Read bassa JOƐL 3 Bible Online

JOƐL 3 - bassa bible

JOƐL 3

¹AGWANGWAMA hiɛŋ, Na aka ata nazhɛ Ngɛɛ zhɛ me gwuricingeni Juda keeni Jɛrusalɛm tɛzhɛmana ta aba.

²N zhɛ mo sotulonu edenji hwɛɛ, me suje aŋ hwɛɛ aba nu ulomu Jehoshafat.[9] Apata Ngɛɛ zhɛ ma duma ụshɛrɛya wa aba, iwɛ iyi elele nɛ aa njɛ la atwa mi. Iwɛnɛ ee gereteji atwa Isrɛl, ee zwegeni ya na cɛnjɛ cɛnjɛ ti nya, keeni iwɛ cɛnjɛ ti mi ti Isrɛl tu na oo dwotwogonu.

³A 'wɛŋ icɛcɛ iwɛ atwa mi. Edenji ata suji miaụŋ-me-eyi aa cɛpɛ Awɛle utashɛ, na miaụŋ-mo-o tuba aa cɛpɛ utashɛ mayaga mu na ee swe.

⁴Oo gabụ Taya, nu Saidụn, no ozhibu Filistia, imbe kwuŋ ahia jala maa hi n njɛɛ? Tụtụpana suu ahia jala maa hi n tụpanɛ iwɛ iyi ike nɛ Ngaa njɛ? Yaa shɛ ahia jala maa hi n tụpanɛ, asha N zhɛ ma hi tụpana du kakayɛ kakayɛ.

⁵Hi suji azụrụfa, na azhɛnarɛya mi, ehi suji uduciya mu na ngezeni nụ ụzhɛ hwɛɛ, ehi zweni nu nsumo mu tuwa ti hiŋ.[10]

⁶Hi suji atwa Juda keeni atwa Jɛrusalɛm, ehi zhe taa dụlụ, ehi sengeni aŋ Egrik, iwɛ maa kede o gwumwongonu ya na cɛnjɛ ta aba o.

⁷Ama N zhɛ mɛ bɛcinjɛ aŋ no olugwo ata ahiɛ sanjɛ aŋ. N zhɛ ma hi nda iyi nɛ ahiɛ njɛ aŋ.

⁸N zhɛ ma sangana atwa Juda miaụŋ mi hiŋ me eyi, ta miaụŋ mi hiŋ mo o. Ɛ zhɛ a sangana aŋ ahinya Sabia a na namɛ taa dụlụ. Gamba AGWANGWAMA N dumwa.

⁹Mbiso ma edenji utumwa ga maa: Mama 'imɛ ma iwɛ ujasa, suyana ma atwa hiŋ a na beni urishi nu ujasa! Sotulonu ma asaza hiŋ hwɛɛ maa a shamana.

¹⁰Dubo ma n-ngowo mi hiŋ maa mɛ shɛ otokwobi, dubo ma nluwuzho mi hiŋ maa mɛ shɛ nsanụ. Okwo bụtụ na ga shɛ ụsụnyasụ na ashashɛ hiŋ, gɛ hiɛŋ, N 'yajɛ ya ikɛnyi ujasa.

¹¹Ahiɛba edenji na hi hogogonu aŋ hwɛɛ, zhajɛ ma kakayɛ,[11] maa hi ulwa. Oo AGWANGWAMA, tumwanɛ ejeshi bu a na beni urishi, maa a sukakanɛ aŋ.

¹²Ge edenji ga mama 'imɛ maa a zhajɛ nu ulomu ata Jehoshafat, apata Ngɛɛ zhɛ ma gɛga maa ma duma ụshɛrɛya we edenji na hogogonu aŋ.

¹³Sugo ma nluwuzho mi hiŋ, maa hiɛ hwɛ aŋ gana iyimɛyɛ nɛ nɛ tuhwa. Pilo aŋ ma gana tụ'walụ ta afwafwa tu na ti shini no onunu meni ma afwafwa, maa meni ma tuba mu sho no onunu ata maa mi shini uuwa mi hialụ, iwɛnɛ tugworozwo ta aba ti gembi.

¹⁴Unyama ụ'wụtụ 'wụtụ zweni nu ulomu ụshɛrɛya. Iwɛnɛ po ụjita ata wa AGWANGWAMA gwumwongonu ya apata.

¹⁵Uwaŋna nu upiana 'wi tishi, mkpasu mi te shi ya o.

¹⁶AGWANGWAMA ngwuleni nu Zayon, baa uganɛ nu Jɛrusalɛm; ibɛ po cɛnjɛ tɛ njɛ bulama, ta tụla. Ama AGWANGWAMA zhɛ a sha kaa ofwo tuswaka iwɛ atwa ubwa, keeni ikepi ya atwa Isrɛl.

¹⁷Nazhɛ ɛhi zhɛ hia mapa maa Gamba n shɛ AGWANGWAMA na shɛ Agwatana hiŋ. N namɛ nu Zayon, na shɛ ishɛmɛ mi tijilo. Jɛrusalɛm zhɛ wa sha ụshɛpwụ tijilo; agaiŋ zha shɛ a lasụ uŋ ya kwukwuŋ.

¹⁸Meni ma afwafwa mu ufwo mi zhɛ mi ne ngbenji hwuŋ nu nshama na aka ata, mosubo tuba mi zhɛ mu na fwunga ne tikpekwu; meni mi zhɛ mu na fwunga na ahwacɛ ohwulwo Juda hwɛɛ. Umɛzhinjɛ uko zhɛ wa banɛ nu umwono wa AGWANGWAMA u nɛ fwunjɛ, maa u no zwogono ulomu Shitim[12] meni.

¹⁹Ijipti zhɛ ya sha osombo, Idụm zhɛ ya sha osombo ụshɛka, iwɛnɛ ta a nduwa la atwa Juda abwagara, ee dudweji mehieŋ ma atwa na zasa n-ndumwa-tụwụma na cɛnjɛ ta aba.

²⁰N zhɛ ma nda itɛpwɛ ya atwa ata ee dudweji mehieŋ ma aba; N zha shɛ ma ganga bụtụ na n-ndumwa-wụmɛ maa hwulo kwukwuŋ.

²¹Ama atwa zhɛ a nama nu Juda, keeni Jɛrusalɛm unyizo-nom. AGWANGWAMA tuba namɛ nu Zayon.