Read bassa JONA 3 Bible Online

JONA 3 - bassa bible

JONA 3

¹Nazhɛ AGWANGWAMA dumananɛ n-ndumwa no Jona na aka yebi, bɛɛ hiɛŋ,

²Ishijɛ, zhaga Ninivɛ ụshɛpwụ ata ụ'wụtụ, anangana aŋ utumwa na Ngaa bu tumwanɛ.

³Go Jona hwụjɛ ya unu wa AGWANGWAMA, bee zhe Ninivɛ. Ninivɛ kaa shɛ ụshɛpwụ na gembi duwa, bụtụ eri bo rungo uŋ i ci ijitɛ itɛtu nazhɛ botogwu uŋ.

⁴Go Jona kwuni ga ụshɛpwụ ata tutono, bee zhe tahaŋnụ tu uwaŋna uko mudu. Baa uganɛ, bɛɛ hiɛŋ, I ta vwɛ hwayɛ ijitɛ buhanda tɛ ɛ zhɛ e iricingo Ninivɛ gɛ.

⁵Atwa Ninivɛ tɛtanɛ utumwa wa Agwatana rishe; ibɛ po ee enenji iwɛ ezumi tɛnda, ee uregeni tugwuno tụ ụcɛnjɛ tɛnda[3] na mbiseni atwa maa shɛmɛ sha aba shɛ hashɛganụ, aa jɛshɛrɛjɛ-shihaŋsa te kwune na atwa na gembenji tutu atwa na gwụmwatangwụ.

⁶Aka na agwuma Ninivɛ hwụjɛ unabarɛ iwɛ ɛtɛ, bɛɛ ishijɛ ni idwɛtwɛ ibwɛ, bee ushiji utogwo ubwa u tugwama, bee urigeni tugwuno tụ ụcɛnjɛ tɛnda, baa dula ma'alụ.[4]

⁷Ibɛ po unu-tɛtɛtagana beni no olugwo agwuma Ninivɛ keeni atwa ubwa shihwolu, ee enenji ni Ninivɛ kpaaŋ, ɛɛ hiɛŋ, Kede bụtụ be elele yɛ iyimɛyɛ o. E kepeni bụtụ be elele iyi tiya keeni meni tuswa ti iyimabiga ye elele.

⁸Ama ga bụtụ be elele ti iyimabiga urugono tugwuno tụ ụcɛnjɛ tɛnda, ga bụtụ be elele lụpɛ Agwatana ilupwɛ i'wɛtwɛ. I shɛ i tilɛɛ maa ga bụtụ bụtụ jɛshɛrɛjɛ-ahaŋsa maa ganga masha mu bwa mụ wɛ keeni iyi iwɛ nɛ baa ga nda.

⁹Nekeshi Agwatana a ganga isɛbwɛ gɛ ibwɛ i'wɛtwɛ maa kede mo ti iricingo.

¹⁰Aka na Agwatana kwụbɛ iyi nɛ aa njɛ, gana na aa jɛshɛrɛjɛ-shihaŋsa, ee genji masha ma aba mụ wɛ, ibɛ po Agwatana genji iyi iwɛ nɛ bɛɛ gɛ hiɛŋ bi zhɛ ba nda aŋ.