Read bassa EMOS 6 Bible Online

EMOS 6 - bassa bible

EMOS 6

¹Atwa na namɛ nu u'waba ulom nu Zayon keeni ahiɛba na hi heŋshi maa hiɛ namɛ no tusuu ni Ishɛmɛ Samaria, ahiɛba etwenyi na beni urishi nu udenji ga Isrɛl ụ'wụtụ, ahiɛba na atwa Isrɛl a na vwɛ a zhaganɛ iwɛ maa hi mbiyeni aŋ, hi zhɛ hia nda hwuŋ adangboo!

²Zhaga kwubɛ ma Kalnɛ ụshɛpwụ ata ụ'wụtụ, kashɛka ma hi zhe Hamat ụshɛpwụ ata ụ'wụtụ, ta ma tuhwulo hi zhe Gat nụ ụshɛpwụ ata wa Afilistia. Ashɛpwụ ga suu hwuri cɛnjɛ-ta-tugwama ti hiŋ tu Juda keeni ma ti Isrɛl ụzhɛ? Okwo tugwungwu ta cɛnjɛ ta aba suu tu hwuri me ti hiŋ ugombo?

³Ahiɛba na hi heŋshi maa hi unzhi ụjita ata ụwɛ taa dụlụ, ama tuba hi mbɛ kaa ụjita ata wa abwagara maa u keeni tugwumwongonu ne hiŋ.

⁴Ahiɛba na hi weteji no shigodo shɛ na aa njɛ tisemberi ne ene adagba, ehi momo mbo no otudu aba, ahia ya miaụŋ-ma-agwụdụ keeni oywoywo inɛ a na nyemenji a na ɛɛ vwɛ na ashashɛ inɛ, hi zhɛ hia nda hwuŋ adangboo!

⁵Anaa na a zunga shɛzunga shɛ tusashɛ, na shiduma shɛ na aa mama ndanɛ gana Devid.

⁶Hia swa mayaga mu na mu zweni no shikolo, ahia sukwutwa iturɛre ibiye tebiye, shɛmɛ shi hiŋ kaa shɛ hashɛganụ sụ iwɛ tuhwuŋzwo ta atwa Isrɛl o!

⁷Iwɛbɛ po ɛhi zhɛ hia sha atwa na namɛ na amɛ atwa na ɛɛ zhɛ aa ima hiiŋ, maa hiɛ shɛ ajama na cɛnjɛ ti nya. Nsono mi hiŋ keeni iyimɛyɛ hiŋ ugaiŋ-ti'ima zhɛ ya kwunanga.

⁸AGWANGWAMA Mokondo na shɛ Agwangwama na Hwuri Kpaaŋ, bu momo to, bɛɛ hiɛŋ, Ma nda inyizhi tubusa ta atwa Isrɛl. Ngee imi kaa du shimwono sha ata sha aba sha azhɛgba. N zhɛ ma shapa ụshɛpwụ ata ụ shɛ uhiu wa aba, ti iyi nɛ namɛ na amɛ ubwa ma pana atwa i'ime ya aba.

⁹Yaa shɛ atwa umpwa vwɛ nu umwono uko, ɛ zhɛ o 'wo.

¹⁰Yaa shɛ kaa bụtụ na 'yajɛ ụmatụ na atwa ata zhajɛ maa hwoŋzhingo n'wo ma aba, maa bacɛnga mụ nu umwono ata, unseni bụtụ na ta vwɛ taa na amɛ na amɛ umwono ata, bɛɛ hiɛŋ, I ta 'yajɛ suu bụtụ ta vwɛ apata? Nazhɛ bɛɛ zhɛ bɛ jishijɛ, bɛɛ hiɛŋ, Awo! Nazhɛ bụtụ ata bụ ụmatụ zhɛ bɛ hiɛŋ, Nama ma shiruu, tɛ shɛ shɛ te teyinje okwo izeci ya AGWANGWAMA o.

¹¹Iwɛnɛ po AGWANGWAMA ubwa ba pana-unu, ibɛ po shimwono shɛ na shi gembenji ta ma shɛ na shɛ gwụmwatangwụ sho hwuŋzwotongwu gbudugbudu.

¹²Idɛkwɛ suu eri yo gozhigo na aparatayɛ? I 'yajɛ suu bụtụ bo sugo inɛ ye eyi maa hwaŋ itimɛ ni itekwu?[17] Ama hio ubo tishiriri, ahiɛ njɛ tiririri maa tɛ shɛ iyi nɛ 'wanjɛ.

¹³Ahiɛba na hia busa iwɛnɛ ahiɛ lasụ ụshɛpwụ ata ɛɛ hiɛŋ. Lo-diba,[18] ɛhi hiɛŋ, shɛ ni ikɛnyi tu suu atu lasụ aŋ eti leshiji ashɛpwụ ata ɛɛ hiɛŋ, Kanaim?[19]

¹⁴Iwɛnɛ po AGWANGWAMA na shɛ Agwatana na Hwuri Kpaaŋ hiɛŋ, Ahiɛba atwa Isrɛl, hioko ma, N zhɛ ma hi ishicinganɛ ejeshi udenji uko na zhɛ ma hi sukakana. Ɛ zhɛ ma hi nda umungwuta te kwune no odubo ụshɛpwụ ata ɛɛ hiɛŋ, Hamat, na namɛ tuzuba tutu i ci busoso bu Araba ata namɛ tuta.