Read bassa DANIƐL 12 Bible Online

DANIƐL 12 - bassa bible

DANIƐL 12

¹Na aka ata ga Maikɛl na shɛ uhiu wa atumwa Agwatana azuba, na ba ngbaraka atwa bụ zhɛ bɛ ishijɛ. Nazhɛ aka ata zhɛ a sha aka ụbaụta ụ'wụtụ, unaa na ta zasaba la kwukwuŋ taa te edenji atwa namɛ uuwa i ci aka ata. Na aka ata ɛɛ zhɛ o bicingo atwa bụ elele a na nzeci ma aba mi 'nyeci nu utakada ata.

²Atwa ofwugwo na go loyo la malabụ a na zweni nu upwupwutu, zhɛɛ hiɛ. Atwa oko zhɛ o tono nu uraiŋ unyizo-nom, atwa oko tuba zhɛ a zha ne ezuye keeni tiriri tu unyizo-nom.

³Atwa elele na incɛ zhɛ na ta raawụụ gana tụla. Atwa na kaa o mbisogono anya atwa maa a na nda iyi tiririri, ɛ zhɛ na ta gana mkpasu tutu unyizo-nom.

⁴Bɛɛ n hiɛŋ, Gabụ ga Daniɛl, kwungwulo utakada ata maa kepi uŋ uuwa i ci ukwunanga unyizo ga. Atwamwa zhɛ na vwulaga beye bana maa a na kaana iyi-tumapa.

⁵Nazhɛ Gamba ga Daniɛl, Ngaa mbiyanɛ ta atwa eyebi shikekeni nu umbe mu. Bụtụ bu ko shikeni hileniye ukwoswo Urefu, bụtụ bi yebi shikeni hileni ga.

⁶Nazhɛ bụtụ aba bu ko heŋteni butumwa ebe ba azuba ge uregeni tugwuno ti ilinɛn, na kaa patanɛ na azuba meni ma ata, bɛɛ hiɛŋ, Ụkwụmbwụ naa kwuŋ ijɛ i tudama zhɛ ya kwunangaa?

⁷Nazhɛ butumwa ata ba azuba na urigeni tugwuno ti ilinɛn, na kaa patanɛ na azuba Urefu suji i'ɛlɛ ibwɛ iyebi na azuba, bo to bụtụ ata shɛ buumwa unyizo-nom, bɛɛ hiɛŋ, I zhɛ ya sha iwɛ aka oko keeni aka eyebi keeni ashashɛ aka.[23] Ijɛ zhɛ ya ndangana tugwo hwɛɛ nazhɛ tɛshɛka ta atwa Agwatana ti zhɛ ta kwunanga.

⁸N hwụjɛ iŋ, ama N eshiciji shi iŋ kaa o. Ngee heŋteni bu, Ngɛɛ hiɛŋ, Iyɛri mi, Imbe kwuŋ zhɛ ya sha ukwunanga ijɛɛ?

⁹Bɛ jishijɛ, bɛɛ hiɛŋ, A-Daniɛl, zhaga hwulo ya, iwɛnɛ to o kopwo n-ndumwa ma ata aa intwanua mụ uuwa zhɛ yo to aka ukwunanga umɛwɛɛ.

¹⁰Ɛ zhɛ a nyashɛnga atwa ofwugwo maa a nama shɛshɛshɛ; ama atwa tugworozwo zhɛ na nda tugworozwo ta aba tutu, a zha shɛ kaa o eshicigo iyi elele o. Ama atwa na incɛ zhɛ no eshicigo iyi.

¹¹Te kwuni na aka na te e ngwuricinji ụrụpɛ tuhwoŋzhingo na aa ga ta iyi-heri, nazhɛ ee shikicinji ya iyi-tupwaŋ nɛ ya nda ofwo osombo, ijitɛ ibɛ zhɛ ya sha akpakwụ-ecihiŋ-nu-dupu-na-buhanda (1,290).

¹²Atwa tɛcara a na 'yacɛ uuwa i ci aka na ijitɛ ya akpakwụ-ecihiŋ-ni-dipi-yebi-nu-talacɛ-ni-bɛ-tɛ (1,335) keshici ɛ zhɛ e gwoje.

¹³Ama gabụ ga Daniɛl, zhaga hwulo maa untangana tɛcara tụ bụ tutu ukwunanga. Bi zhɛ bo 'wo, ama tuba bi zhɛ bɛ hiɛ maa leshiji ule bu na aka ukwunanga wa aka ata.