Read bassa DANIƐL 4 Bible Online

DANIƐL 4 - bassa bible

DANIƐL 4

¹Agwuma gɛ Nɛbukadnɛza, ubwa tumwanɛ utumwa ga no ofwo atwa elele, ne edenji elele, na rɛjɛmɛ re elele keeni cɛnjɛ tu unyizo hwɛɛ, bɛɛ hiɛŋ; Ge iyi elele ihiɛ zhɛmanɛ tebiye!

²I n shanɛ iyi unyasa maa mo hi mbiso eseyida keeni iyi ya arụhwajɛ nɛ Agwatana na Hwuri Kpaaŋ njɛ no ofwo mi.

³Eseyida ubwa hwuleji! Arụhwajɛ ubwa kaa gembi tebiye! Cɛnjɛ-ta-tugwama tu bwa tu namɛ unyizo-nom, ụhwada ubwa kaa namɛ tutu awaŋnɛ elele.

⁴Gamba gɛ Nɛbukadnɛza, N namɛ ni ihwɛ mi, iyi elele i n zhɛmanɛ, Ama ya tuwebiye nu umwamwa mu.

⁵Ti Ngee weci no ogodo mi Omo woto malabụ, Ngee wetegeni ụwalabụ uko na n zweni inyɛsɛ, Ama kwụba shizobu shɛ na shɛ njɛ maa ahaŋsa mi gembi ufwugwo maa ohwulu n herikeni.

⁶Iwɛbɛ po Ngee peni-unu maa ge suje atwa ti'inta elele a na namɛ nu Babulon iwɛ maa e m mbishi ecilo ụwalabụ ata.

⁷Aka na anjɛ-tishino, na anjɛ-tuwa, na awa-inibi keeni ashɛjɛ zhajɛ; Ngee mbishi aŋ ụwalabụ na Ngee wetegeni; ama e eri shi mo m mbiso ecilo ubwa o.

⁸Nu ukwunanga ibɛ, ga Daniɛl na ɛɛ hiɛŋ izeci ibwɛ gɛ Bɛltɛshaza[5] nɛ shɛ izeci tuwa ti mi zhajɛ no ofwo mi. Mpiala ma Agwatana[6] tijilo kaa mu namɛ na amɛ ubwa, Ngee swegeni bu ụwalabụ ata, Ngɛɛ hiɛŋ bụ.

⁹Oo Bɛltɛshaza, gabụ na bu hwuri anjɛ-tishino, M mepi maa Mpiala ma Agwatana tijilo mu namɛ na amɛ bụ, i zasa iyi tusweci ye elele ubu hwuleji ti'eshicigo. Ụwalabụ Ngee wetegeni na; gabụ tuba bi zhɛ bu mo m mbiso ya hwayɛ ecilo ubwa.

¹⁰Shizobu shɛ ata Ngaa kwụbɛ ti Ngee weci no ogodo mi na; N kwụbɛ ụ'wụ'wụ uko shikeni na ashashɛ cɛnjɛ tu unyizo ga; uzoto ubwa hwuleji.

¹¹Ụ'wụ'wụ ata wa kaana gu ugombo, waa 'yajɛ ikɛnyi, uzoto ubwa timengeni tụla; olugwo elele na kaa bụtụ namɛ tutu ukwunanga unyizo ga, bi zhɛ ba kwụba uŋ.

¹²Ambɛ ubwa pilanụ tebiye, tụ'walụ tu bwa kaa ti gembi tebiye, u shanɛ bụtụ be elele na namɛ nu unyizo ga iyimɛyɛ. Isundɛ ehilo ya ta ụhinjanụ nu uhwuŋnu ubwa, shanụnụ sha ta tuhwurugwo na shɛ'walụ shɛ bwa; iyi elele nɛ ya hwungwa ya ya tụ'walụ tu bwa.

¹³Ngaa kwụbɛ shizobu ti Ngee weci no ogodo mi, ta butumwa bu ko na kaa shɛ bụtụ bi tijilo banɛ na azuba bee kezhe.

¹⁴Baa uganɛ taawụụ, bɛɛ hiɛŋ, Lo ma ụ'wụ'wụ ata, jajaga ma shɛ'walụ shɛ bwa, bibizo ma ambɛ ubwa, garataga ma tụ'walụ tu bwa, unzo ma isundɛ ehilo maa i beni nu ucilo ubwa, ga shanụnụ shɛ pashangwụ na shɛ'walụ shɛ bwa.

¹⁵Ama tuba ganga ma ukwudungwuru keeni tini tu bwa na cɛnjɛ, umpo uŋ ma ụshɛmbɛrɛ keeni utumburɛ; ganga uŋ ma maa u nama apata na ambɛ. Ge cime tu no zwogono bu, go urobwo ubwa nama ni isundɛ ehilo nɛ namɛ na ambɛ na cɛnjɛ tu unyizo ga.

¹⁶Ga ahaŋsa butugwumwa beni na amɛ ubwa, bi zhɛ ba 'yaga ahaŋsa usunda ehilo shiywa shi cenje.[7]

¹⁷Tuhaŋsa tu ga tu banɛ no olugwo atumwa Agwatana a na shɛ a na tijilo. Iwɛbɛ po ga atwa elele na ta hwungwa mepi maa Agwatana na Hwuri Kpaaŋ ubwa 'yajɛ ụhwada cɛnjɛ-ta-tugwama ta atwa, bɛɛ zhɛ kaa ba pana bụtụ be elele na kwụlanɛ bụ, bɛɛ zhɛ kaa bo shikicingo bụtụ na ga 'nyanɛ uhwuri atwa vwɛ hwɛɛ maa pana bu ụhwada ata.

¹⁸Nazhɛ agwuma Nɛbukadnɛza hiɛŋ, Oo gabụ gɛ Bɛltɛshaza, ụwalabụ ga Ngee wetegeni ta. M mbishi ya ecilo ubwa. Iwɛnɛ po atwa ti'inta cɛnjɛ ti mi hwɛɛ eri shi mo m mbiso ecilo ubwa o; ama gabụ bi eri, iwɛnɛ tu Mpiala ma Agwatana tijilo mu namɛ na amɛ bụ.

¹⁹Nazhɛ inyɛsɛ shɛ Daniɛl na ɛɛ hiɛŋ du izeci ibwɛ gɛ Bɛltɛshaza te ilegeji. Ohwulu herikeni bu duwa. Ibɛ po agwuma hiɛŋ bụ, Kede ụwalabụ ga keeni ecilo ubwa tụdụma ibi herikeni ohwulu o. Gɛ Bɛltɛshaza jishijɛ bụ, bɛɛ hiɛŋ, Iyɛri mi, Ga ụwalabụ ga bụ keeni ecilo ubwa u sɛ nu uhiuhiu wa atwa i'ime bu!

²⁰Ụ'wụ'wụ ata abụ kwụbɛ, na wa kaana ugombo, unaa na kaa 'yajɛ ikɛnyi, ugata uzoto ubwa timengeni tụla, unaa na atwa elele na namɛ nu unyizo eri a kwụba;

²¹unaa na ambɛ ubwa pilanụ, ugata tụ'walụ tu bwa ti gembi tebiye; bụtụ be elele kaa ba ya tụ; isundɛ ehilo kaa ya ta ụhinjanụ nu uhwuŋnu ubwa; ugata shanụnụ sha ta tuhwurugwo na shɛ'walụ shɛ bwa.

²²Oo agwuma, gabụ bɛ shɛ ụ'wụ'wụ ata! Gabụ bi gembi, abɛ 'yajɛ kaa ikɛnyi; ugombo bu waŋnɛ wee timengeni tụla; ụhwada bụ kaa ce ukwunanga cɛnjɛ tu unyizo.

²³Gana na abụ kwụbɛ butumwa na shɛ bụtụ ata bi tijilo na banɛ na azuba kezhe, bụtụ ata kaa hiɛŋ, Lo ma ụ'wụ'wụ ata maa a njɛ uŋ ufwu; ama okwo ti yaa shɛ bwonu ganga ma ukwudungwuru ubwa keeni tini tu bwa maa u shikono na cɛnjɛ. Umpo uŋ ma ụshɛmbɛrɛ keeni utumburɛ maa u nama na ambɛ ata ehilo. Ge cime tu no zwogono bu, go urobwo ubwa nama ni isundɛ ehilo nɛ namɛ na ambɛ cɛnjɛ tu unyizo ga tutu i ci shiywa shi cenje.

²⁴Oo agwuma, ecilo ubwa na, Agwatana na Hwuri Kpaaŋ shiri unu-tɛtɛtagana ga maa ubu vwuteni gabụ iyɛri mi:

²⁵Ɛ zhɛ mo bu unzo maa beni no olugwo atwa, maa nama ni isundɛ ehilo, ɛ zhɛ ma bu nda maa na ya ambɛ gana buna, cime ti zhɛ to bu zwogono. Shiywa shi cenje shi zhɛ sha bu kashɛka, uuwa i ci aka na ebi mepi maa Agwatana na Hwuri Kpaaŋ ubwa untanganɛ cɛnjɛ-ta-tugwama ta atwa, ubwa kaa zhɛ ba pana tụ bụtụ be elele na kwụlanɛ bụ.

²⁶Gana na ta butumwa ata peni aŋ unu maa ge genji ukwudungwuru keeni tini tụ ụ'wụ'wụ ata. Aka na ebi mepi hwuŋ maa Agwatana ubwa untanganɛ ofwo elele, nazhɛ cɛnjɛ-ta-tugwama tụ bụ ti zhɛ to bu tomonono.

²⁷Oo agwuma, hwuwayɛ go, lono ahaŋsa ga Ama bu pana. Ganga iwɛwɛ tɛnda, maa na nda iyi nɛ teni cɛŋ, no hioko inyɛmɛnyɛmɛ yo okofwo, maa i 'wericinji tugworozwo tụ bụ. Nekeshi nazhɛ tɛzhɛmana tụ bụ ti zhɛ ta ta tuhwulo.

²⁸Ijɛ hwɛɛ vwutengeni agwuma Nɛbukadnɛza.

²⁹Na aba na ti ipiɛnɛ umpwa-ni-bɛyebi henici, tu boo rungo no osokwu umwamwa ubwa u tugwama nu Babulon,

³⁰bɛɛ hiɛŋ, Hioko ma gana na tu Babulon gembi tebiye! Gamba kaa n jwe uŋ maa ụ shɛ ụshɛpwụ na shɛ uhiu cɛnjɛ ti mi maa mo mbisono ugombo ukpahiŋ mu keeni ụjɛrụma igɛhi mi.

³¹Gana na tu baa ta duma iwɛ ɛtɛ, rụhwụŋ ru ko ru banɛ na azuba, rɛɛ hiɛŋ, Oo agwuma Nɛbukadnɛza, gabụ aa njɛ na bụ. O loshigwo ụhwada cɛnjɛ-ta-tugwama tụ bụ ni i'ɛlɛ bụ.

³²Ɛ zhɛ mo bu unzo maa beni no olugwo atwa, maa nama ni isundɛ ehilo. Ɛ zhɛ ma bu nda maa na ya ambɛ gana buna; cime ti zhɛ tu no bu zwogono. Shiywa shi cenje shi zhɛ sha bu hanika, uuwa i ci aka na ebi mepi maa Agwatana na Hwuri Kpaaŋ ubwa untanganɛ cɛnjɛ-ta-tugwama ta atwa. Ubwa kaa zhɛ ba pana tụ bụtụ be elele na kwụlanɛ bụ.

³³Gwunu ata iwɛ ɛtɛ aa jɛmɛ la iwɛ Nɛbukadnɛza i sɛ. Ee unzhi bu bee beni ga no olugwo atwa, bee kwuni ambɛ tiya gana buna, cime ti lemicinji tu'waba tu bwa; harɛ tihiŋzhe tu bwa ti njɛsanjɛ gana tihiŋzhe tu ugbeji; ibɛ po eswenyi ubwa a shɛ ya gana a na shanụnụ.

³⁴Nazhɛ agwuma gɛ Nɛbukadnɛza hiɛŋ, Aka na ta shiywa shi cenje shɛ ulwa, Ngee shepi eshe mi na azuba, nazhɛ tuhaŋsa ti mi tɛ zhɛmananɛ. Ibɛ po Ngaa shɛtanɛ Agwatana na Hwuri kpaaŋ, Ngee zhemonjino bu; Ngee peni bu ụjɛrụma; ubwa na namɛ unyizo-nom. Ngɛɛ hiɛŋ, Ụhwada ubwa ụ shɛ una unyizo-nom; cɛnjɛ-ta-tugwama tu bwa kaa tu namɛ tutu awaŋnɛ elele.

³⁵Bɛ rɛcɛ shɛ atwa elele na namɛ nu unyizo ga maa a shɛ iyi elele o. Ba nda iyi nɛ kwụlanɛ bụ; ubwa kaa untanganɛ atumwa Agwatana a na namɛ na azuba keeni atwa na jɛjɛ na cɛnjɛ tu unyizo ga hwɛɛ. I zasa bụtụ be elele na eri bo hoŋtono bu, maa, Imbe nɛ kwuŋ abɛ njɛɛ?

³⁶Aka na ta tuhaŋsa ti mi tu gwure pi mi, ta tumuna ti mi, ti igɛhi mi, ibɛ po ee m peneneni ụjɛrụma cɛnjɛ-ta-tugwama ti mi. Nazhɛ atwa mi shihwolu na atwa na 'yajɛ izeci n leshiji nu unyasa, ee n gwuricinji ni idwɛtwɛ tugwama ti mi, nazhɛ ụjɛrụma mu keeni ugombo duwa uhwuri aka cala.

³⁷Hwuwayɛ go, Gamba gɛ Nɛbukadnɛza, ma shɛtana Agwuma ata azuba, Mo gombicingo bu, Ama pana bụ ụjɛrụma; iwɛnɛ tu ugondu ubwa we elele teni cɛŋ, waa namɛ kaa ririri. Ubwa kaa eri be zucinje atwa elele na momo mungicingo.