Read bassa EMOS 7 Bible Online

EMOS 7 - bassa bible

EMOS 7

¹Shɛlaga ma iyi nɛ AGWANGWAMA na shɛ Agwatana m mbiseni no ozobu. N kwụbɛ tu baa njɛ unyama wo ovworo, na aba na te e jwe iyimɛyɛ ya agwuma, nazhɛ ambɛ kwuneneni tusaba.

²Aka na Ngaa kwụbɛ te e hwuwi iyi elele nɛ ya saba tiya, Ngɛɛ hiɛŋ, AGWANGWAMA na Hwuri Kpaaŋ, Ma bụ tabwa maa gengeni atwa bụ![20] Gana naa atwa Jekob eri o binoo? E hwuri 'nyanɛ, ee lwegeji kaa du!

³Ibɛ po AGWANGWAMA sheyinji tuhaŋsa tu bwa iwɛ ijɛ, bɛɛ hiɛŋ, Ijɛ abụ kwụbɛ zha shɛ ya nda ya o.

⁴Iyi nɛ AGWANGWAMA Mokondo m mbiseni no ozobu anya na, N kwụbɛ tu baa suyana ụshɛrɛya ulwa maa pana atwa ubwa ulwapɛ nu ulwa ata, ibɛ po ulwa ata hwụŋcɛnjɛ meni mi itekwu, wee kwuni cɛnjɛ tuhwoŋzhingo.

⁵Nazhɛ Ngɛɛ hiɛŋ, AGWANGWAMA Mokondo, Ma bụ tabwa, ganga. Gana naa atwa Jekob eri o shikonoo? E hwuri 'nyanɛ ee lwegeji kaa du!

⁶Ibɛ po AGWANGWAMA sheyinji tuhaŋsa tu bwa sasana iwɛ ijɛ, bɛɛ hiɛŋ. Ijɛ abụ kwụbɛ zha shɛ ya nda ya o.

⁷Iyi nɛ AGWANGWAMA m mbiseni no ozobu anya na, N kwụbɛ ti bee shikeni nụ ụdatụ umwono na oo mo nu uhwohwo tuma tɛndarɛshɛnga, baa 'waŋnɛ uhwohwo tuma tɛndarɛshɛnga ni i'ɛlɛ ibwɛ.

⁸Ibɛ AGWANGWAMA n unseni, bɛɛ hiɛŋ, Gabụ ge Emos, imbe abụ kwụbɛɛ? Ngɛɛ jishijɛ bụ, Ngɛɛ hiɛŋ, N kwụbɛ uhwohwo tuma tɛndarɛshɛnga. Nazhɛ AGWANGWAMA hiɛŋ, Hioko N zhɛ ma shapa uhwohwo ga tuma tɛndarɛshɛnga Mo mbisono atwa mi Isrɛl, maa e mepi maa a shɛ gana ụdatụ na ontonu. N zha shɛ kaa mo sheyingo ya ahaŋsa mi iwɛ ulwapɛ na Ngɛɛ zhɛ ma pana aŋ o.

⁹Ɛ zhɛ a nda tingbekwu ta ajalalo Azik tu na aa zhɛba osombo, to shihwolu shi tijilo sha atwa Isrɛl, shi zhɛ sha sha ofwo tɛgadaga. N zhɛ du ma nda maa a kwụnɛ ayɛ tugwama ti ihwɛ Jeroboam nu ujasa.

¹⁰Nazhɛ ga Amazia na shɛ uhiu wo onongbo Bɛtɛl tumwananɛ agwuma Isrɛl, ge Jeroboam utumwa, bɛɛ hiɛŋ, Ge Emos ba nda ba ushaura na ashashɛ atwa Isrɛl iwɛ uhiuhiu bu. N-ndumwa mu na baa dumanjɛ mi zhɛ mo iricingo cɛnjɛ tu ga hwɛɛ.

¹¹Iyi nɛ ge Emos ba duma na, bi hiɛŋ, Agwuma ge Jeroboam zhɛ bo 'wo nu ujasa. Bɛɛ hiɛŋ sasana, Ɛ zhɛ a ima atwa Isrɛl maa a shɛ ajama na cɛnjɛ ti nya.

¹²Nazhɛ ga Amazia hiɛŋ Emos, A-bụkwụbɛ-bu-uhwaŋna, gozhigo gwulo na cɛnjɛ tu Juda maa enenji utumwa bụ apata, maa a bụ cɛpɛ du titeni tụ bụ apata.

¹³Ama ta duma ya tigesere ni Bɛtɛl gɛ sasana o, iwɛnɛ te epe shɛ ohwolu na agwuma a zhɛba Agwatana, aa shɛ du umwono wa Agwangwama cɛnjɛ-ta-tugwama tu ga hwɛɛ.

¹⁴Nazhɛ ge Emos jishijɛ Amazia, bɛɛ hiɛŋ, N shɛ shɛ bigesere o, N shɛ shɛ kaa du yɛu bigesere o,[21] ama bi'iywa-ba-agwụdụ Ngaa shɛ keeni buhwɛŋ bo owowo.

¹⁵Nazhɛ AGWANGWAMA n vwɛ na agwụdụ tungbaraka, bɛɛ n hiɛŋ, Zhaga dumangana atwa mi Isrɛl tigesere.

¹⁶Hwuwayɛ go, shɛlaga ma n-ndumwa ma AGWANGWAMA, hi hiɛŋ kede Ma dumangana ya atwa Isrɛl tigesere tu na ti zhɛ ta gwumana aŋ o, kede du Ma anangana ya atwa ihwɛ Isrɛl iyi nɛ zhɛ ya gwumana aŋ o.

¹⁷Amazia, ibɛ po AGWANGWAMA hiɛŋ, Biyikwo bu zhɛ ba sha buwɛle nụ ụshɛpwụ, utokwobi tuba zhɛ wa kwụna miaụŋ mụ bụ me eyi na miaụŋ mụ bụ mo o. Ɛ zhɛ a manga cɛnjɛ tụ bụ o dwotwogonu tu a pana anya atwa ukpeleshi uko, gabụ ni ikɛnyi bu bi zhɛ bo 'wo nu u'una wo oto-ụrụpɛ. Ɛ zhɛ kaa a ima atwa Isrɛl maa e beni na cɛnjɛ ta aba tilɛɛ.