Read bassa TƐRƐCƐ 12 Bible Online

TƐRƐCƐ 12 - bassa bible

TƐRƐCƐ 12

¹Ge Miriam na Aron dumanganɛ Moses n-ndumwa mụ wɛ iwɛnɛ bee zeni biyikwo na shɛ Bukush.[11]

²Ɛɛ hiɛŋ, Go Moses kiri hŋ AGWANGWAMA a duma iwɛ tedure nu bwa? Bi zha shɛ suu ba duma du iwɛ tedure no tu? AGWANGWAMA kaa hwụjɛ iŋ.

³Bụtụ ga ɛɛ hiɛŋ go Moses kaa shɛ bụtụ bu tusuu uhwuri atwa elele na ubeni na cɛnjɛ tu unyizo ga.

⁴Eshigiri AGWANGWAMA hiɛŋ Moses na Aron keeni Miriam, Banɛ ma hi zhe nu udulo tu'ulwatagwụ hwɛɛ ba ahia tatụ. Ee beni, ee zhe ga aba tatụ ata.

⁵AGWANGWAMA kezhe nu udomu ata u tuwam, bee shikeni no odubo udulo ata, baa suyanɛ Aron keeni Miriam. Ee zhe ebe yebi ata.

⁶AGWANGWAMA hiɛŋ aŋ, Shɛlaga ma iwɛ nɛ Ngɛɛ zhɛ ma duma. Aka na egesere mi namɛ na ashashɛ hiŋ, M momo mbisono aŋ no ozobu, Ama duma iwɛ na aba na awalabụ.

⁷Ama shɛ gana ata yaa shɛ ni yɛu mi ugondu go Moses ga o, ama ubwa shɛ bụtụ bɛ tɛcara na atwa ihwɛ mi hwɛɛ.

⁸Ibɛ po Ama duma n-ndumwa nu bwa kpataa na tumama ngbarakanụ, shɛ ne eshi o, baa kwụbɛ kaa gana na Ngaa shɛ. Imbe po ahiɛ njɛ shɛ inyɛsɛ n-ndumwa mụ wɛ tudumangana yɛu mi ugondu go Mosesii?

⁹Ibɛ po AGWANGWAMA njɛ isɛbwɛ na aba, bee beni apata bee genji aŋ.

¹⁰Aka na tu udomu pashɛngwa nu udulo ata, gunu ata ụngwụ-uwaŋna 'imɛ Miriam, baa cɛnjɛ mɛ kwurwaa gana ụhwụla. Aka na ti ga Aron mbiyanɛ, baa kwụbɛ tụ ụngwụ-uwaŋna 'imɛ bụ.

¹¹Bɛɛ hiɛŋ Moses, Oo iyɛri mi, sukwu, ta tu pana ulwapɛ iwɛ iwɛwɛ gɛ atɛ njɛ nụ ụlagwụ tu o.

¹²To lono maa ba sha gana bụtụ na 'we taa na amɛ bino bwa, na kaa iyi ike yɛ ashashɛ usunda tu'waba ubwa nazhɛ ee meci bu o.

¹³Go Moses ugananɛ AGWANGWAMA, bɛɛ hiɛŋ, Oo, Agwatana, sukwu, nɛnga bụ kaa!

¹⁴Ama AGWANGWAMA jishijɛ Moses, bɛɛ hiɛŋ, Yaa shɛ bishi bwa ge zweni bu mecemi ne eshe, ezuye suu ga zha shɛ a sha bụ i ci ijitɛ icenje? Gabata du bacɛnga bu ma nu ugba tu'ulwa maa hi kepi bu no tupohondo ijitɛ icenje, na aba ibɛ nazhɛ hi gwuricinje bu.

¹⁵Ee becinji ga Miriam no tupohondo, ee kepi bu ijitɛ icenje, atwa vwɛ kaa du zhe shi tahaŋnụ uuwa i ci aka na ee gwuricinje bu na amɛ tu'ulwa o.

¹⁶Na aba ibɛ nazhɛ atwa ata shɛdɛnjɛ tahaŋnụ ta aba, ee beni nu Hazɛrot, ee jwe ugba wa aba nụ Ụshɛka Paran.