Read bassa DANIƐL 8 Bible Online

DANIƐL 8 - bassa bible

DANIƐL 8

¹Ti gɛ Bɛlshaza yɛ tugwama, yaa namɛ shiywa shɛ tatụ, Ngaa kwụbɛ ozobu Gamba ga Daniɛl, a na ata namɛ swooŋ na a na ala ihiiŋ.

²Eshigiri Ngee meme pushiteni nụ ụdatụ ụshɛpwụ ata ụ'wụtụ u Susa na namɛ nu ukpeleshi cɛnjɛ ti Elam, ti Ngee shikeni nụ ụpalanụ Urefu Ulai.

³Ngee shepi eshe, Ngaa kwụbɛ udagba tu wee shikeni to dongonu Urefu ata, bi 'yajɛ mahiuaŋ mi yebi, mahiuaŋ ma ata kaa mɛ njɛsanjɛ. Ama mu ko mɛ njɛshɛ mee hwuri mi nya, mu na ata mɛ njɛshɛ muba kaa mu unshɛ umɛwɛɛ.

⁴Ngaa ngbaracɛ udagba ata tu waa sala geri bu uwaŋna-twonuo, tụ ụzalụ tuzuba keeni tuta. I zasa usunda ehilo we elele kaa eri wa kapana bu uhwaŋna kwo kaa eri wa banangana ukpahiŋ ubwa o. Ba nda gana elele na kwụlanɛ bụ, boo momo mungicingo.

⁵Gana na ta Ama haŋsa iwɛ ijɛ, eshigiri upi uko banɛ geri bu uwaŋna-twonuo waa kashɛka woo gozhigo tebiye, ivwunɛ ibwɛ kaa timengeni shi cɛnjɛ o. Bi 'yajɛ kaa mahiuaŋ mu ko mụ 'wụtụ na ashashɛ eshe ubwa.

⁶Baa zhaganɛ udagba we ebe 'yajɛ mahiuaŋ mi yebi, bu gata Ngaa nga kwụbɛ ti bee shikeni nu ukwoswo Urefu; bee gezhiji bee zhe pu bwa ni isɛbwɛ ibwɛ ti'ishijɛ hwɛɛ.

⁷Ngaa kwụbɛ tu baa zhajɛ boo dongonu udagba ata. Nazhɛ isɛbwɛ ibwɛ ishijɛ, baa sukakanɛ udagba ata. Bee kwuni bu ijibi, baa kwusatajɛ mahiuaŋ me ebe mu bwa mi yebi. Udagba ata kaa zasa ya ukpahiŋ maa shikono nu umbe ubwa o. Boo po bu na cɛnjɛ, bee rikeci bu fwaiŋ fwaiŋ. I zasa kaa bụtụ be elele na eri ba lashɛga udagba ata ni i'ɛlɛ ibwɛ o.

⁸Nazhɛ upi ata wa kaana tumama sata duwa. Ama aka na tu waa 'yajɛ ya ikɛnyi hwɛɛ, nazhɛ mahiuaŋ me ebe mu bwa mu ko mụ 'wụtụ mu dwonu. Nazhɛ mahiuaŋ mu urishi mi neshi mu unshɛ ya tụlụkpashɛ ta muba mu na mu na mu ngbaracɛ geri ba akakalụ azuba eneshi.

⁹Nazhɛ mahiuaŋ mu ko mi ticwɛŋ mu unshɛ na mahiuaŋ mu ko na ashashɛ mahiuaŋ me ebe mi neshi, maa waŋna nu ukpahiŋ geri bu tuta, nu geri bu uwaŋna-banụ keeni geri ba cɛnjɛ tu unu-tishilono.

¹⁰Maa waŋnɛ tutu mee timengeni unyama wa azuba; mɛɛ 'wɛŋ emeseyi unyama iyi ya azuba keeni mkpasu na cɛnjɛ, mee rikeci aŋ.

¹¹Mee meme gembicinji tutu uhiu we ejeshi azuba, mee ngwuricinji ụrụpɛ tuhwoŋzhingo unaa na aa ga pana bụ ụjijita, mee heshigeni ohwolu tijilo umwono wa Agwatana.

¹²Ee jinekeni mu atwa tijilo iwɛnɛ aa nda iwɛwɛ[10] apata, medenji ụrụpɛ tuhwoŋzhingo na aa ga uranga tuta tutu. Ibɛ po aa kalagajɛ tɛzhɛba tu tugom na cɛnjɛ. Iyi elele nɛ kaa mahiuaŋ ma ata ma nda, i zhɛmanɛ mụ hwɛɛ.

¹³Nazhɛ Ngaa hwụjɛ ta bụtụ bi tijilo bu ko heŋteni binya bwa, bɛɛ hiɛŋ, Ụkwụmbwụ naa ijɛ aa kwụbajɛ no ozobu ga zhɛ ya uranga yo too? Ụkwụmbwụ naa iwɛwɛ gɛ i ci'nyɛ nɛ leshiji ụrụpɛ tuhwoŋzhingo na aa ga ta iyi-heri zhɛ ya kwunangaa? Ụkwụmbwụ naa turukoto tu na oo rukoto ejeshi azuba keeni ohwolu tijilo umwono wa Agwatana ti zhɛ ta kwunangaa?

¹⁴Ngaa hwụjɛ ta bụtụ ata be tijilo binya jishijɛ bụ, bɛɛ hiɛŋ, I tɛ zhɛ ya uranga tutu i ci ijitɛ keeni avwungwa ugbaa-nu-kpakwụ-ni-dipi-yebi; (2,300) nazhɛ ohwolu ata tijilo umwono wa Agwatana zhɛ a namanana shɛshɛshɛ.

¹⁵Aka na Ngaa ngbaracɛ ozobu ata Gamba ga Daniɛl, Ama makana maa mo eshicigo ecilo aba, nazhɛ bụtụ bu ko zhajɛ bee shikeni nu umbe mu eshigiri.

¹⁶Ngaa hwụjɛ rụhwụŋ ra bụtụ bu ko nu ukwoswo Urefu ata Ulai, raa suyanɛ ụhiɛŋshɛ, rɛɛ hiɛŋ, E-Gebrɛl, eshicigono bu ecilo ozobu ata baa kwụbɛ.

¹⁷Ge Gebrɛl ata zhajɛ ga boo dongonu ofwo na Ngee shikeni, ibɛ inyɛsɛ i n shɛ, Ngee leyi Ngee ubi ụpɛshɛka mu na cɛnjɛ. Bɛɛ n hiɛŋ, Ɛ-yɛu bụtụ, eshicigo maa ecilo ozobu ata a shɛ iwɛ aka ukwunanga unyizo ga.

¹⁸Gana na tu baa ta duma iwɛ ne mi, ti Ngee te ubi ụpɛshɛka mu na cɛnjɛ; M meme mepi shi ya o. Ama ubwa n ishicinjɛ n shikicinji ni ivwunɛ mi to.

¹⁹Bɛɛ hiɛŋ, N zhɛ mo bu mbisono iyi nɛ zhɛ ye teni hwuŋ na aka umɛwɛɛ na shɛ aka isɛbwɛ ya Agwatana. Ozobu ata a shɛ iwɛ aka umɛwɛɛ a na ee shiri swooŋ na aka ibɛ.

²⁰Udagba ata abụ kwụbɛ na 'yajɛ mahiuaŋ mi yebi, ụ shɛ ụsụbwa shɛgwuma shi yebi sha atwa Midia keeni atwa Pɛsia.

²¹Upi ata ụ shɛ ụsụbwa wa agwuma Egrik, mahiuaŋ ma ata mụ 'wụtụ mi cimbeni na ashashɛ eshe ubwa eyebi, mɛ shɛ ụsụbwa wa agwuma ata ihiiŋ.

²²Mahiuaŋ ma ata mi neshi mu unshɛ nu ucilo mu na ata mu dwonu, mɛ shɛ ụsụbwa cɛnjɛ-ta-tugwama ti neshi tu na ti zhɛ tɛ ishijɛ na ashashɛ edenji ubwa, ama ukpahiŋ wa aba zha shɛ wo to una cɛnjɛ-ta-tugwama ta ata ti hiiŋ o.

²³Aka na tu ukwunanga cɛnjɛ-ta-tugwama ta ata ta aba tu gwumwonu hwuŋ, ɛ zhɛ a sha ogworozwo duwa, maa e peni aŋ ulwapɛ. Agwuma oko na hweteni, na kaa 'yajɛ amiaụŋ, na kaa shɛ bihelekeci zhɛ bɛ ishijɛ.

²⁴Bi zhɛ na kaana ikɛnyi ti'yaga, ama shɛ nu ukpahiŋ ubwa kaa baa nda iŋ o. Bi zhɛ ba karɛ iyi ufwu tɛnda nɛ hwuleji, iyi elele nɛ baa nda kaa ya 'yagana bụ eshe. Bi zhɛ bo iricingo atwa na 'yajɛ ikɛnyi tebiye keeni atwa tijilo Agwatana hwɛɛ.

²⁵Bi zhɛ ba nda maa gɛ ihwɛŋnɛ i tuhalakaka tu bwa i 'yagana bu eshe tedure na ti'inta tu bwa tɛnda. Bi zhɛ kaa na busa iwɛ ikɛnyi ibwɛ nɛ baa 'yajɛ, bɛɛ zhɛ kaa bo iricingo atwa ofwugwo uzawa timbiso. Bi zhɛ du ba sukakana Agwuma shɛgwuma, ama bi zhɛ bo dwonu, asha shɛ ukpahiŋ butugwumwa kaa njɛ iŋ o.

²⁶Ozobu ata ee bi eshicigeni iwɛ arụpɛ arụmɛ keeni a na avwungwa a shɛ iwɛ-tɛkana ɛ zhɛ ɛ sɛ. Ama swaka aŋ tugwo, iwɛnɛ ɛɛ tɛ zhɛ e ilogogo nazhɛ ɛ sɛ.

²⁷Nazhɛ eshe n njɛ vwuuŋ Gamba ga Daniɛl, Ngee leyi nụ ụngwụ maa ijitɛ imbɛnɛ. Nazhɛ Ngɛɛ ishijɛ Ngee zhe nu ugondu na agwuma n shileni tɛnda, ama ozobu ata kaa a n dama tebiye; i zasa kaa bụtụ be elele na eshiciji aŋ o.