Read bassa OBADIA 1 Bible Online

OBADIA 1 - bassa bible

OBADIA 1

¹Ozobu na go Obadia kwụbɛ na, Iyi nɛ AGWANGWAMA Mokondo jɛmɛ iwɛ Idụm na. Tụ hwụjɛ unabarɛ na banɛ no olugwo AGWANGWAMA, maa AGWANGWAMA tumwanɛ butumwa bwa no ofwo edenji, bɛɛ hiɛŋ, Ishijɛ ma, mizha ti zhe ma maa tu sukakanɛ ma Idụm nu ujasa!

²Hioko, N zhɛ ma bụ nda maa 'nyanɛ na ashashɛ edenji, bụtụ be elele zhɛ ma bụ ngbaraka fufurɛnjɛ.

³Tumama sata tu na tu namɛ na amɛ bụ ti bi helekeci, iwɛnɛ abụ namɛ kaa no ofwo na zeci legbe legbe.[1] Ibɛ po abɛ jɛmɛ na amɛ na amɛ bụ, ɛbi hiɛŋ, Gaaba eri me n kezhicinje na cɛnjɛɛ?

⁴AGWANGWAMA hiɛŋ, Okwo ebu munji no ofwo na zeci legbe legbe gana ugbeji, gana bụtụ na to tuhwurugwo tu bwa na ashashɛ mkpasu, okwo ti yaa shɛ gana ata, N zhɛ me bi kezhicinje.

⁵Yaa shɛ ozundo keeni ashɛrɛ a bụ zhaganɛ nụ ụjita maa e zunji izunde, shɛ alakpa iyɛrɛ ɛɛ zhɛ mo bu zwono! A zha shɛ suu o sugo i'wɛŋnɛ bu uuwa i ci gana na aa jala? Yaa shɛ atwa na o two tụ'walụ ta afwafwa zhajɛ ee cwi tụ'walụ ta afwafwa bụ, shɛ a na ticwɛŋ kwakwa su ɛɛ zhɛ a waŋpangana?

⁶Hioko, te e dwelekeci uduciya wa ajalalo Isụ, oo to uŋ ugbe, ee suji uŋ hwɛɛ.

⁷Atwa na abụ twa la unu na aba kpaaŋ, e bi helekeci; ee bi becinji nu u'una bụ. Atwa na abụ ga 'yajɛ la amɛ-olom na aba, aba ụbụ lasụ ya hwuwayɛ go. Eyejilo bu na abu ga patanɛ la rishe, aba bi biteni ya ugwuru; bi eshiciji shi kaa iyi elele iwɛ ibɛ o.

⁸AGWANGWAMA dumwa, bɛɛ hiɛŋ, Ụjita ata Ngɛɛ zhɛ ma pana atwa Idụm ulwapɛ ci hwuŋ, N zha shɛ suu mo iricingo atwa ata ti'inta, keeni atwa na eshiciji iyi ni Ishɛmɛ Isụ kpaaŋ?

⁹Oo ahiɛba atwa Teman,[2] ohwulu zhɛ o horukono hwuŋ ejeshi ata hiŋ urishi, ɛ zhɛ kaa a kwụna bụtụ be elele na namɛ ni Ishɛmɛ Isụ.[3]

¹⁰Ezuye zhɛ mo bu urugono hwuŋ iwɛ abwagara ata abɛ njɛ la Jekob.[4] Ɛ zhɛ kaa mo bu iricingo unyizo-nom.

¹¹Bi shikeni la taa dụlụ nụ ụjita na agaiŋ zhajɛ ee suji uduciya Jɛrusalɛm. Atwa cɛnjɛ ti nya teni shidubo shɛ bwa, abɛ shɛ gana bụtụ aba bu ko.

¹²Bu ga shɛ shɛ ba ngbaraka yɛu-bino bu cwɛŋ nụ ụjita na uwaŋna-ụwɛ vwuteni bu o; bu ga shɛ shɛ kaa ba bwada unyasa nụ ụjita na oo iricingo atwa Juda o. Bu ga shɛ shɛ kaa bu na duma ishɛkɛ nụ ụjita na tiriri tu vwuteni bu o.

¹³Bu ga shɛ shɛ bo tono ụshɛpwụ wa atwa mi nụ ụjita na ebe meni aŋ, maa hi hiɛnjɛ aŋ ilɛtu nụ ụbaụta wa aba o. Ta ngbaraka ma Abara-ne-ebe na vwuteni aŋ cwɛŋ maa hi suji i'wɛŋnɛ ya aba nụ ụjita na ufwu tɛnda zhaganɛ aŋ o.

¹⁴Bu ga shɛ shɛ bo shikono ne eseshi ihwɛŋnɛ maa na ima atwa na a jala maa e benengeni o. Bu ga shɛ shɛ bo sugo aŋ maa utegeni aŋ atwa aba i'ime na aka na aa namɛ ne tiriri o.

¹⁵Ụjita na Ngɛɛ zhɛ ma duma ụshɛrɛya we edenji kpaaŋ Gamba AGWANGWAMA, u gwumwongonu ya. Gabụ ge Idụm, ɛ zhɛ a bụ nda du iyi nɛ abɛ njɛ la atwa. Iyi nɛ abɛ njɛ la zhɛ ye gwure nu uhiuhiu bu.

¹⁶Iwɛnɛ po gana na obu swowo la ukwopi ulwapɛ isɛbwɛ mi ni ishɛmɛ mi tijilo, gobwonu du edenji na ubu rungwutwonu zhɛ a uranga una wa aba tuswa tutu o hwuwowu. Ɛ zhɛ na swa maa mu na ngba aŋ, ɛ zhɛ a sha gana maa e mepi shi okwo a namba ya o.[5]

¹⁷Ama atwa na benengeni zhɛ a nama ni Ishɛmɛ Zayon, ibɛ yɛɛ zhɛ ya sha ofwo tijilo. Atwa ihwɛ Jekob zhɛ a 'yaga cɛnjɛ ta aba.

¹⁸Atwa ihwɛ Jekob zhɛ a sha ulwa, atwa ihwɛ Josɛf zhɛ a sha bụratụ bu ulwa. Atwa ihwɛ Isụ zhɛ a sha andụrụ, ɛ zhɛ a sapa aŋ ulwa o hwoŋzhingo aŋ. I zasa ụlamụ Isụ zhɛ wa banangana o. AGWANGWAMA dumwa.

¹⁹Atwa na namɛ zalụ tuta, aba zhɛ a lashagaga Ishɛmɛ Isụ; atwa na banɛ ne embi nshama, aba zhɛ a 'yaga cɛnjɛ ta Afilistia. Aba du zhɛ a lashagaga shihilo sha atwa Ifrem keeni Samaria; atwa Bɛnjamin aba zhɛ a 'yaga Giliad.

²⁰Ejeshi atwa Isrɛl a na aa 'imɛ la, aba zhɛ a 'yaga Fonishia uuwa i ci Zarefat. Atwa Jɛrusalɛm na aa 'imɛ la a na namɛ ni Sɛfarad, aba zhɛ a 'yaga ashɛpwụ ata namɛ tuta tu Juda.

²¹Eleeleji zhɛ o mungo Ishɛmɛ Zayon, maa a untangana nshama mi Isụ. AGWANGWAMA ni ikɛnyi ibwɛ ubwa tuba zhɛ ba 'yaga cɛnjɛ-ta-tugwama ta ata.