Read bassa DANIƐL 3 Bible Online

DANIƐL 3 - bassa bible

DANIƐL 3

¹Agwuma gɛ Nɛbukadnɛza njɛ itɛtɛnuwɛŋ ike na azhɛnarɛya; uzoto ibɛ shɛ imbele i'ɛlɛ dupu-ne-eshe-umpwa; uholo ibɛ shɛ imbele i'ɛlɛ icihiŋ. Bee shikicinji iŋ nu udadarɛ u Dura na namɛ nu ukpeleshi cɛnjɛ tu Babulon.

²Nazhɛ baa tumwanɛ maa go sotulonu shɛgwuma, ne egwomina, ne ehiu, na ajɛmɛ-ụshɛrɛya, ne esweci-ukwuribi, na ajɛmɛ-ushaura, na atwa shihwolu keeni atwa ụhwada ekpeleshi cɛnjɛ tu Babulon hwɛɛ iwɛ maa a zhajɛ a kwụbɛ ti itɛtɛnuwɛŋ ɛtɛ bee shikicinji zhɛ ya banɛ ibɛ.

³Ibɛ po shɛgwuma, ne egwomina, ne ehiu, na ajɛmɛ-ụshɛrɛya, ne esweci-ukwuribi, na ajɛmɛ-ushaura keeni atwa ụhwada ekpeleshi cɛnjɛ tu Babulon hwɛɛ sotulonu iwɛ maa a kwụbɛ ti itɛtɛnuwɛŋ ɛtɛ agwuma Nɛbukadnɛza shikicinji zhɛ ya banɛ ibɛ. Ee shikekeni nu umbe itɛtɛnuwɛŋ ɛtɛ gɛ Nɛbukadnɛza shikicinji.

⁴Ee enenji, ɛɛ hiɛŋ, Ahiɛba atwamwa, ne edenji keeni atwa rɛjɛmɛ ru tuswoswoswo hwɛɛ.

⁵Aka na ahiɛ hwụjɛ rụhwụŋ ru ukakacɛ, na mahiuaŋ, nu ukpasana, na aduma, nu ugweje nu uta keeni iyi tụlagwụ swoswoswo hwɛɛ, zhajɛ ma maa hi kwuzo maa hiɛ zhɛbɛ itɛtɛnuwɛŋ ya azhɛnarɛya ɛtɛ agwuma Nɛbukadnɛza shikicinji.

⁶Bụtụ be elele na kaa kwuzhi shi maa zhɛba iŋ, gwunu ata ɛ zhɛ a kala bụ na amɛ ukwokwo ulwa na wo gorogo.

⁷Iwɛbɛ po gunu na ta atwamwa hwụjɛ rụhwụŋ ru ukakacɛ, na mahiuaŋ, nu ukpasana, na aduma, nu ugweje, nu uta keeni iyi tụlagwụ swoswoswo hwɛɛ, atwamwa ne edenji keeni rɛjɛmɛ ru tuswoswoswo hwɛɛ e kwuzhi aa zhɛbɛ itɛtɛnuwɛŋ ɛtɛ ya azhɛnarɛya agwuma Nɛbukadnɛza shikicinji.

⁸Na aka ata Akaldia oko kezhingeni aa sukakanɛ Eju nu ụshɛrɛya,

⁹ɛɛ hiɛŋ, Oo agwuma Nɛbukadnɛza, ya urugbo tutu unyizo-nom!

¹⁰Agwuma, gabụ bi shiri unu-tɛtɛtagana, ɛbi hiɛŋ, Bụtụ be elele na hwụjɛ rụhwụŋ ru ukakacɛ, na mahiuaŋ, nu ukpasana, na aduma, nu ugweje, nu uta keeni iyi tụlagwụ swoswoswo hwɛɛ, go kwuzo maa a zhɛbɛ itɛtɛnuwɛŋ ɛtɛ ya azhɛnarɛya,

¹¹ama bụtụ be elele na kaa kwuzhi shi maa zhɛba iŋ, ɛ zhɛ a kala bụ na amɛ ukwokwo ulwa ata wo gorogo.

¹²Eju oko kaa namba a na ebu utegeni ụhwada ukpeleshi cɛnjɛ tu Babulon, aba shɛ ga Shadrak, nɛ Mishak keeni Abɛdnigo; oo agwuma, atwa ga shiri shi acɛbɛ ni iwɛ bu maa a njɛ tuwa tụ bụ o, a zhɛbɛ shɛ kaa itɛtɛnuwɛŋ ɛtɛ ya azhɛnarɛya ebi shikicinji o.

¹³Na aka ata ibɛ isɛbwɛ Nɛbukadnɛza ishijɛ ta zhanjɛ, bee peni-unu maa ge suje ata Shadrak, nɛ Mishak keeni Abɛdnigo. Ee suje ga atwa ata na agba agwuma.

¹⁴Gɛ Nɛbukadnɛza heŋteni aŋ, bɛɛ hiɛŋ, Oo a-Shadrak, nɛ Mishak keeni Abɛdnigo, iwɛ-tɛkana ga suu maa hiɛ lacɛ maa hiɛ zhɛbɛ tuwa ti mi maa hi kwuzono itɛtɛnuwɛŋ ya azhɛnarɛya ɛtɛ Ngee shikicinji?

¹⁵Hwuwayɛ go yaa shɛ ahiɛ mama 'imɛ maa aka na ahiɛ hwụjɛ rụhwụŋ ru ukakacɛ, na mahiuaŋ, nu ukpasana, na aduma, nu ugweje, nu uta keeni iyi tụlagwụ swoswoswo ye elele, maa hiɛ zhajɛ hi kwuzo maa hiɛ zhɛbɛ itɛtɛnuwɛŋ ɛtɛ Ngaa njɛ, asha i zhɛmɛ tebiye. Ama yaa shɛ ahiɛ zhɛbɛ shɛ iŋ, na aka ata gom ɛɛ zhɛ ma hi 'waŋ na ashashɛ ukwokwo ulwa ga wo gorogo. Gaaba shɛ Agwatana ata eri ma hi lashɛga ni i'ɛlɛ mii?

¹⁶Ga Shadrak, nɛ Mishak keeni Abɛdnigo jishijɛ agwuma, ɛɛ hiɛŋ, Oo gabụ gɛ Nɛbukadnɛza, ukekeshi ụ tɛ njɛ shɛ maa i shɛ atuba ti zhɛ tu mama lashaga ni iwɛ gɛ o.

¹⁷Oo agwuma, yaa shɛ gana ata, asha Agwatana tu na ata zhɛba eri mo ti bicingo na amɛ ukwokwo ulwa ga wo gorogo; bɛɛ zhɛ kaa du ma tu lashɛga ni i'ɛlɛ bu.

¹⁸Ama okwo yaa shɛ bee ti bicinji shi, oo agwuma, mapa gom maa ti zha shɛ kaa ta nda tuwa tụ bụ o, ti zha shɛ kaa ta zhɛba itɛtɛnuwɛŋ ɛtɛ ya azhɛnarɛya ebi shikicinji o.

¹⁹Nazhɛ isɛbwɛ Nɛbukadnɛza keeni ti'ishijɛ nu uhiuhiu wa ata Shadrak, nɛ Mishak keeni Abɛdnigo tebiye. Eshe ubwa shenjemi. Ibɛ po bee peni atwa ubwa unu maa ga nanganɛ ukwokwo ulwa ata maa u gereji uhwuri gana na woo go gorogo cebe i ci kpalụ cenje ya.

²⁰Bee peni umeseyi we ejeshi ubwa anaa na hwuri a na vwɛ ni ikɛnyi hwɛɛ unu, maa ge umpi Shadrak, nɛ Mishak keeni Abɛdnigo, maa a 'wɛŋ aŋ na amɛ ukwokwo ulwa ata wo gorogo.

²¹Ee umpi ga atwa ata hwɛɛ tu n-nduka ma aba, te ewereci aba, te ereweni aba keeni i'wɛŋnɛ ya aba i tu'urugono inyɛ, a 'wɛŋ aŋ na amɛ ukwokwo ulwa ata wo gorogo.

²²Ama gana na tu unu-tupana ata wa agwuma uhwuri ụ shɛ ni izɛlɛgwu, ukwokwo ulwa ata kaa keeni tugorogo duwa, ibɛ po bụratụ bu ulwa ata hwoŋzhinji atwa ebe suji ata Shadrak, nɛ Mishak keeni Abɛdnigo maa a 'wɛŋ aŋ na amɛ ukwokwo ulwa ata.

²³Aa 'wɛŋ ga atwa ata atatụ, ga Shadrak, nɛ Mishak keeni Abɛdnigo nu ukwokwo ulwa ata tobwolo e te umpenji aŋ.

²⁴Gwunu ata ya dama agwuma Nɛbukadnɛza, bɛɛ ishijɛ ni izɛlɛgwu, bee mbishi ajɛmɛ-ushaura ubwa, bɛɛ hiɛŋ, Shɛ atwa atatụ suu eti ge umpi atu 'wɛŋ na ashashɛ ukwokwo ulwa ga? Ɛɛ jishijɛ bụ, ɛɛ hiɛŋ, Oo agwuma, iwɛ-tɛkana kaa.

²⁵Bɛɛ hiɛŋ, Hioko ma! Atwa eneshi Ngaa kwụbɛ ya a na iyi elele umpi shi, to o rungo na ashashɛ ulwa, e hwoŋni shi kaa o. Eshe bụtụ aba bi neshi a sụbɛ yɛu ya Agwatana oko.[4]

²⁶Gɛ Nɛbukadnɛza keeni izhɛ boo gwumwonu no odubo ukwokwo ulwa ata wo gorogo; bee keri Shadrak, nɛ Mishak keeni Abɛdnigo ụhiɛŋshɛ, bɛɛ hiɛŋ. Ahiɛba miaụŋ-mu-ugondu ma Agwatana na Hwuri Kpaaŋ, banɛ ma maa hiɛ zhajɛ epe! Nazhɛ ga Shadrak, nɛ Mishak keeni Abɛdnigo banɛ ga nu ulwa ata.

²⁷Ibɛ po shɛgwuma, ne egwomina, ne ehiu, na ajɛmɛ-ụshɛrɛya keeni ajɛmɛ-ushaura agwuma holongonu aŋ apata hwɛɛ. Aa kwụbɛ maa ulwa njɛ shɛ atwa ga iyi elele na tu'waba ta aba o. Okwo tihiŋzhe tu uhiuhiu wa aba kaa tu hwoŋni shi, i zasa kaa iyi elele nɛ njɛ n-nduka ma aba o. A hwụjɛ shɛ kaa okwo ụhiụŋ mu nshikwo mu ulwa na tu'waba ta aba o.

²⁸Nazhɛ gɛ Nɛbukadnɛza hiɛŋ, Shɛtana ma Agwatana Shadrak, nɛ Mishak keeni Abɛdnigo na tumwanɛ butumwa bwa ba azuba maa bicingo miaụŋ mu bwa mu ugondu a na patanɛ bụ rishe, a na kaa sheyinji n-ndumwa mi mi. E meme gengeni bu maa kede a zhɛbɛ tuwa o, semi Agwatana aba kiri.

²⁹Iwɛbɛ po Ngɛɛ zhɛ mo shilo unu-tɛtɛtagana maa, Atwa elele, nu udenji we elele, na rɛjɛmɛ re elele a na a dumangana Agwatana Shadrak, nɛ Mishak keeni Abɛdnigo n-ndumwa mụ wɛ, ɛ zhɛ a jajaga aŋ wunzu wunzu, ɛɛ zhɛ a nda nhwaŋ ma aba ubizo. Iwɛnɛ ti yaa zasa Agwatana anya na ta namba eri a lashɛga bụtụ gana ubwa.

³⁰Nazhɛ agwuma gembicinji Shadrak, nɛ Mishak keeni Abɛdnigo nu ugondu ukpeleshi cɛnjɛ tu Babulon.