Read bassa JOƐL 2 Bible Online

JOƐL 2 - bassa bible

JOƐL 2

¹'Nyamana ma utiitidi nu Zayon, kala ma ukwuruwa ujasa ni ishɛmɛ ɛtɛ mi tijilo. Ga atwa elele na jɛjɛ na cɛnjɛ ta ata na zhɛgɛdaga! Iwɛnɛ po ụjita tizhajɛ ta AGWANGWAMA gwumwongonu.

²Ụjita zhɛ wo sho jita ata, tishi ti zhɛ ta nama zhuuŋ, i zhɛ ya sha tishi tu tuzhuuŋ keeni odomu. Unyama we ejeshi ovworo a na gembi ufwugwo zhɛ a zhajɛ, i shɛ gana tishi tu na tu mburusonu nu nshama. I ta zasa kwukwuŋ iyi nɛ namwawaŋ la gana ata, i zha shɛ kaa du ya nama ya kwukwuŋ gana ata nu uwaŋnɛ we elele na te e ci o.

³Umbe wa aba ụ shɛ gana ulwa na wo songo iyi, ekwunyi aba a shɛ gana bụratụ bu ulwa na wo gorogo. Cɛnjɛ tu na tu namɛ nu umbe wa aba tɛ shɛ gana itimɛ Idɛn, ofwo elele na ee keshici, apata a sha gana ụshɛka na iyi elele waŋnɛ shɛ. I zasa iyi elele nɛ ya banangana aŋ o.

⁴Abụ kwụbɛ aŋ, a shɛ gana idɛkwɛ; o gozhigo gana idɛkwɛ ujasa.

⁵Gana na ta a hiɛranga ni ihiŋhiŋ nshama, ibɛ po aa nda zhakwụ zhakwụ gana ihɛŋtu ujasa; o pusotogwu gana ambɛ hwoo na o hwoŋno nu ulwa. A shamana gana ejeshi ofwugwo a na mama 'imɛ iwɛ ujasa.

⁶Inyɛsɛ ya aba ya sha bụtụ be elele na kwụbɛ aŋ; ụpɛshɛka bụtụ be elele wa jɛshɛrɛgwa.

⁷A tafwulaga ofwo gana ejeshi na beni urishi; o mungo uba gana ejeshi. Bu na bu na ba paga umbe ubwa agba, i zasa bu na ba vwula o.

⁸I zasa kaa bu na ba ta uhwaŋna binya o. O tonongo ijilɛni, i zasa iyi eri ya nda aŋ ukwurishi o.

⁹E tefwuleji ụshɛpwụ ata ụ'wụtụ ni izɛlɛgwu, ee munji uba, oo gozhigo ni ihiŋhiŋ ubwa, ee teni shimwono, ibɛ ee teni shimwono sha ata na agbahwụ gana ozundo.

¹⁰Cɛnjɛ tɛ njɛ bulama nu umbe wa aba; tụla ta zhɛgɛda. Uwaŋna nu upiana 'wi tishi, mkpasu mi te shi ya o.

¹¹Ibɛ po AGWANGWAMA dumanɛ iwɛ ne ejeshi ubwa gana uto. Ejeshi ubwa a na a hwuga-unu ubwa tụpana e hwuleji tɛrɛta; e gembi ufwugwo, aa 'yajɛ kaa ukpahiŋ. Ụjita ata wa AGWANGWAMA zhɛ wo gombo hwuŋ tebiye, u zhɛ kaa wa sha bụtụ inyɛsɛ duwa! Gaaba eri ba la hwuŋ egiri ubwaa?

¹²AGWANGWAMA hiɛŋ, Okwo yaa shɛ taa hwayɛ, jishirijɛ ma maa hi gwure pi mi, ne ezumi tɛnda, nu u'wo-tutwa keeni ụkwụla-tuta.

¹³Ga shɛ shɛmɛ shi hiŋ sha hashaganụ, ama kede shɛ tugwuno ti hiŋ ehi dwetweji o. Gwure ma no ofwo AGWANGWAMA na shɛ Agwatana hiŋ. Bi mepi iwɛ, boo hioko kaa inyɛmɛnyɛmɛ, bɛ 'imɛ-isɛbwɛ, tulubo ti tikpeke kaa ti shini amɛ ubwa; bi jeri shi kaa maa bu na hi nda iyi iwɛ o.

¹⁴Gaaba mepi okwo nekeshi bi zhɛ be gwure maa hioko inyɛmɛnyɛmɛ hiŋ, maa mo hi tulonono uwebiye ne ekwunyi, iwɛ maa hi na pana AGWANGWAMA na shɛ Agwatana hiŋ arụpɛ tiya keeni arụpɛ tuswaa?

¹⁵'Nyamana ma utiitidi nu Zayon; dwa ma ụjita we ezumi tijilo tɛnda, suyana ma atwa maa hiɛ njɛ tu'ulwa ti ikɛnyi!

¹⁶Sotulonu ma atwa urubwo uko; nda ma tu'ulwa ta ata shɛshɛshɛ; suje ma ta atwa na inganjɛ, suje ma ta miaụŋ, ta miaụŋ mu na mu to subo du hwɛɛ. Okwo bwolo biyikwo bu ufwo, gɛ gɛnjɛ umwono ubwa du, okwo biyikwo bu ufwo, gɛ gɛnjɛ du umwono ubwa.

¹⁷Go onongbo a na a ndana AGWANGWAMA iyi na ashashɛ utukwu-ụrụpɛ na angba odubo umwono wa Agwatana,[8] na twa-u'wo maa ɛ nɛ hiɛŋ, Oo AGWANGWAMA, hioko inyɛmɛnyɛmɛ ya atwa bụ kaa! To lono maa edenji na twagaga atwa bụ, maa a na nda aŋ asada o; maa ɛ nɛ ti hiɛŋ, Cee Agwatana ata hiŋ namɛɛ?

¹⁸Nazhɛ iwɛ cɛnjɛ ta ata to ya AGWANGWAMA; ibɛ po bee hieci ya inyɛmɛnyɛmɛ ya atwa ubwa.

¹⁹Ibɛ po AGWANGWAMA jishijɛ atwa ubwa, bɛɛ hiɛŋ, N zhɛ ma hi panɛ iyimɛyɛ, te meni ma afwafwa, ta manɛbɛ ma buta hwɛɛ, te hi gembi. Hi zha shɛ hia shana ya edenji iyi tutwa o.

²⁰N zhɛ mo hi unzongo ejeshi ata banɛ tuzuba, N zhɛ mo unzo aŋ taa dụlụ maa e hi genji, N zhɛ mo shishingono aŋ maa e zhe na cɛnjɛ tu undolo tu na tu 'wi. N zhɛ mo unzo atwa na hwuri umbe maa e zhe ni itekwu uwaŋna-banụ, maa anaa na lɛ ekwunyi zhe ni itekwu uwaŋna-twonuo. Nhiụŋ ma aba mụ wɛ keeni nhiụŋ mu tufwoso ta aba kiri mi zhɛ me mwe, iwɛ iyi iwɛ i'wɛtwɛ nɛ aa njɛ.

²¹Oo ahiɛba atwa cɛnjɛ tu ga, ta nda ma inyɛsɛ o, ama ga amɛ hiŋ lemi maa hi bweji unyasa; iwɛ iyi i'wɛtwɛ nɛ AGWANGWAMA ihiɛ ndanɛ.

²²Oo ahiɛba isundɛ ehilo, ta nda ma inyɛsɛ o, ambɛ tiyaga ta a sabɛ; i'wɛ'wɛ tɛ ya 'wala tụ'walụ ti bɛ, owowo na afwafwa kaa 'weri tebiye.

²³Oo ahiɛba atwa Zayon, 'yaga ma amɛ-olom, bwada ma unyasa, iwɛ iyi nɛ AGWANGWAMA na shɛ Agwatana hiŋ ihiɛ ndanɛ. Bɛ njɛ maa eshilo ugbama e hi ngbeni iwɛ tɛzhɛmana ti hiŋ, ubwa kaa ihi ngbeni eshilo a'wụtụ, ibɛ shɛ eshilo ugbama, te eshilo ɛhɛnɛnɛyɛ gana ala cala.

²⁴Ohiu zhɛ a bala na akpakpata hiŋ; meni ma afwafwa, na manɛbɛ ma buta, mi zhɛ mu na fwunga no onunu na oo pilo mu.

²⁵N zhɛ me hi gwuricingeni iyimɛyɛ i shiywa sha ata ovworo yɛ la iyimɛyɛ hiŋ, a'nywa, no ovworo a'wụtụ 'wụtụ, te ekpikpikpi ovworo, aba shɛ ejeshi ata mi a'wụtụ 'wụtụ Ngaa tumwanɛ la maa a hiɛ sukakanɛ.

²⁶Iyimɛyɛ zhɛ ma hi balana ya hwuwayɛ maa hi na ya hi no shigogo. Hi zhɛ hi na ma shɛtana, Gamba AGWANGWAMA na shɛ Agwatana hiŋ, na ihiɛ ndanɛ iyi ya arụhwajɛ. Ezuye zha shɛ a sha ya atwa mi kwukwuŋ.

²⁷Ahiɛba atwa Isrɛl, nazhɛ ɛhi zhɛ hia mapa ya maa N namɛ na ashashɛ hiŋ, maa Gamba AGWANGWAMA N shɛ Agwatana hiŋ, binya zasaba o. Ezuye zha shɛ a sha ya kaa atwa mi kwukwuŋ.

²⁸Na aba inɛ gɛ, N zhɛ mo dudugono usunda-tu'waba we elele Mpiala mi mi, nazhɛ miaụŋ mi hiŋ me eyi, na miaụŋ mi hiŋ mo o mi zhɛ ma duma tigesere, n-nyarɛ mi hiŋ mi zhɛ mu no wotogono awalabụ, esemberi hiŋ zhɛ na kwụba shizobu.

²⁹Na aka ata, N zhɛ mo dudugono ajama mi eyi, ta ajama mi o o, Mpiala mi mi.

³⁰N zhɛ ma nda arụhwajɛ na azuba keeni cɛnjɛ tu unyizo, mehieŋ, nu ulwa, keeni nshikwo zhɛ ma nama.

³¹Uwaŋna zhɛ wo 'wo tishi, upiana zhɛ wa sha mehieŋ. Nazhɛ ụjita ata ụ'wụtụ wa AGWANGWAMA, na shɛ ụjita tuholono u ci.

³²Ama atwa elele na a suyana izeci ya AGWANGWAMA, aba zhɛ o bino. Gana na ta AGWANGWAMA dumwa la, bɛɛ hiɛŋ, Tubanangana ti zhɛ ta namana atwa na vwɛ ni Ishɛmɛ Zayon, keeni atwa na namɛ nu Jɛrusalɛm; atwa na AGWANGWAMA teri a na kaa bini zweni na ashashɛ atwa ata.