Read bassa HOSIA 12 Bible Online

HOSIA 12 - bassa bible

HOSIA 12

¹Uvwugo ubwa shɛ iyimɛyɛ ya atwa Ifrem, o urugono uvwugo uwaŋna-banụ nu usumwa, te kwuni nu uvwungwa tutu ụrụmɛ. Tukata keeni abwagara a kaana ugombo na ashashɛ aba. A nda tihinya na atwa Asiria, oo sugo manɛbɛ ma buta aa zha Ijipti.

²AGWANGWAMA o 'wogo uwuru na Juda, bɛɛ zhɛ kaa ba pana Jekob ulwapɛ, iwɛ ihwɛŋnɛ nɛ baa nda iyi. Bi zhɛ kaa ba tụpana bụ te teni cɛŋ ni iyi nɛ baa nda.

³Bɛ 'imɛ la batagwụ bwa ge Isụ na aa shɛ ɛdɛngwurɛbɛ nu bwa ushikwuru, aka na aa ta namɛ ni igwune tumata. Aka na tu baa waŋnɛ, baa twa ifelu na Agwatana.

⁴Bu twa la ifelu na Butumwa ba Agwatana ba azuba, baa lasụ bụ, baa cwɛ-u'wo tu baa lụpa maa e peni bu uwebiye. Agwatana zhaganɛ bụ ni Bɛtɛl, baa jɛmɛ n-ndumwa nu bwa.[41]

⁵Ubwa ganana shɛ AGWANGWAMA na shɛ Agwatana na Hwuri Kpaaŋ. AGWANGWAMA ɛɛ hiɛŋ izeci tɛzhɛgba tu bwa.

⁶Ibɛ po gwure ma pa Agwatana hiŋ, untangana ma tulubo, keeni ụshɛrɛya u tishiriri dimi, ima ma isɛbwɛ maa hi 'yaka Agwatana hiŋ tutu.

⁷AGWANGWAMA hiɛŋ, Atwa Isrɛl 'waŋnɛ timenji ta tukata ni i'ɛlɛ ya aba, iwɛnɛ to o lubo orugwusu tɛnda atwa na aa sangana i'wɛŋnɛ ya aba.

⁸Ge Ifrem mama zhɛzhɛna, bɛɛ hiɛŋ, N shɛ ya bɛzhɛgba. N 'yajɛ ya uduciya iwɛ ikɛnyi mi. A kwụbɛ shɛ iyi iwɛ kwo kaa iwɛwɛ ye elele nɛ Ngaa njɛ kwukwuŋ.

⁹Gamba n shɛ AGWANGWAMA na shɛ Agwatana hiŋ, na ihi bɛcinjɛ la ni Ijipti. N zhɛ ma nda maa hi namanana no shimwono shi hiŋ, gana na ahia nama la na shɛba na aka na ahiɛ namɛ la nụ ụshɛka, na aka iyimɛyɛ isene tiya.

¹⁰Gamba n jɛmɛ n-ndumwa ne egesere, Ngee peni aŋ shizobu shi ufwugwo. Ngaa tɛtaganɛ atwa mi unu tedure ne egesere ata.

¹¹Atwa na namɛ ni Giliad suu shɛ ogworozwo? Atwa ata shɛ atwa tusashɛ! A ta suu ụrụpɛ ni inɛ ye eyi ni Gilgal? Otukwu-ụrụpɛ aba na namɛ apata kaa zhɛ a sha ogbudu atayɛ no okporo shihilo.

¹²Ge Jekob gezhiji la, bee zhe na cɛnjɛ ta atwa Aram, maa zanɛ biyikwo, apata baa ndanɛ binua bwa ugondu wa agwụdụ tungbaraka.

¹³AGWANGWAMA tumwanɛ la bigesere bwa, bɛɛ lɛshijɛ atwa Isrɛl na tijama ta atwa Ijipti, iwɛ maa bu na ngbaraka aŋ tedure ne bigesere ata.

¹⁴Ama atwa Ifrem ishicinjɛ isɛbwɛ ya AGWANGWAMA tebiye. AGWANGWAMA kaa zhɛ a patana aŋ tijama te mehieŋ mu na mu fwụnjɛ. Bi zhɛ kaa be gwuricingeni aŋ tutwa ta aba.