Read bassa JOƐL 1 Bible Online

JOƐL 1 - bassa bible

JOƐL 1

¹N-ndumwa mu na AGWANGWAMA mbishi Joɛl yɛu-ye-eyi Pɛtuɛl na.

²Ahiɛba atwa a'wụtụ, hwuga ma iwɛ gɛ, ahiɛba na hiɛ jɛjɛ na cɛnjɛ tu ga, shɛlaga ma! Iyi gɛnɛ gɛ nduwa la na aka hiŋ kwukwuŋ hŋ? I nduwa la okwo na aka ogwunukwoshi hiŋ suu?

³Mbiso ma miaụŋ mi hiŋ ijɛ; ga miaụŋ mi hiŋ mi mbishi du miaụŋ ma aba, ga miaụŋ ma aba mi mbishi du uwaŋnɛ na 'wa aŋ.

⁴Ovworo zhajɛ edingbe edingbe,[1] iyi elele nɛ unyama udingbe uko weŋpeni, unyama udingbe ta 'wa uŋ wa ya, iyi elele nɛ unyama udingbe ata weŋpeni, ekpikpikpi a ya, iyi elele nɛ ekpikpikpi weŋpeni, udingbe wo ovworo na wo iricingo iyi wa hwaŋzhɛnga.

⁵Ahiɛba ga mayaga ma ngba, zhinjɛ ma hiɛ cwɛ-u'wo. Ahiɛba eswe meni mu tụ'walụ ta afwafwa, tulono ma nu u'wo gboo, iwɛnɛ ta ahi zasa ya iyi nɛ maa hiɛ njɛ mu na mu ufwo.

⁶Udenji uko tɛfwulɛjɛ cɛnjɛ tu ga ti mi; a 'yajɛ ukpahiŋ tebiye,[2] ufwugwo wa aba kaa zasa tɛrɛta o; shine sha aba shɛ lacɛmɛ gana a na bizeci, agacɛ aba shɛ gana a na bizeci bo o.

⁷A nduwa ikpɛri tu ya afwafwa ufwu, aa yɛwa i'wɛ'wɛ tu yo owowo. Ee usheji to ogwugwu aba uuwa a'wa'walụ aba cɛnjɛmɛ ya paawụụ.

⁸Twa ma u'wo gana yɛu towo[3] nɛ ya ta-ụkwụla iwɛ usemberi na bɛɛ gɛ zhɛ ba tuna.[4]

⁹Onongbo na ga ndana AGWANGWAMA ugondu nu umwono ubwa, a ta-ụkwụla, iwɛnɛ tụ ụrụpɛ tiya keeni ụrụpɛ tuswa zha shɛ wa ta ya nu umwono wa AGWANGWAMA.

¹⁰Shihilo shi tileni ya bohondo; cɛnjɛ to hwotono kakarakwụ,[5] ibɛ po iyimɛyɛ njɛ ufwu, tụ'walụ ta afwafwa tu hweteni, manɛbɛ mu zasaba ya du o.

¹¹Ahiɛba afwashɛ, ga shɛmɛ shi hiŋ shɛ hashɛganụ; ahiɛba na hia hwaŋ afwafwa, zwono ma nu n'ungwa gboo, iwɛnɛ ti iyimɛyɛ nɛ ɛɛ hiɛŋ wit, keeni inɛɛ nɛ ɛɛ hiɛŋ bali i njɛ ufwu hwɛɛ.

¹²Ikpɛri ya afwafwa hweteni, i'wɛ'wɛ yo owowo lụmbɛ; ti i'wɛ'wɛ ya apomɛgranati, ti ishiwɛ, ti i'wɛ'wɛ ya Apul, keeni i'wɛ'wɛ ye elele nɛ namɛ ne shihilo hwetegeni hwɛɛ. Ibɛ po unyasa butugwumwa kwu ya hwɛɛ.

¹³Ahiɛba onongbo na hia nda ugondu nu utukwu-ụrụpɛ, urogono ma tugwuno tụ ụcɛnjɛ tɛnda[6] maa hi na twa-u'wo gboo! Zhaga ma nu umwono wa Agwatana hi to-ụkwụla uuwa gi iyi yo holo! Iwɛnɛ tụ ụrụpɛ tiya keeni ụrụpɛ tuswa te shi ya nu umwono wa Agwatana hiŋ.

¹⁴Ananga ma ezumi tijilo tɛnda![7] Suyana ma atwa maa a ulwa; sotulonu ma n-nyarɛ hwɛɛ, ta atwa na jɛjɛ na cɛnjɛ tu ga kpaaŋ, nu umwono wa AGWANGWAMA na shɛ Agwatana hiŋ, maa hi ugananɛ AGWANGWAMA.

¹⁵Ụjita wa AGWANGWAMA gwumwongonu, u zhɛ kaa wa sha ụjita wa adangboo! Ụjita ata zhɛ wa zhajɛ ni iyi ti'iricingo, iwɛnɛ tu waa banɛ no olugwo Bụtụ ata na Hwuri Kpaaŋ.

¹⁶Shɛ ne eshe tu hŋ ee becinji iyimɛyɛ, tu unyasa keeni amɛ-olom nu umwono wa Agwatana tu?

¹⁷Izɛgwu 'wi na amɛ cɛnjɛ tuhwoo. Iyimɛyɛ zasaba ya maa e sweci o, ibɛ po orubwu ata o hondo hwuŋzwotongwu.

¹⁸Iyimabiga yo ngwulo; unyama inɛ yo rungo gbom, iwɛnɛ ta ambɛ zasaba ya maa a yɛ; tu unyama wa agwụdụ wa nda ụbaụta hwɛɛ.

¹⁹Oo AGWANGWAMA, gabụ Ngaa ugananɛ, iwɛnɛ po ulwa hwoŋzhingwo ambɛ tiyaga nụ ụshɛka, bụratụ bu ulwa kaa songwo i'wɛ'wɛ ye elele nɛ ga namɛ ne shihilo hwɛɛ.

²⁰Okwo isundɛ ehilo ya bụ uganana iwɛnɛ te meni mo ohwulwo mu hwanganɛ hwɛɛ, ulwa kaa senji ambɛ tiyaga nụ ụshɛka ngbalaa.