Read bassa IZIKƐL 9 Bible Online

IZIKƐL 9 - bassa bible

IZIKƐL 9

¹Ngaa hwụjɛ ta Agwatana keri ụhiɛŋshɛ taawụụ, bɛɛ hiɛŋ, Suyanɛ ma a'yacɛ ata zhɛ a pana ụshɛpwụ ga ụ'wụtụ ulwapɛ. 'Waŋnɛ ma i'wɛŋnɛ hiŋ ujasa te ehie ci.

²Gwunu ata Ngaa kwụbɛ te etwenyi ecihiŋ banɛ no odubo ata tupohondo tu umwono wa Agwatana a na namɛ tuzuba, bụtụ bụtụ 'waŋnɛ i'waŋnɛ ibwɛ ujasa ikwunɛ nu u'ala ubwa. Bụtụ bu ko namba na amɛ aba urigeni tugwuno tu ko ti ilinɛn, baa 'waŋnɛ ikeke meni mi ti'nyeci nu u'ala ubwa. Ee teni hwɛɛ aba, ee shikekeni to dongonu utukwu-ụrụpɛ utumburɛ.

³Nazhɛ ezezeji ụjɛrụma wa Agwatana Isrɛl pashɛngwa na azuba iyi-uumwa ɛtɛ 'yajɛ apiambɛ, no ofwo ata yaa ga namɛ,[26] yaa zhajɛ no odubo umwono ata wa Agwatana. AGWANGWAMA suyanɛ bụtụ ata urigeni tugwuno ti ilinɛn, ata 'waŋnɛ ikeke meni mi ti'nyeci nu u'ala ubwa.

⁴Bɛɛ hiɛŋ bụ, Zhaga tonongo Jɛrusalɛm hwɛɛ maa njɛ atwa elele na yaa gwumanɛ a na du kaa a twa-u'wo iwɛ iyi-tupwaŋ nɛ aa ndanjɛ nu ụshɛpwụ ga useyida ni itune.

⁵Ngaa hwụjɛ ta Agwatana hiɛŋ atwa ata vwɛ, 'Wa bụ ma hi tenenji ụshɛpwụ ga, maa hiɛ kwụnɛ ikwunɛ. Ta haba ma bụtụ be elele o, to hioko ma du kaa inyɛmɛnyɛmɛ bụtụ be elele o.

⁶Kwụna ma tu n-nyarɛ, te esemberi, to showo, to ono miaụŋ hwɛɛ, ta miaụŋ, ama to tumongono ma bụtụ be elele na aa njɛ useyida ni itune ibwɛ o. Kwuno ma nu umwono ga mu. Ee kwuni ga nu n-nyarɛ mu na mi shikekeni nu umwono ata wa Agwatana.

⁷Agwatana hiɛŋ aŋ, Hashɛgana ma umwono ga mu. Go n'wo mi leshegeji ukpogwu ubwa. Kwuno ma ya ugondu ata![27] Ee kwuni ga atwa tụkwụna[28] nụ ụshɛpwụ ata.

⁸Aka na ta atwa ata a nda ikwunɛ ya aba, Ngee shikeni ya Ngooko, Ngoo momo po na cɛnjɛ, Ngee ubi ụpɛshɛka mu na cɛnjɛ, Ngaa uganɛ, Ngɛɛ hiɛŋ, AGWANGWAMA Mokondo, gana ga suu isɛbwɛ nɛ abu 'yajɛ nu Jɛrusalɛm i ci? Bi zhɛ bo hwuwo suu ya atwa na namɛ ni Isrɛl tụkwụna hwɛɛ?

⁹Agwatana jishijɛ, bɛɛ hiɛŋ, n-ndumwa mụ wụmɛ atwa Isrɛl keeni atwa Juda iwɛ iwɛwɛ i'wɛtwɛ 'wɛtwɛ nɛ aa njɛ. E hwuwi atwa tụkwụna no ofwo elele, aba kaa shɛ atwa na a bwada-undwa. Ɛ hiɛŋ, Gamba na n shɛ AGWANGWAMA n jineci u'una wa aba, asha N kwụbɛ shɛ aŋ ya o.

¹⁰N zha shɛ kwukwuŋ mo hioko inyɛmɛnyɛmɛ ya aba; N zhɛ ma nda aŋ te teni cɛŋ ni iyi nɛ aa njɛ atwa vwɛ aba.

¹¹Nazhɛ bụtụ ata urigeni tugwuno ta ata ti ilinɛn gwure bee mbishi AGWANGWAMA, bɛɛ hiɛŋ, N nduwa iyi nɛ ebi m peni-unu maa ma nda.