Read bassa EMOS 3 Bible Online

EMOS 3 - bassa bible

EMOS 3

¹Ahiɛba atwa Isrɛl, hwulaga ma n-ndumwa mu tuwumana mu na AGWANGWAMA jɛmɛ iwɛ hiŋ, ahiɛba na hiɛ shɛ umwamwa na bɛɛ bɛcinjɛ la ni Ijipti hwɛɛ.

²Bi hiɛŋ, Ahiɛba kiri Ngee mepi, Omo shiyono du eshe na amɛ amwamwa na namɛ na cɛnjɛ tu unyizo kpaaŋ, N zhɛ ma hi pana ulwapɛ iwɛ iwɛwɛ hiŋ ye elele.

³Atwa eyebi suu eri a zhagaga tahaŋnụ ti yaa shɛ oo momo lononu su?

⁴Bizeci suu bo ngwulono nu uwapa aka na tu baa kwụbɛ shɛ iyi elele maa ima? Bizeci na ta waŋnɛ suu bɛ hwɛ-idu nu u'ibwa ubwa tu baa ta 'imɛ shɛ iyi elele?

⁵Ụnụnụ suu zhɛ wa laya nu ugwuru na bici na cɛnjɛ, ti yaa shɛ ugwuru ata zasa iyimɛyɛ? Ugwuru suu zhɛ wo bishicigwo na cɛnjɛ gbi, ti yaa shɛ iyi elele leyi shi nu bwa?

⁶Ɛ zhɛ suu a 'nyamana utiitidi ujasa nụ ụshɛpwụ, i shɛ inyɛsɛ zha shɛ ya sha atwa? Abara-ne-ebe suu zhɛ e teni nụ ụshɛpwụ, i shɛ shɛ AGWANGWAMA njɛ iŋ?

⁷AGWANGWAMA na Hwuri Kpaaŋ njɛ shɛ iyi elele kwukwuŋ ne tusweci ta ti'imanga tu bwa uzawa tɛkapɛshɛngana miaụŋ mu bwa mu ugondu a na shɛ egesere bwa.

⁸Yaa shɛ Bizeci ngwuleni, gaaba zha shɛ ba nda inyɛsɛɛ? Yaa shɛ AGWANGWAMA na Hwuri Kpaaŋ dumanɛ iwɛ, gaaba zha shɛ ba ananga utumwa ubwaa?

⁹AGWANGWAMA hiɛŋ Emos, Anangana shɛgwuma shɛ ụshɛpwụ ata ɛɛ hiɛŋ, Ashdod keeni cɛnjɛ ti Ijipti a na ikepi rungwutwonu maa, Ulwa ma nu nshama mu na mu rungwutwonu Samaria maa hiɛ kwụbɛ tusukwutogwu keeni umungwuta na namɛ na ashashɛ aba.

¹⁰AGWANGWAMA hiɛŋ, E mepi shi ta a sha atwa tɛcara o, e shidinji shimwono sha aba shɛ tugwama ni i'wɛŋnɛ nɛ aa lashajɛ atwa na abwagara keeni na tɛshɛrɛ.

¹¹AGWANGWAMA na Hwuri Kpaaŋ hiɛŋ, Atwa i'ime zhɛ o rungwutwonu cɛnjɛ ta aba, ɛ zhɛ o hwuŋzotongo ikepi ya aba, ɛɛ zhɛ o swogo i'wɛŋnɛ no shimwono sha ata sha aba.

¹²AGWANGWAMA na Hwuri Kpaaŋ hiɛŋ, Gana na ta bi'iywa-ba-agwụdụ bo dundo ivwunɛ iyebi kwo kaa ụcɛbɛ ụgwụdụ na ta vwɛ nu unu bizeci,[7] gobwonu du ɛɛ zhɛ o dundo atwa na ta namɛ nu Samaria ɛdicɛ, agata weteji ni izhɛmi shigodo sha aba shɛ na ee urigeni tugwuno ta ata ɛɛ hiɛŋ isiliki.

¹³AGWANGWAMA Mokondo na Hwuri Kpaaŋ hiɛŋ, Hwulaga, maa le tiseyida tu na ti zhɛ ta wumana ajalalo Jekob.

¹⁴Yaa shɛ ụjita na Ngɛɛ zhɛ ma pana atwa Isrɛl ulwapɛ iwɛ undwa wa aba tubwada u ci hwuŋ, N zhɛ du ma nda otukwu-arụpɛ ata namɛ nụ ụshɛpwụ ata ɛɛ hiɛŋ Bɛtɛl ufwu. Nazhɛ ɛɛ zhɛ a kwusataga shihiuaŋ shi utukwu-ụrụpɛ, ibɛ shɛɛ zhɛ sha 'waŋtangwụ na cɛnjɛ.

¹⁵N zhɛ mo hwuŋzotongo shimwono shi hiŋ hwɛɛ, ta ma shɛ na shi gembenji, ta ma shɛ na shɛ gwụmwatangwụ, ta ma shɛ na aa njɛ tisemberi ne ene adagba, shi zhɛ sha nda ufwu hwɛɛ, ta ma shɛ na shi gembenji shi zhɛ sho hwuŋzwotongwu, Gamba AGWANGWAMA N dumwa.