Read bassa DANIƐL 1 Bible Online

DANIƐL 1 - bassa bible

DANIƐL 1

¹Ti ge Jehoiyakim yɛ tugwama tu Juda, yaa namɛ shiywa shɛ tatụ, nazhɛ gɛ Nɛbukadnɛza agwuma Babulon[1] zhe bee hweri Jɛrusalɛm baa sukakanɛ uŋ nu ujasa.

²AGWANGWAMA kaa leni maa ga ala Jɛhoiyakim agwuma Juda, bee suji emeseyi iyi uhwugwa umwono wa Agwatana. Bee suji du atwa oko a na baa 'imɛ bee zhe bee zweni aŋ ni isume tuwa tu bwa nu Babulon. Bee suji iyi uhwugwa ɛtɛ bee zweni iŋ nu umwono na boo zwono i'wɛŋnɛ tuwa tu bwa.

³Nazhɛ agwuma peni Ashpɛnaz, na shɛ uhiu wa atwa shihwolu unu, bɛɛ hiɛŋ, Zanjɛ ma emeseyi miaụŋ mi Isrɛl a na shɛ miaụŋ mu tugwama keeni atwa na 'yajɛ nzeci na ashashɛ amwamwa aba.

⁴Ga a shɛ esemberi a na zasa tụsụnyasụ, a na tu'waba ta aba tu namɛ gbele gbele, a na shɛ egwoni ugondu i'ɛlɛ swoswoswo, a na mepi iyi, a na kaa 'yebi iyi tuswoswoswo tɛndangana. Ga a shɛ atwa na waŋnɛ tishikono nu umwamwa wa agwuma du. Ga ga Ashpɛnaz mbisegeni aŋ tɛrɛta keeni ti'nyata ta rɛjɛmɛ ra atwa Babulon.

⁵Ibɛ po agwuma sekekeni aŋ iyimɛyɛ tugwama keeni meni mụ ụlatụ mu na i shɛ maa a na pana aŋ iyi-heri, inɛɛ nɛ banɛ nu uteburu wa agwuma. Ge e mbisegeni aŋ iyi shiywa shɛ tatụ, na aba shiywa sha ata shɛ tatụ nazhɛ ga a zhajɛ o shikono ya na agba agwuma.

⁶Ga Daniɛl, na Hanania, nɛ Mishaɛl keeni Azaria a na shɛ ụlamụ Juda zweni na ashashɛ atwa ga ee teri.

⁷Uhiu ata wa atwa shihwolu pegeni aŋ nzeci mu ufwo. Bu po Daniɛl ti gɛ Bɛltɛshaza,[2] boo po Hanania ti gɛ Shɛdrak, boo po Mishaɛl ti gɛ Mishak, boo po Azaria ti ga Abɛdnigo.

⁸Ama ga Daniɛl njɛ ahaŋsa ubwa oko maa ubwa zha shɛ mama hashɛgana ni iyimɛyɛ tugwama keeni meni mụ tụ'walụ ta afwafwa tuswa o. Iwɛbɛ po baa lụpɛ uhiu ata wa atwa shihwolu maa kede mama hashɛgana o.

⁹Agwatana kaa leni maa gɛ iwɛ Daniɛl kwụlanɛ Ashpɛnaz maa go hioko inyɛmɛnyɛmɛ ibwɛ.

¹⁰Ga Ashpɛnaz hiɛŋ Daniɛl, Ma nda inyɛsɛ ya agwuma na shɛ agwuma-ihwɛ mi. Ubwa imanganjɛ iyimɛyɛ keeni meni mi hiŋ, yaa shɛ baa hiɛ kwụbɛ ta ahiɛ 'nyanganɛ, ahiɛ zhɛshɛ tu'waba gana esemberi a na shɛ asara hiŋ, nekeshi bi zhɛ ma n kwụna.

¹¹Ga Daniɛl zhegeni ivwɛlɛ ɛtɛ i shɛ uhiu ihwɛ nɛ ga Ashpɛnaz teri maa bu na ngbaraka Daniɛl, na Hanania, nɛ Mishaɛl keeni Azaria,

¹²bɛɛ hiɛŋ bụ, Sukwu, manga miaụŋ mu ga bụ mu ugondu ijitɛ umpwa, maa ga a na tu panɛ abuba kwakwa maa tu na ya, keeni meni mo ohondo maa tu na swa.

¹³Nazhɛ yeleji apɛshɛka tu na apɛshɛka esemberi a na a ya iyimɛyɛ tugwama nu umbe bu, maa tuba na tu ndana gana na abụ kwụbɛ ta miaụŋ mu ga bụ mu ugondu mɛ shɛ ne eshe bu.

¹⁴Ibɛ po bungbaracɛ ata leni ga maa manga aŋ ijitɛ ɛtɛ umpwa.

¹⁵Aka na ti ijitɛ ɛtɛ umpwa ulwa, a 'yajɛ ulapiya, ee keeni du tinyomongo ee hwuri esemberi elele na a ya iyimɛyɛ tugwama.

¹⁶Te kwuni na aka ata ibɛ po bụtụ ata ba ngbaraka aŋ suji iyimɛyɛ ebe tugwama keeni meni mụ tụ'walụ ta afwafwa, baa pana aŋ ya abuba kiri.

¹⁷Agwatana kaa peni esemberi ata eneshi iyi-tumapa, ne ti'eshicigo keeni i'nyɛtɛ iyi elele nɛ oo soso. Ga Daniɛl kaa mepi shizobu keeni awalabụ elele tụdụma.

¹⁸Ta shiywa sha ata shɛ tatụ shɛ na agwuma ge dweji aŋ shɛ ulwa, nazhɛ uhiu wa atwa shihwolu tecinji aŋ na agba Nɛbukadnɛza.

¹⁹Ta agwuma dumanjɛ ushaura na aba hwɛɛ; bụ kwụbɛ shɛ kwukwuŋ bụtụ be elele na ashashɛ aba na shɛ usara Daniɛl, na Hanania, nɛ Mishaɛl, keeni Azaria o. Iwɛbɛ po ee teni nu ugondu tɛnda na agba agwuma.

²⁰Iyi elele nɛ agwuma heŋtengeni aŋ, bụ kwụbɛ maa ti'inta keeni ti'eshicigo ta aba tu hwuri anjɛ-tishino keeni awa-inibi elele na namɛ na cɛnjɛ tu bwa karɛ umpwa.

²¹Ga Daniɛl namɛ apata uuwa i ci uywa uhiiŋ na ga Sairos bụtụ ata bi Pesia yɛ tugwama.