Read bassa HOSIA 7 Bible Online

HOSIA 7 - bassa bible

HOSIA 7

¹Aka elele na Ama jala maa ma nɛnga atwa mi Isrɛl, nazhɛ iyi iwɛ Ifrem ya banɛ ya uvwi, keeni tugworozwo tu Samaria. Hi mama ndanụ orugwusu, ahia bwarataga shimwono, ohio tono ahia nda izunde, ahia lashaga atwamwa i'wɛŋnɛ ne ekpekiti ụshɛpwụ.

²I te teni shi kwukwuŋ na shihaŋsa shi hiŋ, maa N tɛ zhɛ me teyinje iyi nɛ ahia nda. Ama iwɛwɛ nɛ ahia ndangana hwɛɛ rugwutwonu ofwo elele na ahiɛ namanjɛ hwɛɛ. N eri shi mo ngwulo iŋ kaa tungbaraka kwukwuŋ.

³AGWANGWAMA hiɛŋ, Atwa ata helekeci agwuma tedure no tugworozwo ta aba, ee helekeci du miaụŋ mu tugwama tedure nụ ụzagwụ-tundwatwaga.

⁴A shɛ anjɛ-tuwɛle kpaaŋ aba, a shɛ gana ulwa na gereji shi, ama wa nda kaa nshikwo mụ 'wụtụ na a'alụ, unaa na kaa bɛnjɛ be ciyikwo ta ata sugwuleni shi, uuwa i ci aka na ee hweci inɛmɛ maa o to ya ulupwo.

⁵Mayaga ma ngba agwuma, ta miaụŋ mu tugwama, aa shɛ ya gana shɛlagwụ nu ụjita ata u titeyinje tu unyasa wa agwuma.

⁶Tuhaŋsagana ta aba tụ wɛ to hwoŋno[17] na shɛmɛ sha aba gana ulwa wa a'alụ. Isɛbwɛ ya aba ye munje aŋ, gana nshikwo mu ulwa ụ'wụtụ na wo hwoŋno. Ya gbatụ ti'ishijɛ nu ukpahiŋ, yoo gorogo uuwa gi iyi yo holo.

⁷E vwengenji kpaaŋ aba gana a'alụ, a kwụnɛ ehiu aba. Shɛgwuma sha aba shɛ 'waŋtatangwụ kpaaŋ, i zasa bu na be elele na ma n suyana ya na adua o.

⁸Atwa Ifrem meme hiŋtetenji ne edenji; aa shɛ gana agbagbada akara na bitirugwo su.

⁹E peni shi abashɛ maa agaiŋ oko loshigwo ukpahiŋ wa aba o. E mepi shi kaa du maa a rutwa ijitɛ ya aba o.

¹⁰Iyi nɛ vwutengeni atwa Isrɛl hwɛɛ, i shɛ useyida tumama sata ta aba, e gwuri shi kaa pa AGWANGWAMA na shɛ Agwatana aba o. E zhe shi kaa waa pu bwa okwo ti yaa shɛ gana ga o.

¹¹Atwa Ifrem a shɛ gana ikwucime nɛ lagwụmɛ, nɛ zasa ahaŋsa. A suyanɛ atwa Ijipti maa e mbiyeni aŋ, nazhɛ ee gezhiji aa sanɛ Asiria!

¹²Aka na tɛɛ zhɛ, N zhɛ ma 'waŋ igwune mi maa mo ubo aŋ, maa mɛ 'wɛŋ aŋ, gana shanụnụ. N zhɛ mo vwulo aŋ du iwɛ tugworozwo te elele tu na aa ndanjɛ.

¹³Ɛ zhɛ a nda hwuŋ adangboo, iwɛnɛ te e n genji, aa ma n tana tigezhe, ɛ zhɛ a nda ufwu! Ma jala maa mo bicingo aŋ, ama a ma n dwatwagana-ụzagwụ.

¹⁴A n tabwa sụ na amɛ oko, ama tuba a ugagaga[18] no shigodo sha aba. Aa ụlwatagwụ urubwo uko iwɛ iyimɛyɛ izɛgwu, keeni iwɛ meni mụ tụ'walụ ta afwafwa, ama tuba a jɛshɛrɛjɛ, aa ma n tana tigezhe tebiye!

¹⁵Okwo ti yaa shɛ Gamba m mbisegeni aŋ iyi, Ngee peni aŋ ukpahiŋ, a ma n haŋsagana kaa waa iyi iwɛ.

¹⁶E gwuri shi no ofwo Bụtụ ata na Hwuri Kpaaŋ o. A shɛ gana uta na ontonu, na bụtụ eri shi ba patana ya rishe. Ehiu aba a dumanga n-ndumwa mi ci'nyɛ, iwɛbɛ po ɛɛ zhɛ o 'wo tu'wo tu utokwobi. Atwa Ijipti kaa zhɛ na hinga aŋ ilɛtu ya asada.