Read bassa DANIƐL 7 Bible Online

DANIƐL 7 - bassa bible

DANIƐL 7

¹Nu uywa ata uhiiŋ gɛ Bɛlshaza yɛ tugwama tu Babulon, ibɛ du ga Daniɛl wetegeni ụwalabụ, baa kwụbɛ shizobu ti bee weci no ogodo ubwa. Bee 'nyeci ụwalabụ ata ubwa.

²Ga Daniɛl hiɛŋ, N kwụbɛ ozobu nụ ụjita, mpiala mu banɛ ne esugwulumi unyizo eneshi me vwunji na azuba itekwu.

³Nazhɛ isundɛ ehilo i'wɛtwɛ nɛ namanjɛ swoswoswo ni inyɛ bananjɛ ni itekwu ɛtɛ.

⁴Bu na bi hiiŋ shɛ gana bizeci, baa 'yajɛ apiambɛ ugbeji. Ngaa ngbaracɛ bụ uuwa i ci aka na ee mushenji tɛhiɛŋzhɛ ta apiambɛ ubwa hwɛɛ, ɛɛ ishicinjɛ bu ee shikicinji ivwunɛ ibwɛ iyebi na cɛnjɛ gana bụtụ. Ee peni bu ahaŋsa butugwumwa.

⁵Ngaa kwụbɛ tu usunda uyebi unya na shɛ gana ucwee, ishicinjɛ bụ'aŋbụ bwa bu ko. Ikpɛngɛ itɛtu zweni na ashashɛ ene unu ubwa. Ɛɛ hiɛŋ bụ, Ishijɛ maa yɛ usunda duwa.

⁶Na aba inɛ gɛ, tu Ngaa ngbaracɛ, Ngaa kwụbɛ, usunda unya na shɛ gana ugebi, na 'yajɛ apiambɛ ụnụnụ eneshi na aba ubwa; bi 'yajɛ du ohiuhiu eneshi. Ee peni bu kaa ụhwada.

⁷Na aba inɛ ɛtɛ Ngaa kwụbɛ ozobu anya nụ ụjita, usunda uneshi na wa sha bụtụ inyɛsɛ, na 'yajɛ igɛhi, na ikɛnyi ibwɛ hwuleji; ene ubwa shɛ ụshɛmbɛrɛ na gembi tebiye. Bu na ata hwoŋzhinji iyi, bee bwereteji iyi; bee rikeci inɛɛ nɛ ga vwɛ ni ivwunɛ ibwɛ rukwu rukwu. Bu na ata namɛ swooŋ ni isundɛ nɛ ge hwurembe nu bwa hwɛɛ. Mahiuaŋ mu bwa mu namɛ umpwa.

⁸Aka na Ama haŋsa iwɛ mahiuaŋ ma ata mu bwa, Ngaa kwụbɛ ta mahiuaŋ mi nya mu unshɛ na ashashɛ mu na ata, mu namɛ cwɛŋ bana, ee mushenji mahiuaŋ me ebe mi hiiŋ mu tatụ. Mahiuaŋ ma ata mi 'yajɛ eshe gana a na bụtụ, maa 'yajɛ unu na wa busa ni ishɛkɛ tụdụma.

⁹Gana na tu Ngaa ngbaracɛ, ee tileni n-ndụtwụ no ofwo ata, Nazhɛ bụtụ ata namɛ unyizo-nom jɛjɛ. I'wɛŋnɛ nɛ bee urigeni cɛnjɛmɛ paawụụ gana tizhe, tihiŋzhe tu uhiuhiu ubwa tɛ shɛ tɛ cɛnjɛ gana egbeyi ụgwụdụ, tu namɛ shɛshɛshɛ. Bụratụ bu ulwa bo gorogo ni idwɛtwɛ ɛtɛ ibwɛ, ikɛgbɛ ivwunɛ ibwɛ i shɛ ulwa na wo gorogo.

¹⁰Urefu ulwa wa banɛ nu umbe ubwa, waa fwunga. Atwa igbɛɛ igbɛɛ a ndana bụ iyi, atwa igbɛɛ dupu karɛ dupu shikekeni nu umbe ubwa. Ee shikicinji umwono-ụshɛrɛya tụdụma, ee kepeshenji atakada ofwugwo.

¹¹Tu Ngoo to tuhwulo ta tungbaraka iwɛ n-ndumwa mi ishɛkɛ mu na mahiuaŋ mu ga mi ticwɛŋ ma dumanga, uuwa i ci aka na aa kwụnɛ usunda ata, aa njɛ tu'waba tu bwa ufwu. Nazhɛ ee shepi uŋ ee keri nu ulwa ata wo gorogo.

¹²Nazhɛ ee leshiji ụhwada isundɛ ɛtɛ i vwɛ, ama e genji aŋ maa a yɛ uraiŋ na aka na gwumwa ụnjɛswa.

¹³Nazhɛ Ngaa kwụbɛ bụtụ bu ko na sụbɛ yɛu bụtụ, na amɛ ozobu ata mi nụ ụjita, tu baa zhagajɛ no odomu tụla. Baa zhajɛ no ofwo bụtụ ata namɛ unyizo-nom, ee zeriji bu na agba ubwa.

¹⁴E peni bu kaa ụhwada keeni ụjɛrụma keeni cɛnjɛ-ta-tugwama; iwɛ maa ga atwa elele, ne edenji elele keeni rɛjɛmɛ re elele a zhɛbɛ bụ. Ụhwada ubwa kaa ụ shɛ una unyizo-nom, unaa na zha shɛ wo hwuwowu, cɛnjɛ-ta-tugwama tu bwa kaa ti zha shɛ ta nda ufwu kwukwuŋ.

¹⁵Amɛ mi hashɛganụ Gamba ga Daniɛl, shizobu shɛ na Ngaa kwụbɛ kaa shi n herikeni ohwulu tebiye.

¹⁶Ibɛ po Ngee zhegeni bụtụ bu ko na shikeni apata na ashashɛ atwa ata, Ngee heŋteni bu gana na tugom ti ijɛ tɛ shɛ hwɛɛ. Nazhɛ bee m mbishi, bee n eshicigeni ecilo ijɛ hwɛɛ.

¹⁷Bɛɛ hiɛŋ, Isundɛ ɛtɛ i'wɛtwɛ ineshi i shɛ cɛnjɛ-ta-tugwama ti neshi tu na ti tɛ zhɛ tɛ ishijɛ hwuŋ nu unyizo ga.

¹⁸Ama atwa tijilo ụ Bụtụ ata na Hwuri Kpaaŋ zhɛ a lashɛga cɛnjɛ-ta-tugwama ta ata, ɛɛ zhɛ a untangana tụ tutu unyizo-nom.

¹⁹Ibɛ po yaa n kwụlanɛ ya maa Ma mapa tugom te ecilo usunda ata uneshi, ubwa shɛ una ata namɛ swooŋ ni inɛ vwɛ hwɛɛ, unaa na kaa wa sha bụtụ inyɛsɛ duwa, ubwa na ene ubwa a shɛ ụshɛmbɛrɛ, na kaa eswenyi ubwa a shɛ utumburɛ; ubwa kaa hwoŋzhinji iyi, bee bwereteji iyi rukwu rukwu, bee rikici inɛɛ nɛ vwɛ ni ivwunɛ ibwɛ.

²⁰Ama jala du maa ma mapa iwɛ mahiuaŋ ma ata umpwa mu namɛ nu uhiuhiu ubwa keeni iwɛ mahiuaŋ mi nya mu gata mu unshɛ la hiiŋ nazhɛ mu tatụ mu mushongwu. Muba mɛ shɛ mahiuaŋ ma ata mi 'yajɛ eshe keeni unu na wa busa duwa. Abụ kwụbɛ mụ mɛ shɛ maa mi gembi mee hwuri mu na mụ vwɛ hwɛɛ.

²¹Gana na tu Ngaa ngbarakacɛ, Ngaa kwụbɛ ta mahiuaŋ ma ata gbaa mu sukanɛ atwa ebe tijilo nu ujasa, maa lasụ aŋ.

²²Nazhɛ bụtụ ebe ba ya uraiŋ unyizo-nom pushe, bee enenji ụshɛrɛya tụlụkpashɛ ta atwa tijilo ụ Bụtụ ata Hwuri Kpaaŋ. Aka na ta aka i ci nazhɛ atwa ata tijilo leshiji cɛnjɛ-ta-tugwama ta ata.

²³Bee n eshicigeni, bɛɛ hiɛŋ: Usunda ata uneshi ụ shɛ cɛnjɛ-ta-tugwama ti neshi tu na ti tɛ zhɛ ta nama na cɛnjɛ tu unyizo ga. Ti zhɛ kaa ta nama swooŋ na cɛnjɛ cɛnjɛ-ta-tugwama tu na tụ vwɛ, ti zhɛ kaa ta twala cɛnjɛ tu unyizo hwɛɛ, bɛɛ zhɛ bo rikito tu, maa bwarataga tụ rukwu rukwu.

²⁴Mahiuaŋ ma ata umpwa mɛ shɛ shɛgwuma umpwa shɛ na shi zhɛ sha untangana cɛnjɛ-ta-tugwama ta ata. Nazhɛ agwuma anya zhɛ a banɛ; bu na ata zhɛ ba nama swooŋ na ma shɛta shi hiiŋ; bi zhɛ kaa ba lasụ shɛgwuma sha ata shɛ tatụ.

²⁵Bi zhɛ ba dumangana Bụtụ ata Hwuri Kpaaŋ n-ndumwa mụ wɛ, bɛɛ zhɛ kaa ba pɛpɛtana atwa tijilo ụ Bụtụ ata Hwuri Kpaaŋ. Bi zhɛ ba makana maa sheyingo andwa tɛzhɛba ta aba keeni nsono ma aba, atwa Agwatana kaa zhɛ a nama tuta tụ ụhwada ubwa shiywa shɛ tatụ na ashashɛ.[9]

²⁶Nazhɛ ajɛmɛ-ụshɛrɛya zhɛ a gɛga, ɛɛ zhɛ a lashɛga ukpahiŋ ubwa, ɛɛ zhɛ a nda bụ kaa ufwu hwɛ hwɛɛ.

²⁷Nazhɛ ɛɛ zhɛ o sugo ukpahiŋ, nu ugombo keeni cɛnjɛ cɛnjɛ-ta-tugwama tu unyizo hwɛɛ a pana atwa tijilo ụ Bụtụ ata Hwuri Kpaaŋ. Cɛnjɛ-ta-tugwama ta aba ti zhɛ ta nama unyizo-nom, ehiu cɛnjɛ tu unyizo ga hwɛɛ zhɛ a sha miaụŋ-mu-ugondu ma aba, ɛɛ zhɛ na hwuga-unu wa aba.

²⁸Ukwunanga iwɛ ɛtɛ u m peni ohwulu tuhoroko tebiye. Eshe mi sheyinji; ama N untanganɛ kaa iwɛ ɛtɛ na ahaŋsa mi.