Read bassa HOSIA 6 Bible Online

HOSIA 6 - bassa bible

HOSIA 6

¹Nazhɛ atwa ata hiɛŋ, Hwure tu gwuri ma pa AGWANGWAMA, iwɛnɛ ti yaa shɛ ubwa ụtụ gwụcanjɛ, ama bi zhɛ kaa ma tɛ nɛnga gom. Ubwa ụtụ bwuranjɛ, ubwa kaa du zhɛ bo umponono andala tu.

²Na aba ijitɛ iyebi, bi zhɛ mɛ ti hicinjɛ, bi zhɛ kaa mɛ ti ishicinjɛ nu ụjita ụtatụ, iwɛ maa ta shaanana buumwa maa ta nama na agba ubwa.

³Mizha ti mepi ma AGWANGWAMA, ti shanɛ ma ikɛnyi maa ti mepi bu ma, bi zhɛ ba zhajɛ pu tu kakayɛ tilɛɛ, gana aka na ti iyi ye suje. Bi zhɛ ba zhajɛ pu tu tilɛɛ gana ɛgbɛrɛshɛ, keeni eshilo ɛhɛnɛnɛyɛ, anaa na o zhizhongo cɛnjɛ meni.

⁴Oo gabụ ge Ifrem, imbe Ngaa shɛ ma bụ ndaa? Oo gabụ go Juda, imbe Ngɛɛ zhɛ ma bụ ndaa? Tulubo ti hiŋ tɛ shɛ gana uzhikwozhikwo keeni cime tu na ta gbatụ tu'waŋ nu uvwungwa dididi.

⁵Iwɛbɛ po Ngee hi leji tedure nu utumwa we egesere mi, Ngaa hiɛ kwụnɛ kaa tedure nu n-ndumwa mu unu mu. Ụshɛrɛya mu kaa namɛ kpataa gana uhioko-uhwaŋna.[14]

⁶Tulubo ti hiŋ ti tikpeke Ama jala, N jeri shi ụrụpɛ o. Ma jala maa hi m mepi Gamba Agwatana hiŋ, uhwuri arụpɛ tuhwoŋzhingo.

⁷Ama gunu na te e teni cɛnjɛ ta ata, e bweji unu na Ngaa twa na aba gana Adam,[15] apata kaa du aa n shanɛ shɛ atwa tɛcara.

⁸Giliad shɛ ụshɛpwụ ụ'wụtụ wa atwa na a nda iyi iwɛ, atwa tụkụna kiri aa namɛ ni ibɛ aka elele.

⁹Gana na ashɛrɛ ubegeni, ee gwubeji bụtụ, gobwonu du onongbo momo tonu, aa kwụna atwa nu uhwaŋna ata zhe Shɛkɛm,[16] apata aa ndaanana iyi elele nɛ shɛ iyi i ci'nyɛ hwɛɛ!

¹⁰N kwụbɛ iyi ukwara ni ihwɛ Isrɛl, apata kaa tuwɛle ti Ifrem tu namɛ, atwa mi Isrɛl meme heshigeni.

¹¹Oo ahiɛba atwa Juda, N dwowo aka na maa ma bu pana du ulwapɛ iwɛ iyi iwɛ nɛ ahia ndangana hwɛɛ, ibɛ shɛ aka na Ngɛɛ zhɛ me gwuricingeni atwa mi ugwoje wa aba sasana.