Read bassa DANIƐL 2 Bible Online

DANIƐL 2 - bassa bible

DANIƐL 2

¹Ti gɛ Nɛbukadnɛza yɛ tugwama, yaa namɛ shiywa shi yebi, bee wetegeni ụwalabụ; ohwulu herikeni bu, bi eri shi bo woto malabụ o.

²Bee peni aŋ unu maa ga suyanɛ anjɛ-tishino, na anjɛ-tuwa keeni awa-inibi keeni ashɛjɛ iwɛ maa e mbishi bu ụwalabụ ubwa. Aka na aa zhajɛ, ee shikekeni na agba agwuma.

³Bɛɛ hiɛŋ aŋ, N wetegeni ụwalabụ, ohwulu kaa mo horoko, ibɛ po Ama jala maa ma mapa ecilo ụwalabụ ata.

⁴Nazhɛ ashɛjɛ ata jishijɛ bụ na rɛjɛmɛ ra Aramaik, ɛɛ hiɛŋ, Oo Agwuma, ya urugbo unyizo-nom! Mbiso miaụŋ mu ga bụ mu ugondu ụwalabụ ata ebu wetegeni nazhɛ to bu mbiso ecilo ubwa.

⁵Agwuma jishijɛ ashɛjɛ ata, bɛɛ hiɛŋ, N nduwa ahaŋsa mi oko: maa, Yaa shɛ ehi m mbishi shi hwayɛ ụwalabụ ata keeni ecilo ubwa; asha ɛ zhɛ ma hi sashanga wunzu wunzu, ɛɛ zhɛ a nda kaa nhwaŋ mi hiŋ osombo.

⁶Ama yaa shɛ ehi m mbishi hwayɛ ụwalabụ ata keeni ecilo ubwa, asha N zhɛ ma hi pana apwaŋ na shɛ ule keeni ụjɛrụma na gembi. Hwuwayɛ go, asha m mbishi ma ya tụ ụwalabụ ata keeni ecilo ubwa.

⁷Ɛɛ jishijɛ agwuma sasana, ɛɛ hiɛŋ, Mbiso miaụŋ mu ga bụ mu ugondu ụwalabụ ata ebu wetegeni, maa ta duma ecilo ubwa.

⁸Agwuma jishijɛ aŋ, bɛɛ hiɛŋ, M mwopwo uvwi hiŋ, hia jala maa hi meme lesheji; iwɛnɛ ahiɛ kwụbɛ maa n-ndumwa mu na Ngaa jɛmɛ mi shikeni dimi,

⁹maa ulwapɛ na Ngɛɛ zhɛ ma hi pana ụ shɛ u ko hwɛɛ hiŋ, ti yaa shɛ ehi m mbishi shi ụwalabụ ata. Hi twawa-unu ahiɛba hiɛba maa hi m mbishi ụzagwụ maa kaa hi n helekeci, ehi heŋshi maa iwɛ gɛ zhɛ yo sheyingo na aka oko. Shibwonu asha m mbishi ma ụwalabụ ata, nazhɛ Ngɛɛ zhɛ ma mapa maa hi eri hi mo mbiso du ecilo ubwa.

¹⁰Nazhɛ ashɛjɛ ata jishijɛ agwuma, ɛɛ hiɛŋ, I zasa bụtụ be elele na namɛ nu unyizo ga eri ba nda iyi nɛ agwuma a jala kwukwuŋ! I ta zasa agwuma elele, okwo be gembi okwo kaa ba 'yajɛ ukpahiŋ na jolokwokwo iyi gɛnɛ gɛ no olugwo anjɛ-tishino na anjɛ-tuwa keeni ashɛjɛ kwukwuŋ.

¹¹Ijɛ agwuma a jalakaka i hwuri wumanjɛ. I zasa bụtụ be elele na eri ba bacɛnganɛ iŋ agwuma o, semi tuwa tu na tu zasa nu usunda-tu'waba.

¹²Iwɛbɛ po agwuma njɛ isɛbwɛ duwa, amɛ ubwa vwi tebiye, bee peni atwa ubwa unu maa ga kwụnɛ atwa shihaŋsa elele a na namɛ nu Babulon.

¹³Ibɛ po ụhwada beni maa ga kwụnɛ atwa shihaŋsa. Ee kwuni ata Daniɛl tudwalakaka keeni eyebi ubwa iwɛ maa a kwụnɛ aŋ.

¹⁴Aka na ti ge Eriok na shɛ uhiu wa atwa na a 'yaka agwuma leshiji unu-tupana maa ga bana maa kwụna atwa shihaŋsa a na namɛ nu Babulon. Ga Daniɛl jɛmɛ n-ndumwa nu uhwaŋna wa ahaŋsa tụpana.

¹⁵Bee heŋteni Eriok ata, bɛɛ hiɛŋ, Iwembe po ụhwada banɛ no olugwo agwuma ni izɛlɛgwu i ci gana gaa? Nazhɛ ge Eriok eshicigeni Daniɛl ecilo no po.

¹⁶Ibɛ po ga Daniɛl teni pa agwuma baa tabwa bụ maa ga pana bụ aka maa mbiso bu ecilo ụwalabụ ata.

¹⁷Nazhɛ ga Daniɛl ji ni ihwɛ ibwɛ, bee eshicigeni eyebi ubwa, ata Hanania, nɛ Mishaɛl keeni Azaria iwɛ ɛtɛ.

¹⁸Bee mbishi aŋ maa ga lụpɛ Agwatana azuba maa hioko inyɛmɛnyɛmɛ ya aba iwɛ maa eshicigono aŋ ijɛ tusweci; iwɛ maa kede a kwụnɛ Daniɛl keeni eyebi ubwa gana na ɛɛ zhɛ a kwụna atwa ti'inta nu Babulon o.

¹⁹Na amɛ ụjita ata gbaa ibɛ ijɛ ɛtɛ tusweci bananɛ Daniɛl caakwụ no ozobu. Nazhɛ ga Daniɛl shɛtana Agwatana azuba.

²⁰Ga Daniɛl hiɛŋ, Ge zhemonjino Agwatana tutu unyizo zhegwure! Iwɛnɛ po ubwa incɛ, baa 'yajɛ kaa ukpahiŋ ụ'wụtụ.

²¹Ubwa bo sheyingo shika keeni shigwungwu shi iyi; ubwa ba gɛgɛcɛnga shɛgwuma. Ubwa kaa ba pashanga shụ. Ubwa ba pana atwa ti'inta maa a incɛ, baa pana kaa atwa na eshiciji iyi iyi-tumapa.

²²Ubwa bɛ bɛcinjɛ iyi tusweci nɛ iri; ubwa mepi iyi nɛ swacɛ na amɛ tishi, uhioko-uhwaŋna kaa rungwutwonu bu.

²³Oo Agwatana eshi mi, Ma nda ugwoje bu, Ama bụ shɛtana kaa: Gabụ kaa bu m peni ti'inta keeni ukpahiŋ, abɛ njɛ kaa maa ma mapa iyi nɛ atụ bụ lụpɛ, Gabụ bɛ njɛ maa ta mapa ụwalabụ ata wa agwuma.

²⁴Nazhɛ ga Daniɛl zhe no ofwo Eriok, na agwuma ge peni-unu maa ga kwụnɛ atwa ti'inta nu Babulon, bɛɛ hiɛŋ bụ, Ta kwụna atwa ti'inta nu Babulon o. N zeriji no ofwo agwuma, maa Mo mbiso bu ecilo ụwalabụ ubwa.

²⁵Ge Eriok tecinji Daniɛl na agba agwuma kakayɛ, bee mbishi bu, bɛɛ hiɛŋ, N kwụbɛ butubwenyi bu ko na ashashɛ miaụŋ mu Juda mu ga ɛɛ imɛ a na eri mo bu mbiso ecilo ụwalabụ bụ.

²⁶Nazhɛ agwuma hiɛŋ Daniɛl, (na ɛɛ hiɛŋ du ti gɛ Bɛltɛshaza) Bi eri bu mo mbiso ụwalabụ na Ngee wetegeni keeni ecilo ubwa hŋ?

²⁷Ga Daniɛl jishijɛ bụ, bɛɛ hiɛŋ, I zasa atwa ti'inta, na anjɛ-tishino, na ashɛjɛ keeni awa-inibi a na eri o mbiso agwuma ecilo iyi tusweci nɛ baa lụpɛ o.

²⁸Ama Agwatana oko namba na azuba na bɛ bɛcinjɛ iyi nɛ ga swacɛ caakwụ. Ubwa ba nda maa ga agwuma Nɛbukadnɛza mepi iyi nɛ tɛ zhɛ ya nda geri-be-eshe. Hwuwayɛ go, N zhɛ mo bu mbiso ụwalabụ ata ebu wetegeni keeni ozobu na abụ kwụbɛ aka na obo woto malabụ no ogodo bu.

²⁹Oo Gabụ agwuma, aka na ebu weci apata, ahaŋsa bu zhe taa dụlụ iwɛ iyi nɛ tee ci tɛnda geri-be-eshe; bụtụ na kaa bɛ bɛcinjɛ iyi tusweci caakwụ ubwa zhɛ ba nda maa mepi iyi nɛ tɛ zhɛ ya nda.

³⁰Ama ijɛ ɛtɛ i tusweci i m bananɛ caakwụ, i shɛ shɛ maa N incɛ Ngee hwuri atwa vwɛ a na a hwungwa o, ama iwɛ maa ga agwuma mepi ecilo ụwalabụ keeni maa eshiciji tuhaŋsa tu na ti ge teni na amɛ bụ.

³¹Oo gabụ agwuma, bụ kwụbɛ itɛtɛnuwɛŋ ike i'wɛtwɛ, itɛtɛnuwɛŋ ɛtɛ hwuleji ugombo, ya ta paawụụ, yaa 'yajɛ igɛhi, i shikeni nu umbe bu; yaa sha bụtụ inyɛsɛ tebiye.

³²Uhiuhiu itɛtɛnuwɛŋ ɛtɛ ụ shɛ azhɛnarɛya na namɛ rụmbɛɛ, agba keeni i'ɛlɛ ibɛ i shɛ azụrụfa, amɛ keeni n'nto mi ibɛ mɛ shɛ utumburɛ,

³³ivwunɛ ibɛ i shɛ ashɛmbɛrɛ, ɛvwɛvwɛjɛ ibɛ a shɛ ashɛmbɛrɛ na hiŋtetenji na cɛnjɛ-ti'wɛŋnɛ.

³⁴Gana na abu ngbarakacɛ iŋ, nazhɛ utayɛ uko jajụ; shɛ i'ɛlɛ butugwumwa kaa timengeni uŋ o, wee leyiteni ivwunɛ itɛtɛnuwɛŋ ɛtɛ ga shɛ ụshɛmbɛrɛ na cɛnjɛ-ti'wɛŋnɛ, wee bwereteji iŋ kaa rukwu rukwu.

³⁵Nazhɛ ụshɛmbɛrɛ, na cɛnjɛ-ti'wɛŋnɛ, nu utumburɛ, na azụrụfa keeni azhɛnarɛya bwaratagwụ ni inyɛ, gunu ata yaa shɛ ya gana afwụrɛkɛcɛ a na namɛ na akpakpata na oo dubo ohiu a na uvwugo wo sugo na aka bu ugbofworo. Ibɛ po uvwugo suji iŋ apata wee hwuri; a kwụbɛ shɛ ya okwo uhombolu ibɛ o. Nazhɛ utayɛ ata ge bwereteji itɛtɛnuwɛŋ ɛtɛ waŋnɛ waa shɛ ya ishɛmɛ i'wɛtwɛ, yee leshegeji cɛnjɛ tu unyizo hwɛɛ.

³⁶Agwuma ụwalabụ na ebu wetegeni ta, ama ti zhɛ to bu mbiso ya hwuwayɛ go ecilo ubwa.

³⁷Oo agwuma, gabụ bɛ shɛ agwuma shɛgwuma, na kaa Agwatana azuba peni cɛnjɛ-ta-tugwama, nu ukpahiŋ, ni ikɛnyi keeni ụjɛrụma.

³⁸Ofwo elele na kaa miaụŋ ma atwa mi teje, ti isundɛ ehilo keeni shanụnụ shɛ na sha hila, gabụ bee utegeni aŋ maa 'yaga ụhwada wa aba hwɛɛ. Gabụ kaa bɛ shɛ uhiuhiu ata wa azhɛnarɛya.

³⁹Agwuma cɛnjɛ ti nya na 'nyanɛ na bụ, zhɛ bɛ ishijɛ; na aba bụ keeni ụhwada cɛnjɛ-ta-tugwama tu tatụ na shɛ utumburɛ, aba kaa zhɛ a 'yaga ụhwada cɛnjɛ tu unyizo hwɛɛ.

⁴⁰Nazhɛ ụhwada cɛnjɛ-ta-tugwama ti neshi na 'yajɛ ikɛnyi gana ụshɛmbɛrɛ, zhɛ wa banɛ umɛwɛɛ, gana na ụshɛmbɛrɛ wa bwarataga iyi elele rukwu rukwu; gana ata du una ga zhɛ wa bwarataga cɛnjɛ-ta-tugwama ti hiiŋ.

⁴¹Gana na abụ kwụbɛ ti ivwunɛ ibɛ keeni ivwɛ ibɛ geri bu ko i shɛ cɛnjɛ-ti'wɛŋnɛ, geri bu ko kaa i shɛ ụshɛmbɛrɛ, gabata du cɛnjɛ-ta-tugwama tu bwa ti zhɛ to bogwu. Ama kaa ukpahiŋ ụshɛmbɛrɛ zhɛ wa nama na amɛ ibɛ gana na abụ kwụbɛ maa ụshɛmbɛrɛ keeni cɛnjɛ-ti'wɛŋnɛ ti hiŋtotongwu ni inyɛ.

⁴²Gana na ti ivwɛ ibɛ geri bu ko i shɛ ụshɛmbɛrɛ geri bu ko kaa i shɛ cɛnjɛ-ti'wɛŋnɛ, gabata du cɛnjɛ-ta-tugwama ta ata ti zhɛ ta 'yaga ikɛnyi, tɛɛ zhɛ kaa ta 'yaga geri na zasa ikɛnyi okwo cwɛŋ.

⁴³Gana na abụ kwụbɛ tụ ụshɛmbɛrɛ ata hiŋtotongwu na cɛnjɛ-ti'wɛŋnɛ, gabata du atwa ata zhɛ o hiŋtotongwu na anya.[3] Ama tuba a zha shɛ mama imanụ, gana na tụ ụshɛmbɛrɛ eri shi mama imanụ na cɛnjɛ-ti'wɛŋnɛ.

⁴⁴Na aka shɛgwuma sha ata, Agwatana azuba zhɛ o shikicingo cɛnjɛ-ta-tugwama tu na ti zha shɛ ta nda ya ufwu kwukwuŋ, ma tu na kaa a zha shɛ a gangana anya atwa. Bi zhɛ kaa ba bwarataga cɛnjɛ-ta-tugwama ta ata, bɛɛ zhɛ ba kwunanga tụ, ubwa tuba zhɛ bo shikicingo ma tu bwa unyizo-nom.

⁴⁵Gana na abụ kwụbɛ ta a jajɛ utayɛ ne embi ishɛmɛ ɛtɛ, una i shɛ shɛ ni i'ɛlɛ butugwumwa, unaa na kaa bwereteji ụshɛmbɛrɛ keeni utumburɛ keeni cɛnjɛ-ti'wɛŋnɛ keeni azụrụfa keeni azhɛnarɛya ata. Asha Agwatana a'wụtụ ubwa leni maa ga agwuma mepi iyi nɛ ye ci tɛnda geri-be-eshe. Ụwalabụ ata ụ shɛ iwɛ-tɛkana, ecilo ubwa kaa zha shɛ o ngwulo kwukwuŋ.

⁴⁶Nazhɛ agwuma gɛ Nɛbukadnɛza ubi eshe ubwa na cɛnjɛ, baa zhɛbɛ Daniɛl, bee peni atwa ubwa unu maa ge peni bu apwaŋ keeni ɛturɛre.

⁴⁷Nazhɛ agwuma jishijɛ Daniɛl, bɛɛ hiɛŋ, Iwɛ-tɛkana, Agwatana bụ hwuri tuwa te elele keeni AGWANGWAMA na hwuri shɛgwuma she elele. Ubwa bɛ bɛcinjɛ iyi tusweci caakwụ, iwɛbɛ po ebi eri maa bɛcinjɛ ijɛ tusweci caakwụ.

⁴⁸Ibɛ po agwuma njɛ Daniɛl bụtụ bụ 'wụtụ, bee peni bu apwaŋ, bee peni bu maa ga 'yaga ụhwada ukpeleshi cɛnjɛ tu Babulon hwɛɛ, maa sha du buhwuri-bu-umbe ba atwa ti'inta tu Babulon hwɛɛ.

⁴⁹Nazhɛ ga Daniɛl lụpɛ agwuma ilupwɛ ibwɛ; ibɛ po agwuma utegeni Shadrak, nɛ Mishɛk keeni Abɛdnigo i'wɛŋnɛ ukpeleshi cɛnjɛ tu Babulon. Ama ga Daniɛl tuba jɛjɛ nu umwamwa wa agwuma.