Read bassa HOSIA 9 Bible Online

HOSIA 9 - bassa bible

HOSIA 9

¹Oo ahiɛba atwa Isrɛl, ta bwada ma unyasa o! To momo gombicingo ma kaa du gana atwa vwɛ o.[23] Iwɛnɛ po hi vwulwa ohi gongwo Agwatana hiŋ, ohio lubo ya utashɛ na aa tụpa buwɛle na akpakpata elele!

²Akpakpata ata keeni ugbogolo ata meni mu tụ'walụ ta afwafwa kaa zha shɛ wa biga aŋ o, manɛbɛ mu ufwo mi zha shɛ kaa ma namana aŋ ya o.

³A zha shɛ a vwa ya na cɛnjɛ ta AGWANGWAMA o. Ama atwa Ifrem zhɛ o gwulo ni Ijipti, maa a na ya iyimɛyɛ nɛ ee ge jirimi[24] tiya na amɛ Asiria.

⁴A zha shɛ na 'wanga ya AGWANGWAMA apwaŋ meni mu tụ'walụ ta afwafwa, kwo kaa arụpɛ na zhɛ o lomicingo bu amɛ o. Arụpɛ gana ata zhɛ a shana aŋ gana iyimɛyɛ ya atwa na a ta-ụkwụla, i zhɛ kaa ya hashɛgana bụtụ be elele na yɛ iŋ. Iyimɛyɛ ɛtɛ ya aba, i shɛ iwɛ maa i shiji aŋ kwakwa; i zasa inɛ ye elele nɛ ɛɛ zhɛ o tocingo nu Umwono wa AGWANGWAMA o.

⁵Asha imbe ɛhi zhɛ hia nda hwuŋ nu ụjita ata u tu'ulwa tụ 'wụtụ tu unyasa, na ee shiri, keeni ụjita isene i'wɛtwɛ ya AGWANGWAMAA?

⁶Hioko, okwo ee benengeni ufwu tɛnda,[25] atwa Ijipti zhɛ o sotulonu aŋ, maa e ni aŋ no ofwo na ɛɛ hiɛŋ, Mɛmfis![26] Egenekpe, aba zhɛ a 'yaga uduciya wa aba wa azụrụfa, esepi aba tuba zhɛ a lashagaga shimwono sha aba hwɛɛ.

⁷Ahiɛba atwa Isrɛl, mapa ma maa aka na maa e hi peni ulwapɛ ci ya, ụjita ụ tụtụpana u ci ya! Hi hiɛŋ maa bigesere ga lagwụmɛ, ɛhi hiɛŋ maa bụtụ ga bu mpiala shɛ bụsụmɛ-bụ-ụmpɛ, iwɛnɛ ti iwɛwɛ hiŋ gembi duwa, i'ime hiŋ kaa hwuleji.

⁸Bigesere ata, ubwa shɛ bungbaracɛ ba atwa Ifrem, a na shɛ atwa Agwatana mi. Okwo ti yaa shɛ gana ata, modugwulo mu na aa ima shanụnụ mi bici ba ni ihwɛŋnɛ ibwɛ kpaaŋ. I'ime kaa namɛ nu umwono wa Agwatana ubwa.

⁹E meme tecinji ụdamụ duwa, gana aka na aa namɛ la ni Gibia. Agwatana zhɛ teyinje tugworozwo ta aba, bɛɛ zhɛ kaa ba pana aŋ ulwapɛ iwɛ iwɛwɛ ya aba.

¹⁰AGWANGWAMA hiɛŋ, Aka na Ngoo to la atwa Isrɛl ugbe hiiŋ, a shɛ la gana ukparɛ ufwafwa na shikeni nu ụshɛka. Aka na Ngaa kwụbɛ la eshi hiŋ hiiŋ, a shɛ la gana tụ'walụ tu uwowo na 'weri hiiŋ na aka tuba. Ama aka na te e ci ya Beal Pio, ee meme shileni ya tuwa ti Beal, tu na tɛ shɛ iyi ye ezuye[27] nɛ kaa ilegeji shi. Ibɛ po aa shɛ ya du iyi inyizhi gana ti ijɛ ɛtɛ oo lubo.

¹¹Ụjɛrụma wa atwa Isrɛl zhɛ wa banangana aŋ gana ụnụnụ na hiɛrɛ. A zha shɛ a mata ya miaụŋ o, eyikwo aba zha shɛ a la ya kaa shifubo.

¹²Ama okwo ɛɛ wɛnicinjɛ miaụŋ, N zhɛ mo sugo mu, N zha shɛ ma waŋpanana aŋ okwo ike maa i nama o. Aka elele na Ngee genji aŋ, ɛ zhɛ a nda adangboo!

¹³N kwụbɛ ta a bɛrɛ atwa Ifrem no ohwolu tuwebiye, gana atwa Taya, ama atwa Ifrem zhɛ o sugo kaa miaụŋ ma aba, maa ee peni atwa maa a kwụnɛ mụ.

¹⁴Oo AGWANGWAMA, imbe kwuŋ ɛbi zhɛ ba pana aaŋ? Pana aŋ n-ngwuno mu tumata mu na ma basaga miaụŋ keeni mosubo mu na mu zasa meni!

¹⁵AGWANGWAMA hiɛŋ, E kwune tugworozwo ta aba te elele tɛnda taa ni Gilgal. Apata du kaa Ngee kwune aŋ ti'imo. N zhɛ mo unzo aŋ maa e beni nu umwono mu na cɛnjɛ ta ata, iwɛ iyi iwɛ ya aba nɛ aa njɛ. N zha shɛ kaa mo lubo aŋ ya kwukwuŋ. Ehwurembe aba ma n tana tigezhe hwɛɛ aba.

¹⁶Atwa Ifrem shɛ gana iyi nɛ aa bɛrɛ, inɛɛ nɛ ee jibi, yaa njɛ ya maa ge tini ti bɛ tu hweteni, inɛɛ nɛ kaa zha shɛ ya 'wala ya. A zha shɛ a 'yaga ya miaụŋ o, okwo aa 'yajɛ, N zhɛ ma kwụna mu na ata ee ge lubi duwa.

¹⁷Agwatana mi zhɛ o jinoko aŋ, iwɛnɛ ta a shɛlajɛ shɛ iwɛ mi. Ɛ zhɛ no rungo gbom na ashashɛ edenji.