Read bassa EMOS 9 Bible Online

EMOS 9 - bassa bible

EMOS 9

¹Ngaa kwụbɛ AGWANGWAMA ti bee shikeni to dongonu utukwu-ụrụpɛ,[25] bee peni-unu, bɛɛ hiɛŋ, Pa irige umwono wa Agwatana iyi, uuwa i ci aka na ukoshilo ubwa njɛ bulama. Hwuŋzo uŋ, iwɛ maa u leyiteni atwa ga, nazhɛ ɛɛ zhɛ a kwụna bụtụ be elele na vwɛ na ashashɛ aba nu ujasa, okwo bụtụ bu ko na amɛ aba zha shɛ ba vwa o, okwo bụtụ bu ko na amɛ aba kaa zha shɛ ba banangana o.[26]

²Okwo ee teni taa ni ihwɛ ye e'uye, apata Ngɛɛ zhɛ mɛ vwɛ aŋ, okwo ee munji taa na azuba, N zhɛ me kezhicinje aŋ.

³Okwo aa swacɛ ni ihiŋhiŋ Ishɛmɛ Kamɛl, N zhɛ ma dwarɛ aŋ apata mɛ imɛ aŋ, okwo ee meme sweci taa ni icicɛ Itekwu maa kede ma kwụba aŋ o, apata kaa Ngɛɛ zhɛ ma pana buduwo[27] unu na amɛ Itekwu ɛtɛ maa lụmanjɛ aŋ.

⁴Okwo atwa i'ime ya aba 'imɛ aŋ, aa shɛ ajama, N zhɛ ma pana-unu maa ga kwụnɛ aŋ nu utokwobi. N nduwa ahaŋsa mi oko maa mo iricingo aŋ hwɛɛ, shɛ iwɛ maa mo mbiyono aŋ o.

⁵AGWANGWAMA na shɛ Agwatana Mokondo na Hwuri Kpaaŋ timengeni cɛnjɛ tu unyizo, too zhingotu, nazhɛ atwa na jɛjɛ na tuba to-ụkwụla. Cɛnjɛ tu unyizo hwɛ hwɛɛ ti shɛŋ nazhɛ taa hwɛŋ, tee iri gana Urefu Nayɛl ata namɛ ni Ijipti.

⁶Ubwa na mo ihwɛ ibwɛ taa na azuba, bee zucinje ukoshilo wa azuba na cɛnjɛ tu unyizo. Ubwa du mbɛ meni mi itekwu baa 'wɛŋ mụ na cɛnjɛ tu unyizo, ɛ hiɛŋ izeci ibwɛ AGWANGWAMA.

⁷AGWANGWAMA hiɛŋ atwa Isrɛl, Shɛ gana atwa Itiopia suu ahiɛ n shanɛ? Ahiɛba atwa Isrɛl, shɛ Gamba suu n hi bɛcinjɛ na cɛnjɛ ti Ijipti? Ngɛɛ bɛcinjɛ atwa Filistia na cɛnjɛ tu Kafto-krɛt. Ngɛɛ bɛcinjɛ atwa Siria na cɛnjɛ ti Ki.

⁸Hioko ma, eshe mi Gamba AGWANGWAMA na shɛ Agwatana Mokondo ma ngbaraka cɛnjɛ-ta-tugwama tu ga ti iwɛwɛ. N zhɛ kaa mo iricingo tu na azuba cɛnjɛ tu ga tu unyizo, semi ihwɛ Jekob kiri Ngaa zha shɛ mo iricingo hwɛ hwɛɛ.

⁹N zhɛ ma pana-unu, Ngɛɛ zhɛ kaa mo susogo ihwɛ Isrɛl na ashashɛ edenji elele gana na te biyikwo bo susogo inɛmɛ ni isele, ama kaa i zasa atwa awɛ okwo bu ko zhɛ ba banangana o.

¹⁰Anjɛ-iwɛwɛ elele a na zweni na ashashɛ atwa mi, ɛ zhɛ o 'wo tu'wo tu ujasa, kpaaŋ aba a na hiɛŋ, Iyi iwɛ zha shɛ mo ti jitono, kwo kaa ma ti zhaganɛ o.

¹¹AGWANGWAMA hiɛŋ, Aka ata ci hwuŋ, N zhɛ me gwuricingeni Devid cɛnjɛ-ta-tugwama tu bwa tu na ti leyi la gana umwono na hwuŋzwo, Ngɛɛ zhɛ ma nangangana tụbwaratagwụ ta adatụ ubwa. N zhɛ ma maanana tụ maa tɛ shɛ gana ala ụngwụshɛ.

¹²Atwa Isrɛl zhɛ a lashajɛ atwa elele na ta vwanganɛ ni Idụm keeni edenji elele na aa suyana ni izeci mi. AGWANGWAMA na zhɛ a nda iŋ ubwa dumwa.

¹³AGWANGWAMA hiɛŋ, Aka oko e ci ba hwuŋ, ti iyi izɛgwu zhɛ na na kakayɛ yo hwulo gana na ahwɛŋ itimɛ eri a dwa, afwafwa zhɛ a 'wala tụ'walụ o hwulo gana na anjɛ meni mụ tụ'walụ ta afwafwa eri a nda, meni mụ tụ'walụ ta afwafwa mụ ụlatụ mi zhɛ mi ne ngbenji nu nshama. Mɛɛ zhɛ mu na fwunga ne tingbekwu.

¹⁴N zhɛ me gwuricinje atwa mi Isrɛl[28] a na aa 'imɛ la na cɛnjɛ ta aba, ɛ zhɛ kaa a maanana ashɛpwụ ata aba a na hwuŋzwotongwu la, ɛ zhɛ kaa a nama na aba, ɛ zhɛ a bila afwafwa, ɛɛ zhɛ a swa meni ma aba, ɛɛ zhɛ a hwaŋ itimɛ ɛɛ zhɛ a ya tụ'walụ ti ibɛ.

¹⁵N zhɛ ma gɛgɛcɛnga atwa mi na cɛnjɛ ta aba ti ikɛnyi aba tu na Ngee peni aŋ la, a zha shɛ a ishɛcɛnga aŋ ya sasana maa a vwɛ aŋ na cɛnjɛ ta ata Ngee peni aŋ kwukwuŋ. AGWANGWAMA na shɛ Agwatana hiŋ, ubwa dumwa.