Read bassa IZIKƐL 8 Bible Online

IZIKƐL 8 - bassa bible

IZIKƐL 8

¹Aka na ta a tɛ 'imɛ, yaa namɛ shiywa shi cihiŋ ni ipiɛnɛ icihiŋ, ni ijitɛ itɛ, Ngaa jɛjɛ nu umwono mu, n-nyarɛ mu Juda mɛ jɛjɛ na agba mi. Eshigiri ukpahiŋ u'ala wa AGWANGWAMA Mokondo zhajɛ pi mi.

²Ngee shepi eshe na azuba Ngaa kwụbɛ iyi ike nɛ sụbɛ butugwumwa.[22] Tu'waba tu bwa tɛ shɛ gana ulwa te kwune ne embi zwe. Te kwuni ne embi ubwa munji, ba ta ngere ngere gana utumburɛ na aa nyashɛnjɛ shɛshɛshɛ.

³Bɛɛ ndɛrishinjɛ iyi ike i shɛ gana u'ala, baa 'imɛ tihiŋzhe ti mi. Nazhɛ Mpiala ma Agwatana mi n shepi na azuba mee n shire nu Jɛrusalɛm no ozobu ata. Bee n shepi taa na amɛ odubo umwono wa Agwatana na namɛ tuzuba no ofwo na ntatanuwaŋ mu na Agwatana a nda isɛbwɛngwɛ muba mu namɛ.

⁴Apata Ngaa kwụbɛ ụjɛrụma na wa ta, wee mbiseni maa Agwatana Isrɛl namba apata, gana na tu Ngaa kwụbɛ la no ozobu tu Ngaa namɛ nu udadarɛ Urefu Kiba.

⁵Agwatana n hiɛŋ, Ɛ-yɛu bụtụ, mbiyana tuzuba. Ngaa mbiyanɛ ga, Ngaa kwụbɛ ntatanuwaŋ ma ata Agwatana jeri shi ti mee shikeni nu utukwu-ụrụpɛ ata namɛ no odubo.

⁶Agwatana n hiɛŋ, Ɛ-yɛu bụtụ, bụ kwụbɛ iyi nɛ aa nda kaa? Kwụba iyi-tupwaŋ nɛ atwa Isrɛl a nda epe, to o mo n unzo maa ma dụlụma no ohwolu mi tijilo. Bi tɛ zhɛ kaa ba kwụba waa iyi-tupwaŋ nɛ uhwuri inɛ gɛ.

⁷Bee n shepi no ofwo odubo ukpogwu, bee m mbiseni u'ibwa uko na namɛ nu ụdatụ u tuma.

⁸Bɛɛ n hiɛŋ, Ɛ-yɛu bụtụ, iba ụdatụ ga epe, Ngaa 'yɛbɛ uŋ ga, Ngaa kwụbɛ apata odubo oko.

⁹Bɛɛ n hiɛŋ, Tono maa kwụbɛ iyi tugworozwo keeni iyi-tupwaŋ nɛ aa nda epe.

¹⁰Ngee teni ga Ngaa kwụbɛ. Ụdatụ ata hwɛɛ bwa 'yajɛ ofwoto iyi nɛ yo hombilo kpaaŋ keeni isundɛ ehilo nɛ ya sha bụtụ inyizhi,[23] keeni ntatanuwaŋ mu na atwa Isrɛl a zhɛba.

¹¹N-nyarɛ mi Isrɛl mu na mu namɛ apata mɛ shɛ atwa dupu-nu-woshi (70), tu ge Jeazania yɛu-ye-eyi Shafan. Hwɛɛ aba 'wananjɛ ejejebi iturɛre tuhwoŋzhingo, ibɛ nshikwo mi iturɛre ɛtɛ mu munji na azuba tututu.

¹²Nazhɛ Agwatana n heŋteni, bɛɛ hiɛŋ, Ɛ-yɛu bụtụ, bụ kwụbɛ ka iyi nɛ n-nyarɛ mi ihwɛ Isrɛl ma nda ne tusweci? Hwɛɛ aba namɛ na tɛzhɛba nu umwono na ntatanuwaŋ mi shini. Uswejinu na aa untanganɛ ụ shɛ, ɛ hiɛŋ, AGWANGWAMA jineci u'una ga! Bụ tụ kwụbɛ shɛ du kaa o.

¹³Nazhɛ AGWANGWAMA n hiɛŋ sasana, Bi tɛ zhɛ ba kwụba ta a nda iyi nɛ shɛ iyi-tupwaŋ nɛ uhwuri inɛ ɛtɛ.

¹⁴Bee n shepi no odubo ata namɛ tuzuba tu umwono ata wa Agwatana, bee m mbiseni eyikwo na a tana uzhɛba na ɛɛ hiɛŋ Tamuz ụkwụla.[24]

¹⁵Bee n heŋteni, bɛɛ hiɛŋ, Oo ɛ-yɛu bụtụ, bụ kwụbɛ ijɛ ɛtɛ hŋ? Bi tɛ zhɛ ba kwụba iyi-tupwaŋ nɛ te hwuri inɛ gɛ.

¹⁶Bee n shepi nu ukpogwu wa amɛ umwono ata wa Agwatana to dongonu odubo ohwolu tijilo, etwenyi na ufwugwo wa aba ụ shɛ gana atwa woshi-na-atwa-a-ta namɛ na ashashɛ utukwu-ụrụpɛ no ohwolu tudulo na namɛ apata. Hwɛɛ aba panɛ umwono ata wa AGWANGWAMA aba aa ngbaracɛ uwaŋna-banụ oo kwuzongo, aa zhɛba uwaŋna na wa banɛ.

¹⁷Bee n heŋteni, bɛɛ hiɛŋ, Oo ɛ-yɛu bụtụ, bụ kwụbɛ ijɛ ɛtɛ hŋ? Iyi-tupwaŋ nɛ atwa ihwɛ Juda a nda i ta gwumwa sụ aŋ keeni abwagara na oo mburusonu nu u'una ga o. Ibɛ po aa zhajɛ maa a njɛ iŋ nu umwono ga wa Agwatana tugwo, maa e n keeni isɛbwɛ ti'ishicinjɛ. Kwụba gana na ta a ma n twagaga nu uhwaŋna na oto-ụrụpɛ a nda iyi![25]

¹⁸Ɛ zhɛ a hwuga-ụngwụ ni isɛbwɛ mi. N zha shɛ ma haba aŋ o, N zha shɛ kaa mo hioko inyɛmɛnyɛmɛ ya aba o. Ɛ zhɛ na ma uganana gana elele na ee eri, ama N zha shɛ kaa ma shɛlagana aŋ o.