Read bassa TƐRƐCƐ 10 Bible Online

TƐRƐCƐ 10 - bassa bible

TƐRƐCƐ 10

¹Nazhɛ AGWANGWAMA hiɛŋ Moses,

²Dubo azụrụfa maa njɛ akakacɛ eyebi, na aba ɛbi zhɛ bu na suyana atwa tu'ulwatagwụ hwɛɛ, keeni ti'ishijɛ na agba aba.

³Aka na te e hwuri aŋ hwɛɛ aba eyebi taawụụ, ga atwa ụlwatagwụ no ofwo bu no odubo udulo tu'ulwatagwụ.

⁴Ama yaa shɛ uko ee hwuri, asha ga shɛ ehwurembe a na shɛ ehiu alamụ Isrɛl kiri zhɛ a ụlwatagwụ no ofwo bu.

⁵Aka na ebu hwuri ukakacɛ ata duwa, asha ga shɛ ụlamụ wa atwa na jwe ugba wa aba geri bu uwaŋna-banụ kiri zhɛ o kwuno tahaŋnụ ta aba.

⁶Aka na ebu hwuri uŋ sasana duwa na aka yebi, ga ugba ụlamụ na namɛ tuta ishijɛ tahaŋnụ ta aba. Tuhwulo tu ukakacɛ ata duwa tɛ shɛ iwɛ maa agba atwa ishijɛ tahaŋnụ.

⁷Ama aka na aba jala maa ga tu'ulwa tu sotulonu hwɛɛ, asha bɛ shɛ bo hwulo uŋ, ama to hwulo uŋ taawụụ o.

⁸Miaụŋ-me-eyi mu Aron bunongbo, muba mɛ shɛ mu no hwulo akakacɛ ata. Shikpogo shɛ ga shɛ shɛ shikpogo shi unyizo-nom; iwɛ hiŋ keeni iwɛ awaŋnɛ hiŋ na te e ci kpaaŋ.

⁹Aka na ɛhi zhɛ ujasa na cɛnjɛ ti hiŋ maa hi sukakanɛ atwa i'ime hiŋ a na ma hi nda umungwuta, hwulo ma akakacɛ ata taawụụ, iwɛ maa AGWANGWAMA na shɛ Agwatana hiŋ ihi bicinji ni i'ɛlɛ ya atwa i'ime hiŋ.

¹⁰Hiɛ shɛ hi no hwulogono du arụpɛ hiŋ tuhwoŋzhingo keeni arụpɛ hiŋ amɛ-olom akakacɛ, na aka bu unyasa hiŋ tubwada, nu nsono mi hiŋ mi ipiɛnɛ ifwo, iwɛ maa inɛ ɛtɛ i shɛ titeyinje ti hiŋ nu umbe Agwatana hiŋ. Gamba AGWANGWAMA na shɛ Agwatana hiŋ na.

¹¹Udomu pashɛngwa nu udulo ata u tiseyida, nụ ụjita woshi, nu upiana uyebi nu uywa uyebi [na ta atwa ata banɛ ni Ijipti.]

¹²Atwa ata beni nụ Ụshɛka Sainai, ee zhe tahaŋnụ ta aba nu umama 'wanụ. Udomu ata ubwa kaa wa 'yagaga aŋ ee keshi Ụshɛka Paran.

¹³Ɛ ishijɛ tahaŋnụ ta aba ti hiiŋ nu gana na ta AGWANGWAMA peni aŋ unu tedure no Moses.

¹⁴Atwa ụlamụ Juda, aba ɛ ishijɛ tahaŋnụ ta aba hiiŋ gana na te ejeshi aba namɛ ni igɛrigɛ ya aba. Ga Nashon yɛu Aminadab, ubwa shɛ uhiu unyama wa aba.

¹⁵Gɛ Netanɛl yɛu Zuar, ubwa shɛ uhiu unyama ụlamụ Isaka.

¹⁶Gɛ Ɛliab yɛu Hilon, ubwa shɛ uhiu unyama ụlamụ Zɛbulon.

¹⁷Aka na te e mushenji udulo ata, nazhɛ atwa ụlamụ Gɛshon keeni atwa ụlamụ Mɛrari a na a 'waŋna uŋ ɛ ishijɛ.

¹⁸Atwa na 'wa aŋ, a shɛ ụlamụ Rubɛn, ni igɛrigɛ ya aba gana na te ejeshi aba namɛ. Gɛ Ɛlizu yɛu Shɛdɛu, ubwa shɛ uhiu unyama wa aba.

¹⁹Gɛ Shɛlumiɛl yɛu Zurishadai, ubwa shɛ uhiu unyama wa atwa ụlamụ Simion.

²⁰Gɛ Ɛliasaf yɛu Dɛuyɛl, ubwa shɛ uhiu unyama wa atwa ụlamụ Gad.

²¹Nazhɛ atwa Kohat a na a 'waŋna iyi tijilo zhɛ ɛ ishijɛ tahaŋnụ ta aba. A shɛ o to apata tobwolo o shikicingwo udulo ata.

²²Nazhɛ atwa ụlamụ Ifrem zhɛ ɛ ishijɛ tahaŋnụ ta aba gana na te ejeshi aba namɛ ni igɛrigɛ ya aba. Gɛ Ilishama yɛu Amihud, ubwa shɛ uhiu unyama wa aba.

²³Ga Gamaliɛl yɛu Pidazu, ubwa shɛ uhiu unyama wa atwa ụlamụ Manasɛ.

²⁴Ga Abidan yɛu Gidioni, ubwa shɛ uhiu unyama wa atwa ụlamụ Bɛnjamin.

²⁵Nazhɛ atwa ụlamụ Dan, zhɛ ɛ ishijɛ tahaŋnụ ta aba umɛwɛɛ gana na te ejeshi aba namɛ ni igɛrigɛ ya aba. Ga Ahieze yɛu Amishadai, ubwa shɛ uhiu unyama wa aba.

²⁶Gɛ pigiɛl yɛu Okran, ubwa shɛ uhiu unyama wa atwa ụlamụ Ashɛ.

²⁷Ga Ahira yɛu Inan, ubwa shɛ uhiu unyama wa atwa ụlamụ Naftali.

²⁸Gana ganana atwa Isrɛl ɛ ishijɛ tahaŋnụ maa e beni nu agba aba na tumama 'wanụ gana na tu unyama wa aba namɛ.

²⁹Nazhɛ go Moses hiɛŋ udashɛ ubwa go Hobab yɛu Rɛuyɛl, na shɛ bụtụ bu Midian, Ti zhɛ to kwuno tahaŋnụ tu tu maa ta zha no ofwo na AGWANGWAMA hiɛŋ bi zhɛ ma tu pana. Hwure maa zhagaga no tu, ti zhɛ kaa ta bu nda tebiye. Iwɛnɛ po AGWANGWAMA iti shilwonuo-unu atuba atwa Isrɛl, bɛɛ hiɛŋ, N zhɛ ma hi pana tụ, maa ihi zhɛmanɛ.

³⁰Ama go Hobab jishijɛ bụ, bɛɛ hiɛŋ, Awo, N zhɛ mo gwulo na cɛnjɛ tu udenji mu.

³¹Go Moses hiɛŋ bụ, sukwu, ta tu ganga o. Iwɛnɛ po bi mepi ofwo na ɛti zhɛ ta dwa ugba tu nụ ụshɛka ata, gabụ kaa bi zhɛ ba sha rishe ru tu.

³²Yaa shɛ kaa ebi zhe no tu, ti zhɛ ta bu pana du uwebiye ye elele nɛ AGWANGWAMA zhɛ ma tu pana apata.

³³Gabata atwa ata beni ni Ishɛmɛ ya AGWANGWAMA,[7] ee zhe tahaŋnụ ijitɛ itɛtu. Ikpɛtɛ Unu-tutwa ya AGWANGWAMA, ibɛ yo hwulono aŋ umbe, maa i dwelekekeni aŋ ofwo na maa e jwe ugba wa aba.

³⁴Aka elele na tɛ ɛ ishijɛ tahaŋnụ ta aba te e beni nu ugba na aa ga namɛ, udomu wa AGWANGWAMA wo ubo aŋ na aka bu uwaŋna.

³⁵Aka elele na ti Ikpɛtɛ ɛtɛ ishijɛ tahaŋnụ, go Moses bɛ hiɛŋ, Oo AGWANGWAMA, ishijɛ, maa gereteji atwa i'ime, maa atwa na ma bụ sukakana e bi gezhigeni.

³⁶Aka elele na kaa wee shikeni, bɛ hiɛŋ, Oo AGWANGWAMA, gwure no ofwo atwa Isrɛl a na shɛ igbɛɛ nɛ bụtụ eri shi ba rɛta.