa e hi kepishingeni iyi nɛ ye ci geri-be-eshe nɛ aa kwụbɛ. Onongbo zha shɛ a 'yaga ya undwa we elele maa e mbisegeni atwa o, okwo n-nyarɛ mi zha shɛ ma 'yaga ya ahaŋsa maa e peni atwa o.

²⁷Agwuma zhɛ a ta-ụkwụla, miaụŋ-ma-tugwama mi zhɛ ma vwunga ashɛlatụ, nazhɛ inyɛsɛ zhɛ ya sha atwa, ɛɛ zhɛ na zhɛgɛdaga. N zhɛ ma hi pana ulwapɛ iwɛ iyi nɛ ahiɛ njɛ hwɛɛ. N zhɛ ma duma ụshɛrɛya hiŋ te teni cɛŋ nu gana na ahiɛ jɛmɛ ashɛrɛya atwa hiŋ. Inɛ gɛ zhɛ mo hi mbisono maa Gamba n shɛ AGWANGWAMA.