Read bassa DANIƐL 6 Bible Online

DANIƐL 6 - bassa bible

DANIƐL 6

¹I kwụlanɛ Darius maa tala egwomina dipi-yebi-nu-woshi (120) maa a untangana cɛnjɛ-ta-tugwama ta ata hwɛɛ.

²Bee keeni aŋ atwa atatụ, bee teri Daniɛl medenji anya atwa eyebi maa a na ngbaraka ugondu na egwomina ata a nda; iwɛ maa e ne swegeni agwuma iyi elele nɛ ya nda maa kede ufwu njɛ agwuma o.

³Ti yaa namɛ fwalaa, ga Daniɛl kwuni timɛmɛ bɛcinjɛ ni iyi ibiye tɛnda tebiye bee hwuri atwa vwɛ a na baa nda ugondu na aba keeni egwomina du, iwɛnɛ tu (baa 'yajɛ) mpiala mi biye na amɛ ubwa. Ibɛ po agwuma a haŋsa maa bi zhɛ bo utogono bu cɛnjɛ-ta-tugwama tu bwa hwɛɛ maa untangana tụ.

⁴Nazhɛ atwa vwɛ ubwa ugondu keeni egwomina a dwalakaka iyi iwɛ nɛ maa e peteni Daniɛl iwɛ iyi cɛnjɛ-ta-tugwama ta ata. Ama e gwushiji shi kwukwuŋ iyi elele o; a kwụbɛ shɛ kaa utugbolo we elele na baa njɛ o, iwɛnɛ tu baa shɛ bụtụ bɛ tɛcara, iwɛbɛ po ee eri shi a kwụba ti'ina kwo kaa ụmụnɛ shɛ ụjɛrụma we elele no olugwo ubwa.

⁵Nazhɛ atwa ata mama hiaŋnụ, Ti zha shɛ ta kwụba iyi elele nɛ maa ta patana Daniɛl ga o, semi asha iyi nɛ imɛ undwa wa Agwatana ubwa tɛzhɛba.

⁶Nazhɛ egwomina ata keeni atwa na a ngbaraka ugondu wa aba zhe no ofwo agwuma, ɛɛ hiɛŋ, Oo Agwuma Darius, ya urugbo unyizo-nom!

⁷Ibɛ po atwa na untanganɛ cɛnjɛ-ta-tugwama ta ata hwɛɛ tɛ ɛsɛkpɛ agwuma, ta amadanga agwuma, te egwomina, ta ajɛmɛ-ushaura, aa twa-unu, iwɛ maa e shiri ụhwada wa agwuma, maa e shikicinji uŋ dimi maa bụtụ be elele na lụpɛ Agwatana oko kwo kaa binya bụtụ iyi ti yaa shɛ shɛ gabụ, uuwa i ci ijitɛ gɛ talacɛ, oo agwuma, ɛ zhɛ a kala bụtụ ata nụ ụpangwụ izeci.

⁸Hwuwayɛ go agwuma, shikicingo ụhwada ga, iwɛ maa shiyeni i'ɛlɛ bu, iwɛ maa kede e sheyinji uŋ o, ama ga ụ shɛ gana ụhwada wa atwa Mɛdɛs keeni una wa atwa Pɛsia.

⁹Iwɛbɛ po agwuma Darius shiyeni ga i'ɛlɛ ibwɛ ne ti'nyeci keeni undwa ata.

¹⁰Aka na ti ga Daniɛl mepi maa agwuma shiyeni i'ɛlɛ ibwɛ ne ti'nyeci ta ata, bee teni na amɛ umwono ubwa, agbahwụ amɛ umwono ubwa wa azuba kaa kapɛshɛngwa geri bu Jɛrusalɛm. Bo kwuzo no shilulo shɛ bwa karɛ tatụ ụjijita, baa nda adua, baa nda du ugwoje na Agwatana ubwa gana na tu baa shana ba nda.

¹¹Nazhɛ etwenyi ata mama ulwataganụ, oo to Daniɛl ugbe tu baa nda adua baa tabwa Agwatana ubwa, maa mbiyono bu.

¹²Aa 'waŋnɛ n-ndumwa mu unu-tɛtɛtagana ata agwuma shiri, ee zhe na agba agwuma, ɛɛ hiɛŋ, Shɛ gabụ suu bi shiyeni i'ɛlɛ bu nu unu-tɛtɛtagana undwa ata maa bụtụ be elele na lụpɛ Agwatana kwo kaa binya bụtụ iyi ti yaa shɛ shɛ gabụ, uuwa i ci ijitɛ talacɛ, oo agwuma, ɛ zhɛ a kala bụtụ ata nụ ụpangwụ izeci? Agwuma jishijɛ aŋ, bɛɛ hiɛŋ, Iwɛ-tɛkana ga yaa shɛ, gana na tu undwa wa atwa Mɛdɛs keeni una wa atwa Pɛsia na sheyinji shi namɛ.

¹³Ɛɛ jishijɛ agwuma, ɛɛ hiɛŋ, Oo agwuma, ga Daniɛl ga namɛ na ashashɛ miaụŋ mu Juda mu na ɛɛ imɛ, bi shiri shi acɛbɛ ni iwɛ bu keeni unu-tɛtɛtagana ga ebi shiyeni i'ɛlɛ bu o; ama ba nda adua ubwa karɛ tatụ nazhɛ uwaŋna teni.

¹⁴Aka na ta agwuma hwụjɛ n-ndumwa mu ga, mu gwumanɛ bụ duwa. Bee peteni kaa ahaŋsa ubwa gana na maa bicingo Daniɛl. Baa namɛ na tumakana ti ibɛ gana na maa lashaga bu uuwa uwaŋna teni jita ata.

¹⁵Ibɛ po etwenyi ata ụlwatagwụ na agba agwuma, ɛɛ hiɛŋ, Oo agwuma, mapa maa unu na agwuma tɛtaganɛ keeni okpogo na bee shiri bee shikicinji, ụ shɛ gana una wa atwa Mɛdɛs keeni una wa atwa Pɛsia unaa na kaa zha shɛ wo sheyingo kwukwuŋ.

¹⁶Nazhɛ agwuma peni aŋ unu maa ga shapɛ Daniɛl, aa shapɛ bụ ga ee keri bu nụ ụpangwụ izeci. Nazhɛ agwuma hiɛŋ Daniɛl, Ga Agwatana ata bụ aba zhɛba aka elele ubu leshiji.

¹⁷Aa shapɛ utayɛ ee kepi unu ụpangwụ ata. Nazhɛ agwuma njɛ uŋ useyida na bukanɛ bi ikɛnyi ibwɛ keeni bu na ba azhɛgba ubwa, iwɛ maa kede bụtụ be elele sheyinji iwɛ Daniɛl kwukwuŋ.

¹⁸Aka na ta agwuma gwuri nu ukpogwu ubwa. Bɛ yɛ shɛ iyi elele nụ ụrụmɛ ata uuwa iyi heri o; e sugeni shi bu tụlagwụ te elele o; bu weci shi kaa du malabụ kwukwuŋ nụ ụrụmɛ ata o.

¹⁹Ti iyi heri, agwuma gbatụ ti'ishijɛ nu uvwungwa dididi, boo mbo tahaŋnụ bee zhe no ofwo ụpangwụ ata izeci.

²⁰Aka na tu boo gwumwonu nụ ụpangwụ izeci ɛtɛ ga Daniɛl namɛ, bee keri Daniɛl ụhiɛŋshɛ na rụhwụŋ rụ 'wụtụ, bɛɛ hiɛŋ, Oo gabụ ga Daniɛl, gabụ yɛu-ugondu ya Agwatana uumwa, Agwatana ga bụ aba zhɛba aka elele, bi eri ma bu lashɛga no olugwo izeci gɛ hŋ?

²¹Ga Daniɛl jishijɛ Agwuma, bɛɛ hiɛŋ, Oo agwuma, ya urugbo unyizo-nom.

²²Agwatana tumwanɛ butumwa bwa, bee kepi unu izeci, ibɛ po e eri shi ma n nda iyi elele, iwɛnɛ ta a n kwụbɛtanɛ shɛ utugbolo we elele ne eshe ubwa, te eshe bu du. M bu 'wanganɛ shɛ okwo ni iyi elele o.

²³Nazhɛ agwuma bweji unyasa duwa, bee peni aŋ unu maa gɛ bɛcinjɛ ya Daniɛl nụ ụpangwụ ata. Ɛɛ bɛcinjɛ ga Daniɛl nụ ụpangwụ ata, a kwụbɛ shɛ kaa iyi elele nɛ gwụdɛrɛjɛ bụ o, iwɛnɛ tu baa tɛtanɛ Agwatana ubwa rishe.

²⁴Nazhɛ agwuma peni aŋ unu maa ge suje atwa ata ga suyanɛ Daniɛl ụshɛrɛya, ee suje aŋ ga, aa 'wɛŋ nụ ụpangwụ ata izeci; ta miaụŋ ma aba, te eyikwo aba. Ibɛ izeci ɛtɛ kwuni aŋ tusa na azuba tobwolo e te ci shi uvwi ụpangwụ ata o. Ee bwereteji o'umpwo aba rukwurukwu.

²⁵Nazhɛ agwuma Darius 'nyeci utakada bee peni atwa elele, tu udenji we elele keeni rɛjɛmɛ re elele ru na ru namɛ no ofwo elele na cɛnjɛ tu unyizo, bɛɛ hiɛŋ, Ga ihiɛ zhɛmanɛ tebiye!

²⁶Mo shilo unu-tɛtɛtagana no ofwo elele na ụhwada cɛnjɛ-ta-tugwama ti mi teje, maa ga atwamwa zhɛgɛdanɛ maa a sụmɛ Agwatana Daniɛl inyɛsɛ. Iwɛnɛ po ubwa shɛ Agwatana uumwa; ubwa kaa zhɛ ba ya tugwama unyizo-nom, cɛnjɛ-ta-tugwama tu bwa kaa ti zha shɛ ta nda ufwu o, ụhwada ubwa kaa zha shɛ wa 'yaga ukwunanga kwukwuŋ.

²⁷Ubwa ba lashɛga bụtụ, ubwa kaa bo bicingo bụtụ; ba nda iyi tudama keeni arụhwajɛ na azuba keeni cɛnjɛ tu unyizo. Ubwa kaa leshiji Daniɛl nu ukpahiŋ izeci.

²⁸Gana yaa zhɛmanɛ Daniɛl na aka tugwama tu Darius keeni na aka tugwama tu Sairos na shɛ Bupɛsia ata ta.