Read bassa TƐRƐCƐ 14 Bible Online

TƐRƐCƐ 14 - bassa bible

TƐRƐCƐ 14

¹Nazhɛ atwa ata hwɛ hwɛɛ aba uganɛ, aa cwɛ-u'wo nụ ụjita ata uuwa gi iyi yo holo.

²Tu'ulwa ta atwa ata kpaaŋ tu ngwulengengeni Moses keeni Aron; ɛɛ hiɛŋ, I go dobogo maa to 'wo la na cɛnjɛ ti Ijipti! Kwo kaa na amɛ ụshɛka ga!

³Iwembe kwuŋ po AGWANGWAMA utu suje na cɛnjɛ tu ga, iwɛ maa a tụ kwụnɛ no otokwobii? Maa e suji eyikwo tu ta miaụŋ mu tu. I ga zha shɛ yo dobogo maa to gwulo ni Ijipti hŋ?

⁴Nazhɛ aa mama hiaŋnụ, Ti teri ma bụtụ bu ko maa sha buhwuri-bu-umbe tu maa to gwulo ni Ijipti.

⁵Nazhɛ go Moses keeni Aron ubi apɛshɛka aba na cɛnjɛ nu umbe tu'ulwatagwụ ta atwa Isrɛl hwɛɛ.

⁶Go Joshua yɛu Nụn keeni Kalɛb yɛu Jifune, a na namɛ na atwa ata yalajɛ la cɛnjɛ ta ata, dwetweji tugwuno ta aba na amɛ-tụhaŋtụ,

⁷ɛɛ hiɛŋ atwa tu'ulwa ta ata kpaaŋ kpaaŋ, Cɛnjɛ tu go atɛ yalajɛ te tu duleji tu, tɛ zhɛmɛ tebiye.

⁸Yaa shɛ amɛ AGWANGWAMA lemi no tu, bi zhɛ mo tu sugo maa ma tu pana cɛnjɛ ta ata ti 'yajɛ ugwungwu, tu na kaa tuwebiye ta fwunga tebiye.

⁹Ta tana ma AGWANGWAMA tigezhe kwo cwɛŋ o, ta nda ma kaa du inyɛsɛ ya atwa cɛnjɛ ta ata o. Aba zhɛ a sha iyimɛyɛ tu. AGWANGWAMA kaa namɛ no tu. Ijilani ya aba kaa nduwa ufwu. Ta nda ma ya inyɛsɛ ya aba o.

¹⁰Ama atwa tu'ulwa ta ata hwɛɛ, hiɛŋ ge tegeni aŋ atayɛ maa a kwụnɛ aŋ. Eshigiri ụjɛrụma wa AGWANGWAMA bananɛ atwa ata Isrɛl hwɛɛ no odubo Udulo ata ụ Tụ'ụlwatagwụ.

¹¹AGWANGWAMA hiɛŋ Moses, Uuwa i ci aka naa atwa ga zhɛ ma n ganga tungbaraka cwɛɛŋ? Uuwa i ci aka naa nazhɛ ɛɛ zhɛ a tɛtana iwe mi rishe okwo tu Ngaa njɛ arụhwajɛ na gembi ufwugwo na ashashɛ abaa?

¹²N zhɛ ma kwụna aŋ nụ ụngwụ uko ụwɛ, maa ma bụ nda udenji na gembi na kaa du 'yajɛ ikɛnyi uhwuri aŋ.

¹³Ama go Moses hiɛŋ AGWANGWAMA, Atwa Ijipti zhɛ a hwuga iŋ! Gabụ kaa bi bɛcinjɛ atwa ga na ashashɛ aba tedure nu ukpahiŋ bụ ụ'wụtụ.

¹⁴Ɛ zhɛ kaa o mbiso atwa na jɛjɛ na cɛnjɛ tu ga. Oo AGWANGWAMA, atwa ata kaa hwugwa maa gabụ bu namɛ na atwa ga. Atwa ga kaa a bụ kwụbwa du na tumama ngbarakanụ, maa udomu bu wo urugono aŋ, obo hwulono aŋ kaa umbe nu udomu ata u tuwam na aka bu uwaŋna keeni ulwa ata u tuwam na aka na ụjita shi.

¹⁵Yaa shɛ abụ kwụnɛ atwa ga bụ hwɛɛ hwuwayɛ go, asha anya edenji a na ga hwugwa la urishi bu zhɛ hiɛŋ,

¹⁶Iwɛnɛ ta AGWANGWAMA eri shi bo sugo atwa ata na cɛnjɛ ta ata bee shileni aŋ la unu maa bi zhɛ ba pana aŋ, ibɛ po baa kwụnɛ aŋ nụ ụshɛka ata.

¹⁷AGWANGWAMA, ma bụ tabwa hwuwayɛ go, maa ga ukpahiŋ bụ njɛ ugondu maa njɛ iyi nɛ ebi shiri la unu ibɛ, ɛbi hiɛŋ,

¹⁸AGWANGWAMA njɛ shɛ izɛlɛgwu ni isɛbwɛ tɛnda o, inyɛmɛnyɛmɛ ibwɛ kaa hwuleji, ibɛ po baa gangana atwa na njɛ iwɛwɛ keeni atwa tigezhe iyi nɛ aa nda. Okwo ti yaa shɛ bwonu, bi zha shɛ ba ganga bụtụ na n-ndumwa-wụmɛ ulwapɛ tụpana o. Bi zhɛ kaa ba pana miaụŋ ulwapɛ iwɛwɛ nɛ eshi aba njɛ tutu uwaŋnɛ wa aba ụtatụ keeni una uneshi.

¹⁹Ma bụ tabwa hwuwayɛ go, iwɛ tulubo ta ata tụ bụ tụ 'wụtụ maa gengeni atwa ga iwɛwɛ nɛ aa njɛ, gana na aba shana aba gangana aŋ te kwune taa na aka na aa banɛ ni Ijipti tutu taa hwayɛ.

²⁰Nazhɛ AGWANGWAMA jishijɛ Moses, bɛɛ hiɛŋ, N gengeni aŋ, iwɛnɛ abụ n lụpɛ.

²¹Ama kaa okwo ti yaa shɛ gana ata, gana na tu Ngaa shɛ buumwa gom, keeni gana na tụ ụjɛrụma mu wo shino cɛnjɛ tu unyizo hwɛɛ,

²²i zasa bụtụ okwo bu ko na ashashɛ atwa ga zhɛ ba ya uraiŋ maa tono cɛnjɛ ta ata o. A kwụbwa ụjɛrụma mu keeni arụhwajɛ na Ngaa njɛ ni Ijipti keeni ụshɛka ga, ama a ta ma manga waa kpalụ umpwa, aa lacɛ kaa maa a hwụjɛ-unu mu.

²³A zha shɛ a kwụba kwukwuŋ cɛnjɛ ta ata Ngee shileni la ogwunukwoshi aba unu o. I zasa bụtụ okwo bu ko na ashashɛ atwa na n ngbaracɛ cwɛŋ zhɛ ba kwụba tụ kwukwuŋ.

²⁴Ama N zhɛ mo tocingo yɛu mi ugondu ga Kalɛb na cɛnjɛ ta ata baa yalajɛ la, iwɛnɛ tu baa 'yajɛ mpiala mi nya, baa n 'wa kaa du na amɛ oko kpaaŋ. Ajalalo ubwa aba zhɛ a lashɛga cɛnjɛ ta ata.

²⁵Ama gana na ta Amalɛk ne Ekenan jɛjɛ no olomu tuba hwuwayɛ. Beyi ga jishirijɛ ma maa hi teni ụshɛka ata namɛ geri bu uhwaŋna Itekwu Ishenje.

²⁶Nazhɛ AGWANGWAMA hiɛŋ Moses keeni Aron,

²⁷Aka naa tu'ulwatagwụ tu ga to tugworozwo ti zhɛ tu ma ganga tungwulongongonoo? Tungwulongongo tu ga ta atwa Isrɛl Ama hwuga ti n gembi ya!

²⁸Mbiso aŋ, maa AGWANGWAMA hiɛŋ, Gana na tu Ngaa shɛ buumwa gom, N zhɛ ma hi nda ga ijɛ ɛtɛ ahiɛ jɛmɛ Ngaa hwụjɛ gom.

²⁹Hi zhɛ hio 'wo, n'wo mi hiŋ mi zhɛ ma bala nụ ụshɛka ga. Bụtụ be elele na shiywa shɛ bwa shi tuwo woshi uhwuri ya na ashashɛ atwa na aa rɛcɛ, iwɛnɛ te ehi n ngwulengengeni.

³⁰I zasa bụtụ hiŋ okwo bu ko na zhɛ bo tono cɛnjɛ ta ata Ngee shiri la unu maa N zhɛ ma hi pana maa hi gɛga o, semi ga Kalɛb yɛu Jifune keeni Joshua yɛu Nụn kiri.

³¹Ama miaụŋ ma ata mi hiŋ ɛhi hiɛŋ maa aba zhɛ a sha ufwa ujasa, aba tuba Ngɛɛ zhɛ mo tocingo maa o mo nhwaŋ ma aba na cɛnjɛ ta ata ahiɛ lacɛ.

³²Ama inee hiŋ shɛ hi zhɛ hio ilono nụ ụshɛka ga.

³³Miaụŋ mi hiŋ mi zhɛ ma sha erinji nụ ụshɛka ga shiywa buhanda. Ɛ zhɛ a nda ụbaụta uuwa i ci aka na ehi hwuwowu tu'wo hwɛɛ, iwɛnɛ ahi zasa rishe-tɛtɛtana.

³⁴Gana na ahiɛ yalajɛ la cɛnjɛ ta ata ijitɛ buhanda, gobwonu du ɛhi zhɛ hia nda ụbaụta shiywa buhanda iwɛ iwɛwɛ hiŋ. Ụjita uko we elele ụ shɛ uywa uko, iwɛ maa hi mepi uzasaba mu na ashashɛ hiŋ!

³⁵Gamba AGWANGWAMA, N dumwa, N zhɛ kaa ma hi nda gana ata gom, ahiɛba atwa ga tugworozwo kpaaŋ, anaa na ma ndana tu'ulwa maa a n sukakanɛ. Nụ ụshɛka ga kaa ɛhi zhɛ hio 'wo hwɛɛ hiŋ.

³⁶Tu'ulwa ta ata kpaaŋ tu ngwulengengeni AGWANGWAMA, iwɛnɛ ta atwa na go Moses tumwanɛ la maa a yalajɛ cɛnjɛ ta ata gwure na ajɛshɛgwa awɛ.

³⁷Iwɛbɛ po AGWANGWAMA tumwananɛ atwa ata gwure la na ajɛshɛgwa awɛ tishikpe taa kwụnɛ aŋ ne eshe AGWANGWAMA.

³⁸Go Joshua yɛu Nụn keeni Kalɛb yɛu Jifune aba kiri 'wi shi na ashashɛ atwa ata zhe la cɛnjɛ ta ata tiyalajɛ.

³⁹Aka na tu go Moses mbishi atwa Isrɛl kpaaŋ n-ndumwa mu na AGWANGWAMA jɛmɛ hwɛɛ, oo to-ụkwụla tebiye.

⁴⁰Ti iyi heri, aa gbatụ ti'ishijɛ nu uvwungwa dididi, ee munji ee zhe na cɛnjɛ ti ishɛmɛ, ɛɛ hiɛŋ, Ti leni maa tɛ njɛ iwɛwɛ. Tu namɛ kaa epe, ti zhɛ to mungo maa ta zha no ofwo ata AGWANGWAMA iti shileni-unu.

⁴¹Ama go Moses hiɛŋ aŋ, Imbe po ahiɛ hwụjɛ shɛ unu wa AGWANGWAMAA? I zha shɛ ma hi 'yagana eshe o!

⁴²Ta zhaga ma o, iwɛ maa atwa i'ime hiŋ ma hiɛ kabɛ hwayɛ. AGWANGWAMA zasaba na ashashɛ hiŋ o.

⁴³Amalɛk keeni Ekenan namba apata, ɛ zhɛ kaa ma hiɛ kwụna no otokwobi, iwɛnɛ ta ahiɛ 'wa sụ ya AGWANGWAMA, AGWANGWAMA kaa du zha shɛ ba nama ne hiŋ o.

⁴⁴Ama okwo ti Ikpɛtɛ Unu-tutwa ya AGWANGWAMA keeni Moses beni shi nu ugba ata, ee zhe waa na cɛnjɛ ta ata ti ishɛmɛ ne tukwurimi.

⁴⁵Ibɛ po Amalɛk keeni Ekenan a na jɛjɛ na cɛnjɛ ta ata ti ishɛmɛ zwe, aa twa na aba, ee kebi aŋ, ee urigeni aŋ tutu Homa.