Read bassa DANIƐL 11 Bible Online

DANIƐL 11 - bassa bible

DANIƐL 11

¹Nu uywa ata uhiiŋ ga Darius Bumidia ata yɛ tugwuma, ibɛ Ngee shikeni maa mo shikicingo bu dimi maa ma ta bụ ikɛnyi.

²Hwuwayɛ go, N zhɛ mo bu mbiso iwɛ-tɛkana iwɛ shɛgwuma shi nya shɛ tatụ shɛ na shi zhɛ shɛ ishijɛ ni Pɛsia. Bu na bi neshi na zhɛ bɛ ishijɛ ba 'wa aŋ, zhɛ ba sha bɛzhɛgba uhwuri aŋ hwɛɛ. Aka na tu baa kaana ikɛnyi ti'yaga keeni bɛzhɛgba tisha, bi zhɛ bo vwundotongo aŋ maa sukakana cɛnjɛ-ta-tugwama te Egrik.

³Nazhɛ agwuma na 'yajɛ ikɛnyi duwa zhɛ ishijɛ maa untangana ofwo nu ụhwada na 'yajɛ ukpahiŋ duwa. Bi zhɛ kaa na nda iyi elele nɛ kwụlanɛ bụ.

⁴Aka na ti bɛɛ ishijɛ nu ukpahiŋ ata ubwa ụ'wụtụ, cɛnjɛ-ta-tugwama tu bwa kaa ti zhɛ ta bwadụ, ɛ zhɛ o dwotwogonu tu apadụ eneshi. Shɛ nu ụhwada ubwa kaa ɛɛ zhɛ o dwotwogonu tu o, ti zha shɛ kaa to tomo ajalalo ubwa o. Iwɛnɛ po ɛ zhɛ o mushingo ụhwada cɛnjɛ-ta-tugwama tu bwa hwɛ hwɛɛ a pana anya atwa a na dongonu bu.

⁵Nazhɛ agwuma tuta zhɛ a 'yaga ikɛnyi; ama tuba agwuma oko na ashashɛ shɛgwuma shɛ bwa zhɛ a 'yaga ikɛnyi duwa uhwuri bu. Ụhwada ubwa kaa du zhɛ wa 'yaga ikɛnyi tebiye.

⁶Na aba na ta shiywa shɛ mbana shi henici, agwuma tuta zhɛ ba twa-unu na agwuma tuzuba, bɛɛ zhɛ ba pana bụ yɛu ibwɛ yo o maa zana. Ama unu ata wa aba tutwa kaa zha shɛ wo ilogogo, ɛ zhɛ a kwụna te biyikwo ata, to bwolo bwa, ti yɛu ibwɛ,[20] ta miaụŋ mu bwa mu ugondu mu na mu ga zhagajɛ nu bwa.

⁷Na aba ibɛ na aka fwalaa, bụtụ bu ko zhɛ ba banɛ nu umwamwa biyikwo ata[21] maa ya tugwama. Nazhɛ bɛɛ zhɛ ba sukakana ejeshi agwuma tuzuba. Bi zhɛ bo tono ikepi ya aba, bi zhɛ kaa ba lasụ aŋ.

⁸Bi zhɛ bo sugonono ntatanuwaŋ ma tuwa ta aba keeni i'wɛŋni'wɛŋni ya azụrụfa keeni inɛɛ nɛ aa njɛ na azhɛnarɛya inɛɛ nɛ ee ge tileneni tuwa ta ata, ba zha ni Ijipti. Na aba shiywa shɛ mbana, bi zhɛ ba ganga agwuma ata tuzuba bwooko.

⁹Nazhɛ agwuma tuzuba zhɛ ba zha ba tafwulaga agwuma tuta; ama tuba ɛ zhɛ a nda bu ni iji maa gwulo na cɛnjɛ tu bwa.

¹⁰Miaụŋ-me-eyi ma agwuma tuzuba mi zhɛ ma imanga i'wɛŋnɛ iwɛ ujasa, ɛɛ zhɛ o sotulonu ejeshi na gembi ufwugwo tebiye. Bụtụ bu ko na ashashɛ aba zhɛ bo sulo vwuuŋ gana na meni ma zhagajɛ ba sukana ejeshi atwa i'ime ya aba tutu ikepi ya aba.

¹¹Nazhɛ agwuma tuta zhɛ bɛ ishijɛ ni isɛbwɛ, bɛɛ zhɛ ba sukakana ejeshi agwuma tuzuba nu ujasa, okwo te e gembi ufwugwo duwa, bi zhɛ kaa bo sugo aŋ.

¹²Aka na bee suji ejeshi ata, nazhɛ agwuma ata tuta zhɛ momo mungicingo, bɛɛ zhɛ kaa ba kwụna atwa igbɛɛ ifwugwo. Ama okwo ti yaa shɛ bwonu, bi zha shɛ kaa ba 'yaga ukpahiŋ ata ubwa maa bu na lasatagwụ atwa tutu o.

¹³Iwɛnɛ po agwuma tuzuba zhɛ bo gwulo bo sotulonu ejeshi anya anaa na gembi ufwugwo uhwuri a na ala ihiiŋ. Aka na ta aka ci, bi zhɛ be suje ejeshi na 'yajɛ i'wɛŋnɛ ujasa nɛ gembi tebiye.

¹⁴Atwa ofwugwo zhɛ a tana agwuma tuta tigezhe na aka ata. Atwa na shɛ atwa abwagara na ashashɛ atwa bu ikɛnyi bu, ɛ zhɛ a ta du tigezhe, iwɛ maa a ụrɛcɛnjɛ ozobu ga; ama tuba ɛ zhɛ kaa o kwu.

¹⁵Nazhɛ agwuma tuzuba zhɛ ba hwala ụshɛpwụ wa aba na 'yajɛ ikepi, bi zhɛ kaa ba lashɛga uŋ. Ejeshi agwuma tuta zha shɛ a 'yaga ya ikɛnyi maa o shikono.

¹⁶Ama bụtụ ata bu tuzuba na zhɛ ba zhajɛ, zhɛ ba nda aŋ gana na kwụlanɛ bụ, i zasa kaa bụtụ be elele na zhɛ ba kapana bụ uhwaŋna o. Bi zhɛ kaa bo shikono na Cɛnjɛ ta ata tu Pilanụ,[22] maa 'yaga tụ hwɛ hwɛɛ nu ukpahiŋ ubwa. Maa nda tụ ufwu nu ukpahiŋ ubwa.

¹⁷Agwuma ata tuzuba zhɛ ba imanga maa zhajɛ ne ejeshi cɛnjɛ-ta-tugwama tu bwa hwɛɛ. Nazhɛ bɛɛ zhɛ ba twa-unu nu bwa, maa pana bụ yɛu ibwɛ yo o maa zana iwɛ maa tuba iricingo ejeshi cɛnjɛ-ta-tugwama tu bwa. Ti'imanganga ta ata tu bwa kaa ti zha shɛ ta 'yagana bụ eshe o.

¹⁸Na aba ibɛ bi zhɛ ba sukakana atwa na namɛ nụ ụpalanụ Urefu, bɛɛ zhɛ kaa ba lasụ atwa aba ofwugwo. Ama uberezhe uko zhɛ wa banɛ na cɛnjɛ ti nya na zhɛ ba lasụ bụ; maa kapana bụ abwagara tɛnda. Iwɛ-tɛkana, bi zhɛ bo gwuricingono agwuma tuzuba abwagara ubwa nu uhiuhiu ubwa ukɛnyi ibwɛ.

¹⁹Nazhɛ agwuma ata zhɛ bo gwulo na cɛnjɛ tu bwa ti ikɛnyi ibwɛ tu na ti 'yajɛ ikepi, ama ɛ zhɛ kaa a lasụ bụ. Apata tuba zhɛ a sha ya ukwunanga ubwa.

²⁰Nazhɛ agwuma anya zhɛ bɛ ishijɛ nu urubwo ubwa, na zhɛ ba tumwana ele-ụdalụ a na 'yajɛ ukpahiŋ, iwɛ maa tuba uduciya cɛnjɛ-ta-tugwama tu bwa keeni ugombo. Ama na amɛ ijitɛ imbɛnɛ, ɛ zhɛ a kwụna agwuma ata, shɛ ni isɛbwɛ, shɛ nu ujasa kaa o.

²¹Bɛɛ hiɛŋ, Agwuma anya u tuzuba na shɛ bụtụ bụ wɛ, na kaa ge teni shi cɛŋ maa sha agwuma zhɛ bɛ ishijɛ. Bi zhɛ ba zhajɛ, bi zha shɛ kaa bo mbiso aŋ o, ibɛ bɛɛ zhɛ ba lashɛga cɛnjɛ ta ata nu unu ubwa ụlatụ.

²²Ubwa bo iricingo ejeshi elele nu umbe ubwa, maa bwarataga aŋ keeni uhiu wo onongbo Agwatana.

²³Na aba na ta a twa-unu nu bwa, nazhɛ bɛɛ zhɛ bo kwuno ugondu ubwa u tuhalakaka tɛnda. Iwɛnɛ po bi zhɛ na kaana ukpahiŋ ti'yaga na atwa na twa sụ ufwugwo.

²⁴Aka na te ekpeleshi cɛnjɛ tu na tɛ shɛ azhɛgba uhwuri a na vwɛ hwɛɛ 'yajɛ amɛ-olom suu, nazhɛ bɛɛ zhɛ ba zhajɛ no ofwo aba ne tusweci ba nda iyi nɛ eshi ubwa keeni ogwunukwoshi ubwa ta njɛ shɛ la kwukwuŋ. Bi zhɛ bo dwotwogonu i'wɛŋnɛ nɛ ujasa yɛ, ti i'wɛŋnɛ inyɛ nɛ aa lashajɛ keeni uduciya na ashashɛ atwa ata 'wa bụ. Bi zhɛ ba imanga maa sukakana ofwo ofwugwo na ee ge kepenji, bi zhɛ ba nda inɛ ɛtɛ na aka tikpendere kiri.

²⁵Bi zhɛ bɛ ishicinjɛ ejeshi a'wụtụ ne eshe-hwoo maa sukakana agwuma tuta, na kaa du mama imanjɛ maa nda ujasa nu bwa na asaza ubwa a na gembi ufwugwo tebiye, a na kaa 'yajɛ ukpahiŋ duwa. Ama ɛ zhɛ a halakaka agwuma ata u tuta, bi zha shɛ ba ala tishikono.

²⁶Atwa ata a na a ya iyimɛyɛ ibwɛ ibiye, aba zhɛ a nda bụ ufwu. Ɛ zhɛ a kwụna ejeshi ubwa ofwugwo, atwa aba ofwugwo kaa zhɛ o 'wo nu ujasa ata.

²⁷Nazhɛ shɛgwuma sha ata shi yebi shi zhɛ sha gɛga, shɛɛ zhɛ sha ya iyimɛyɛ ikwede ike, ama kaa iyi iwɛ namɛ na shihaŋsa sha aba; ɛ zhɛ no momo dwotwogonu-ụzagwụ. A zha shɛ a 'yaga kaa iyi nɛ aa jala, iwɛnɛ ta aka ibɛ te ci shi.

²⁸Agwuma atwa tuzuba zhɛ o jiyo ni ihwɛ ibwɛ ni i'wɛŋnɛ ye elele nɛ bee lesheji nu ujasa ata. Ahaŋsa kaa namɛ na amɛ ubwa maa sukakana unu-tutwa u tijilo. Bi zhɛ kaa ba nda iyi elele nɛ kwụlanɛ bụ, nazhɛ bɛɛ zhɛ bo gwulo na cɛnjɛ tu bwa.

²⁹Na aka na ta aka ata ee jwe ci, bi zhɛ ba zhajɛ ba tafwulaga cɛnjɛ-ta-tugwama tu tuta sasana, ama i zha shɛ tuba ya sha ya na aka ga, gana na ti yaa shɛ la na aka ihiiŋ o.

³⁰Iwɛnɛ po atwa na namɛ nụ ụpalanụ geri bu uwaŋna-twonuo zhɛ a zhajɛ ni ihɛŋtu, a sukakana bụ, inyɛsɛ kaa zhɛ ya sha bụ. Nazhɛ bɛɛ zhɛ bo gwulo maa nda isɛbwɛ maa sukakana unu-tutwa u tijilo. Bi zhɛ bo gwulo bo lubo atwa ata ge jineci la unu-tutwa ata u tijilo.

³¹Asaza ubwa zhɛ o shikono na aba ubwa, ɛɛ zhɛ a hashɛgana Umwono ata wa Agwatana, ti ikepi ibwɛ. Nazhɛ ɛɛ zhɛ o ngwuricingo ụrụpɛ na aa ga ta iyi-heri, maa e shikicinji tuba iyi-tupwaŋ nɛ ya nda ofwo osombo.

³²Tedure nu unu ubwa ụlatụ, bɛɛ zhɛ ba halakaka atwa na ge jineci unu wa aba tutwa, ama tuba atwa na mepi Agwatana aba zhɛ o shikono dimi maa a sukakanɛ bụ.

³³Atwa na kaa incɛ zhɛ o sokokono atwa gembi ufwugwo ti'inta ta aba; ama kaa ɛ zhɛ a kwụna aŋ nu utokwobi keeni bụratụ bu ulwa, ɛɛ zhɛ a ima atwa aba oko, ɛɛ zhɛ o sugo i'wɛŋnɛ ya aba.

³⁴Aka na aa ta namɛ na amɛ-tụhaŋtụ, ɛ zhɛ a lashɛga timbiyono ti ticwɛŋ. Ama atwa ofwugwo a na zhɛ o togwu na aba zha shɛ a sha atwa tɛcara o.

³⁵Ɛ zhɛ a kwụna umeseyi wa atwa ata incɛ, ama tuba ijɛ njɛ, iwɛ maa a nyashɛnjɛ aŋ maa e beni paawụụ, uuwa i ci aka ukwunanga, iwɛnɛ ta aka ibɛ nɛ Agwatana jwe a ta vwɛ.

³⁶Agwuma ata u tuzuba zhɛ ba nda iyi gana na kwụlanɛ bụ. Bi zhɛ momo gombicingo maa momo mbisono uhwuri tuwa te elele, bɛɛ zhɛ bo mbisogo Agwatana tugom n-ndumwa mụ 'wụtụ 'wụtụ. I zhɛ ya zhɛmana bụ kaa uuwa i ci aka na Agwatana zhɛ a pana bụ ulwapɛ. Iwɛnɛ po ɛ zhɛ a nda bụ gana na oo go hoŋswo iwɛ ubwa cebe tilɛɛ.

³⁷Iwɛ tuwa tu na eshi ubwa zhɛbɛ la zha shɛ ya tatụlanụ bụ o, kwo kaa ma tu na eyikwo olubo, tuwa te elele ti zha shɛ ta tatụlanụ bụ o. Iwɛnɛ po bi zhɛ momo mungicingo maa ubwa hwuri tu hwɛɛ.

³⁸Ama bi zhɛ ba muna tuwa tu na ta jilanɛ ikepi ụjɛrụma. Bi zhɛ ba pana tuwa tu na eshi ubwa mepi shi la kwukwuŋ apwaŋ azhɛnarɛya, na azụrụfa, na atayɛ ogwumishi keeni apwaŋ anya a na zhanganjɛ.

³⁹Bi zhɛ bo sugo atwa na a zhɛba tuwa ta cɛnjɛ ti nya maa e mbiyeni bu maa jilanɛ ikepi ibwɛ. Bi zhɛ ba muna atwa na leshiji bu maa sha uhiu wa aba ụjɛrụma na gembi tebiye. Bi zhɛ bo zwogono aŋ no shihwolu shɛ 'wụtụ 'wụtụ, maa pana aŋ cɛnjɛ maa tɛ shɛ ule wa aba.

⁴⁰Aka na tu ukwunanga umɛwɛɛ wa agwuma tuzuba gwumwonu tuto, nazhɛ agwuma tuta zhɛ a sukakana bụ, agwuma ata u tuzuba kaa zhɛ ba twa ifelu nu bwa gana elele tu ukpahiŋ ubwa namɛ hwɛɛ, ti ihɛŋtu ujasa, ti idɛkwɛ keeni ihɛŋtu meni nɛ namɛ nyakpa nyakpa. Bi zhɛ ba tafwulaga cɛnjɛ cɛnjɛ tu ufwugwo bo sugo tu gana meni mu na ma zhagajɛ mo sugo ofwo.

⁴¹Bi zhɛ du ba tafwulaga cɛnjɛ ta ata tu pilanụ maa kwụna atwa igbɛɛ igbɛɛ ifwugwo. Ama atwa cɛnjɛ ti Idụm, nu Moab keeni tuvwa ta atwa Amon zhɛ a banangana bụ.

⁴²Aka na bɛɛ zhɛ ba kaana cɛnjɛ tu ufwugwo tusukakana, cɛnjɛ ti Ijipti kaa ti zha shɛ ta banangana o.

⁴³Ubwa zhɛ bo sugo uduciya wa azhɛnarɛya, na azụrụfa keeni i'wɛŋnɛ yo ogwumishi Ijipti. Bi zhɛ kaa ba lasụ Libia keeni Itiopia.

⁴⁴Ama unabarɛ na bɛɛ zhɛ ba hwuga, na zhɛ wa banɛ uwaŋna-banụ keeni tuzuba zhɛ wo horukono bu ohwulu tebiye. Nazhɛ bɛɛ zhɛ bɛ ishijɛ ni isɛbwɛ i'wɛtwɛ ba kwụna atwa ofwugwo.

⁴⁵Bi zhɛ bo shikicingo udulo ubwa tugwuno u tugwama no ohwolu na namɛ na ashashɛ Itekwu ɛtɛ I'wɛtwɛ ni ishɛmɛ ɛtɛ tijilo ụjɛrụma. Okwo ti yaa shɛ gana ata, bi zhɛ kaa bo 'wo, i zha shɛ kaa ya 'yaga bụtụ be elele na zhɛ bo mbiyono bu o.