Read bassa TƐRƐCƐ 13 Bible Online

TƐRƐCƐ 13 - bassa bible

TƐRƐCƐ 13

¹Nazhɛ AGWANGWAMA hiɛŋ Moses,

²Tala atwa na shɛ ehwurembe oko oko na amɛ alamụ umpwa-na-ba-eyebi, maa tumwanɛ aŋ maa a yalagajɛ cɛnjɛ ti Kenan tu na Ngee peni atwa Isrɛl.

³Go Moses tumwanɛ aŋ ga, ee beni nụ Ụshɛka Paran, gana na ta AGWANGWAMA peni bu unu. Hwɛɛ aba shɛ ehwurembe atwa Isrɛl.

⁴Nzeci ma aba na: Bụtụ na beni nụ ụlamụ Rubɛn, i shɛ ga Shamua yɛu Zaku.

⁵Bụtụ na beni nụ ụlamụ Simion, i shɛ ga Shafat yɛu Hori.

⁶Bụtụ na beni nụ ụlamụ Juda, i shɛ ga Kalɛb yɛu Jifune.

⁷Bụtụ na beni nụ ụlamụ Isaka, i shɛ ge Igal yɛu Josɛf.

⁸Bụtụ na beni nụ ụlamụ Ifrem, i shɛ go Hoshia yɛu Nụn.

⁹Bụtụ na beni nụ ụlamụ Bɛnjamin, i shɛ ga Palti yɛu Rafu.

¹⁰Bụtụ na beni nụ ụlamụ Zɛbulon, i shɛ ga Gadiɛl yɛu Sodi.

¹¹Bụtụ na beni nụ ụlamụ Manasɛ na shɛ ụlamụ Josɛf, i shɛ ga Gad yɛu Susi.

¹²Bụtụ na beni nụ ụlamụ Dan, i shɛ ga Amiɛl yɛu Gɛmali.

¹³Bụtụ na beni nụ ụlamụ Ashɛ, i shɛ gɛ Sɛtu yɛu Mikaɛl.

¹⁴Bụtụ na beni nụ ụlamụ Naftali, i shɛ ga Nabi yɛu Vofsi.

¹⁵Bụtụ na beni nụ ụlamụ Gad, i shɛ gɛ Gɛuyɛl yɛu Maki.

¹⁶Nzeci ma atwa ga go Moses tumwanɛ maa a yalagajɛ cɛnjɛ ta ata ta. Go Moses po Hoshia yɛu Nụn izeci tu go Joshua.

¹⁷Aka na go Moses ba tumwana aŋ maa a yalagajɛ cɛnjɛ ta ata ti Kenan, bɛɛ hiɛŋ aŋ, Ehi beni epe, dulo ma tuzuba maa hi teni cɛnjɛ ta ata tuta ta tuba, nazhɛ hi teni na cɛnjɛ ti ishɛmɛ.

¹⁸Yalajɛ ma gana na ta cɛnjɛ ta ata tɛ shɛ, ta atwa na jɛjɛ na tuba okwo a 'yajɛ ikɛnyi, kwo kaa e lwegeji, okwo e gembi ufwugwo, kwo kaa a twa sụ ufwugwo.

¹⁹Yalajɛ ma okwo cɛnjɛ ta ata aa jɛjɛ na tuba tɛ zhɛmɛ kwo kaa tɛ zhɛshɛ o, okwo a namɛ na ashɛpwụ na zasa uba kwo kaa uba rungwutwonu ashɛpwụ aba.

²⁰Yalajɛ ma okwo cɛnjɛ ta ata ti 'yajɛ ugwungwu, kwo kaa tu 'wi, okwo ti 'yajɛ i'wɛ'wɛ kwo kaa tu zasa o. Nda ma tilɛɛ maa hi cwe emeseyi tụ'walụ ti iyi nɛ 'weri na tuba. Na aka ata kaa ibɛ tụ'walụ ta afwafwa tu kwuni tɛna.

²¹Gabata atwa ata sanɛ umungwo aa yalajɛ cɛnjɛ ta ata te kwuni nụ Ụshika Zin tutu i ci Rɛhob, to dongonu tutono tu Hamat.

²²Aa sanɛ ee zhe zalụ tuta ta cɛnjɛ ta ata tugwo hiiŋ, ee ci Hibron; apata agbandụ, ga Ahiman, ne Shishai keeni Telmai a na shɛ ajalalo Anak namɛ. (O mo Hibron shiywa shi cenje nazhɛ oo mo Zoan na namɛ na cɛnjɛ ti Ijipti.)

²³Aka na ee ci ulomu Ɛshkol, apata aa jajɛ a'walụ ufwafwa uko na 'yajɛ ukoko tụ'walụ tu na ti zhineni, ee shiyeni ụ'wụ'wụ na ashashɛ tuba ibɛ atwa eyebi 'waŋnɛ tụ. A jarɛ du tụ'walụ tu Pomɛgranati[12] keeni tụ'walụ to owowo.

²⁴Ecilo no po oo po apata izeci maa Ulomu Ɛshkol[13] i shɛ iwɛnɛ ta atwa Isrɛl jajɛ ukoko tụ'walụ tu ufwafwa apata.

²⁵Ijitɛ buhanda, aa yalajɛ cɛnjɛ ta ata nazhɛ ee jiye.

²⁶Ee zhe no ofwo Moses, na Aron keeni tu'ulwatagwụ ta atwa Isrɛl hwɛɛ, nụ Ụshɛka ata Paran no ofwo na ɛɛ hiɛŋ Kadɛsh. Ee mbishi aŋ unabarɛ iyi nɛ ɛɛ kwubɛ ee mbiseni aŋ du tụ'walụ ta cɛnjɛ ta ata aa 'waŋnɛ ne eshe tu'ulwa ti Isrɛl hwɛɛ.

²⁷Ɛɛ hiɛŋ Moses, Ti yalajɛ cɛnjɛ ta ata, abụ tụ tumwanɛ, ti 'yajɛ ugwungwu, tuwebiye kaa ta fwunga na tuba. Tụ'walụ ta tuba tu ko na du atu 'waŋnɛ.

²⁸Ama atwa na jɛjɛ na cɛnjɛ ta ata 'yajɛ ukpahiŋ tebiye. A jɛjɛ kaa na ashɛpwụ na gembenji a na kaa uba rongonu. Shɛ inɛ ɛtɛ kiri o, tu kwubɛ agbandụ a na shɛ ajalalo Anak apata.

²⁹Atwa Amalɛk jɛjɛ tuta ta cɛnjɛ ta ata, Ɛhɛt, na Ɛjɛbus keeni A'amo jɛjɛ na cɛnjɛ ti ishɛmɛ, Ekenan tuba jɛjɛ nụ ụpalanụ itekwu ɛtɛ palanganɛ Urefu Jodan.

³⁰Ama ga Kalɛb lakanɛ atwa ata a na ulwa nu umbe Moses, bɛɛ hiɛŋ, Mizha tu hwuri ma hwuwayɛ go maa ti tefuleji ma cɛnjɛ ta ata; ikɛnyi tu ci maa ta lashɛga tụ gom.

³¹Ama atwa na ge zhe na Kalɛb hiɛŋ, Ti eri shi ta tafulaga atwa ata o, a 'yajɛ ukpahiŋ tebiye ee tu hwuri.

³²Gana atwa ata mburusonu unabarɛ ata ụwɛ na ashashɛ atwa Isrɛl iwɛ cɛnjɛ ta ata aa yalagajɛ ta. Ɛɛ hiɛŋ, Cɛnjɛ ta ata tɛ yɛwa atwa na jɛjɛ la na tuba. Atwa elele na kaa ɛtu kwubɛ apata, e gembenji ee tu hwuri tebiye.

³³Tu kwubɛ kaa du Ɛnɛfili a na shɛ ajalalo Anak apata. Atɛ shɛ ya gana a'nywa ne eshe tu, gobwonu du kaa atɛ shɛ ne eshe aba caakwụ.