Read bassa EMOS 5 Bible Online

EMOS 5 - bassa bible

EMOS 5

¹Oo ahiɛba atwa Isrɛl, hwulaga ma ụkwụla ga Ngɛɛ zhɛ ma ta iwɛ hiŋ.

²Usapa Isrɛl leyegeji, bu zasa ya kaa u'ishɛgwa kwukwuŋ! E jineci bu na cɛnjɛ tu bwa, bu zasa kaa bụtụ maa ishicinjɛ bụ o.

³AGWANGWAMA hiɛŋ, Ejeshi akpakwụ-a-ta, (1,000) beni nụ ụshɛpwụ uko Isrɛl, ama ejeshi dipi-yebi gba aba zhɛ e gwure. Ejeshi dipi-yebi (100) beni nu unya ụshɛpwụ, ama ejeshi umpwa gba aba zhɛ e gwure ni ihwɛ Isrɛl.

⁴AGWANGWAMA hiɛŋ atwa ihwɛ Isrɛl, gwure ma no ofwo mi maa hiɛ yɛ uraiŋ.

⁵Ta zhaga ma tɛzhɛba ni Biɛshiba o, ta na ma dwalakaka ma kaa ni Bɛtɛl o, iwɛnɛ ti Bɛtɛl zhɛ ya sha osombo, ta zhaga ma kaa Gilgal[13] o, iwɛnɛ ta atwa ubwa zhɛ na ti'ima.

⁶Ama zhaga ma no ofwo AGWANGWAMA maa hiɛ yɛ uraiŋ, yaa shɛ ehi zhe shi, bi zhɛ bo gorogo gana ulwa maa twono ajalalo Josɛf.[14] Ulwa ata kaa zhɛ wo hwoŋzhingo atwa na namɛ ni Bɛtɛl, u zha shɛ wa 'yaga kaa bụtụ na maa 'woricingo uŋ o.

⁷Ahiɛba na hia duma ụshɛrɛya u tu'ubo, ahia ya atwa imwere ni iyi nɛ i shɛ inɛ ya aba, hi zhɛ hia nda hwuŋ adangboo!

⁸Ubwa na njɛ mkpasu, ta ayiwɛle keeni ajalagashiwawa, a na a banɛ na aka aba, ubwa bo sheyingo tishi ti tuzhuuŋ maa tɛ shɛ uhioko-uhwaŋna, boo sheyingo uhioko-uhwaŋna maa ụ shɛ tishi, ubwa mbɛ meni mi itekwu baa 'wɛŋ mụ na cɛnjɛ tu unyizo, Ɛ hiɛŋ izeci ibwɛ AGWANGWAMA.

⁹Ubwa sugeni atwa na 'yajɛ ukpahiŋ keeni ikepi ya aba ufwu tɛnda.

¹⁰Hio imo bụtụ na shikeni nu umwono-ụshɛrɛya ba tazhɛgana orugwusu keeni bụtụ na ba duma iwɛ-tɛkana.

¹¹Gana na ahia nda okofwo tuhwulo, ahia lashaga kaa iyimɛyɛ ya aba izɛgwu no orugwusu, iwɛbɛ po okwo shimwono sha ata ehi mengeni na atayɛ na pilanụ, hi zha shɛ hio zwono na shɛba o. Okwo ahiɛ hwɛŋ ntuma ma shifwafwa, hi zha shɛ kaa du hia swa meni ma shɛba o.

¹²M mepi gana na tu ufwugwo wa andwa hiŋ tubwada namɛ, tu gana na tugbazhɛgwa ti iwɛwɛ hiŋ tu namɛ. Hia sukakana atwa tiririri, ahia lashaga ukwuribi ugworo, hi dumanganɛ shɛ okofwo ụshɛrɛya u tishiriri nu umwono-ụshɛrɛya o.

¹³Ibɛ po bụtụ na shɛ bụtụ bi ti'inta zhɛ ba nama saiiŋ na aka ata, iwɛnɛ ta aka ata shɛ aka awɛ.

¹⁴Ga shɛ iyi nɛ teni cɛŋ ahia nda, ama kede i shɛ iyi iwɛ o, iwɛ maa hiɛ yɛ uraiŋ, nazhɛ AGWANGWAMA na shɛ Agwatana na Hwuri Kpaaŋ zhɛ a nama ne hiŋ.

¹⁵No imo ma iyi iwɛ, maa hi no lubo iyi ibiye, na untangana ma ụshɛrɛya u tishiriri tụdụma no shimwono sha ashɛrɛya, nekeshi AGWANGWAMA na Hwuri Kpaaŋ a mapana tumwata tu udenji wa atwa Isrɛl a na ta vwanganɛ na cɛnjɛ tu ga iwɛ.

¹⁶Ibɛ po AGWANGWAMA na shɛ Agwatana na Hwuri Kpaaŋ, hiɛŋ, U'wo tuzwono gboo zhɛ wa nama ne ekpekiti amɛ ụshɛpwụ we elele. Ɛ zhɛ o tulogono no ofwo elele na namɛ kpataa, ɛɛ zhɛɛ hiɛŋ, Adooyi! Adooyi! Ɛ zhɛ a suyana ahwɛŋ itimɛ maa a zhajɛ o to-ụkwụla; ɛɛ zhɛ a suyana atwa na shɛ egwoni nu u'wo-tutwa, a na aa tụpa utashɛ iwɛ u'wo-tutwa maa a cwɛ-u'wo u tugboo.[15]

¹⁷AGWANGWAMA hiɛŋ, U'wo tuzwono zhɛ wa nama ni itimɛ ya afwafwa ye elele, ijɛ zhɛ ya nda iwɛnɛ te Eme ci na ashashɛ hiŋ maa ma hi pana ulwapɛ.

¹⁸Hi zhɛ hia nda hwuŋ adangboo ahiɛba na hia jala maa ga ụjita ata wa AGWANGWAMA u ci kakayɛ! Uwebiye imbe kwuŋ ụjita ata zhɛ ma hi ndanaa? U zhɛ ma hi shana ụjita u tishi, shɛ ụjita uhioko-uhwaŋna o.

¹⁹U zhɛ ma hi shana gana bụtụ na gezhigeni bizeci, baa twa ya nu ucwee nu uhwaŋna. Kwo kaa gana bụtụ na peteni u'ala ubwa nụ ụdatụ, uhwa mazhanga lụmananɛ bụ.

²⁰Ụjita ata wa AGWANGWAMA zhɛ wa sha ụjita u tishi uzawa uhioko-uhwaŋna. Tishi ti tuzhuuŋ, uzawa tuta tụ tụraawụụ.

²¹AGWANGWAMA hiɛŋ, Mo imo nsono mi hiŋ mɛ tɛzhɛba, Ngaa ngbaracɛ mụ kaa du cwɛŋ bana. N zasa amɛ-olom no tusotulonu tu nsono mi hiŋ o.

²²Okwo ehi n teji ụrụpɛ tuhwoŋzhingo, ehi m peni arụpɛ hiŋ tiya, N zha shɛ ma lashɛga o. Okwo ehi n sugeni arụpɛ hiŋ amɛ-olom ni isundɛ nɛ nyemenji, N zha shɛ ma mbiyanɛ iŋ okwo tumbiyanɛ o.

²³Ishiga ma beye no rundu ra shɛzunga shi hiŋ, N zha shɛ ma shɛlaga i'nyemi shiduma shi hiŋ o.

²⁴Lono ma maa ga shɛ ụshɛrɛya u tishiriri ahia duma aka elele, gana na meni ma fwunga, ge tiririri tu na fwunga gana uhwulwo na wa fwunga unyizo-nom uzawa tuhwaŋ.

²⁵Ahiɛba atwa ihwɛ Isrɛl, hi m peni shi la iyi ya arụpɛ keeni apwaŋ na shiywa buhanda shɛ na Ngaa hiɛ 'yagajɛ nụ ụshɛka o.

²⁶Ama iwɛnɛ ahiɛ zhɛbɛ itɛtɛnuwɛŋ ɛtɛ ɛɛ hiɛŋ Sakut, ahiɛ njɛ iŋ agwuma tuwa ti hiŋ, ahiɛ zhɛbɛ du itɛtɛnuwɛŋ ɛtɛ ikpɛsu, ahi mama ndanɛ. Hi zhɛ hia 'waŋna ntatanuwaŋ[16] ma ata

²⁷na aka na Ngɛɛ zhɛ mo hi sugo maa hiɛ shɛ ajama no ofwo na keshici Damaskos. AGWANGWAMA na ɛɛ hiɛŋ izeci ibwɛ, Agwatana na Hwuri Kpaaŋ, ubwa jɛmɛ.