Read bassa TƐRƐCƐ 15 Bible Online

TƐRƐCƐ 15 - bassa bible

TƐRƐCƐ 15

¹Nazhɛ AGWANGWAMA hiɛŋ Moses,

²Mbiso atwa Isrɛl maa, Aka na ehi teni hwuŋ cɛnjɛ ta ata Ngɛɛ zhɛ ma hi pana maa hi nama.

³Ga shɛ usemberi buna, nu udagba, nụ ụgwụdụ, kwo kaa biywoywo ɛhi zhɛ hia pana AGWANGWAMA nụ ụrụpɛ tuhwoŋzhingo kwo kaa nụ ụrụpɛ ụ tụ'ụrɛcɛnga tu unu na bụtụ ge shiri, kwo kaa upwaŋ u tukwulangana, kwo kaa nu upwaŋ nsono mi hiŋ mu na ehi shiri aka muba. Iyimɛyɛ ụrụpɛ ata shanɛ AGWANGWAMA ụhiụŋ ụlatụ.

⁴Bụtụ be elele na kaa zhɛ ba pana AGWANGWAMA ụrụpɛ tuhwoŋzhingo nụ ụgwụdụ kwo kaa no biywoywo, ga 'waŋnɛ mihiuŋ mi tilee lee mi ikwureni bugondo bu uko mu na ee hiŋtetenji na manɛbɛ ma buta me bimenji bu ubene uko nu ukangasu,

⁵ne bimenji be meni mu tụ'walụ ta afwafwa mu ubene uko nu ukangasu, iwɛ yɛu-ụgwụdụ inɛ inɛ, iwɛ ụrụpɛ tuswa.

⁶Yaa shɛ kaa udagba aa 'waŋnɛ, asha mihiuŋ mi tilee lee mɛ shɛ ma sha nkwuronu mo tugongo ti yebi mu na ee hiŋtetenji na manɛbɛ ma buta me ebene eyebi na ashashɛ, pana iŋ ma AGWANGWAMA iwɛ maa i shɛ ụrụpɛ tiya,

⁷medenji bimenji be meni mu tụ'walụ ta afwafwa me ebene eyebi. Ụrụpɛ gana ga shanɛ AGWANGWAMA ụhiụŋ ụlatụ.

⁸Yaa shɛ kaa usemberi buna ee peni AGWANGWAMA nụ ụrụpɛ tuhwoŋzhingo, kwo kaa nụ ụrụpɛ na oo to iwɛ tụ'urɛcɛnga tu unu-tishilo, iwɛ ụrụpɛ wa amɛ-olom,

⁹asha ga 'waŋnɛ mihiuŋ mi tilee lee mu nkwuronu mo tugongo tu tatụ mu na mi hiŋtetenji na manɛbɛ ma buta me ebene eyebi na ashashɛ, maa i shɛ ụrụpɛ tiya,

¹⁰medenji bimenji be meni ma tụ'walụ ta afwafwa me ebene eyebi na ashashɛ. Ụrụpɛ gana ga shanɛ AGWANGWAMA ụhiụŋ ụlatụ.

¹¹Iyi nɛ bụtụ shɛ ba 'waŋnɛ maa mɛdɛnjɛ usemberi buna, nu udagba, nụ ụgwụdụ keeni biywoywo ta.

¹²Yaa shɛ iyimabiga nɛ aa 'waŋnɛ uhwuri ike, asha upwaŋ na ɛɛ zhɛ ɛ mɛdɛnjɛ ni ibɛ zhɛ du ya kaana ugombo iwɛ inɛ ye elele.

¹³Bụtụ be elele na shɛ umamata Isrɛl, bɛ shɛ ba nda gana ga tu baa 'waŋnɛ iyi ụrụpɛ nɛ zhɛ wa shana AGWANGWAMA ụhiụŋ ụlatụ.

¹⁴Yaa shɛ bugaiŋ zhajɛ maa nda ụlashɛ no ofwo hiŋ, kwo kaa bụtụ be elele na namɛ na ashashɛ hiŋ tutu ofwo na awaŋnɛ hiŋ teje, na yaa kwụlanɛ maa pana AGWANGWAMA ụrụpɛ ụhiụŋ ụlatụ, na dure nu ulwa, asha ga nda gana na ta ahia nda.

¹⁵Undwa hiŋ ụ shɛ wa sha uko uko na tu'ulwa tu ga keeni iwɛ bugaiŋ na ba nda ụlashɛ no ofwo hiŋ. Ụ shɛ okpogo iwɛ ofwo elele na awaŋnɛ hiŋ teje; gana na ahiɛ namɛ, gabata du bugaiŋ shɛ ba nama ne eshe AGWANGWAMA.

¹⁶Ta andwa ata keeni shikpogo sha ata a shɛ a sha oko ti iwɛ hiŋ, ti iwɛ bugaiŋ na ba nda ụlashɛ na ashashɛ hiŋ.

¹⁷Nazhɛ AGWANGWAMA hiɛŋ Moses,

¹⁸Mbiso atwa Isrɛl maa, Aka na ehi ci hwuŋ cɛnjɛ ta ata Ngɛɛ zhɛ ma hi pana.

¹⁹Aka na ahiɛ yɛ iyimɛyɛ nɛ cɛnjɛ ta ata ti meci, hiɛ shɛ hia shɛkana AGWANGWAMA orobwo ubwa.

²⁰'Waŋnɛ ma akara ehiiŋ a na ahiɛ njɛ no mihiuŋ mi izɛgwu iyimɛyɛ ifwo maa hi peni ụrụpɛ, gana ụrụpɛ iyi nɛ ee jibi na akpakpata, gabata du ɛhi zhɛ hia pana uŋ.

²¹Hiɛ shɛ hi na pana AGWANGWAMA upwaŋ iyimɛyɛ gɛ ihiiŋ ehi jwe na cɛnjɛ ti hiŋ geri-be-eshe tutu awaŋnɛ hiŋ na te e ci kpaaŋ.

²²Yaa shɛ bụtụ bu ko pindeni shikpogo shɛ ga shi ko AGWANGWAMA peni Moses nu umepiteshi,

²³na amɛ unu-tupana we elele na AGWANGWAMA ihi peni tedure no Moses, te kwuni nụ ụjita na AGWANGWAMA ihi peni aŋ tutu geri-be-eshe ba awaŋnɛ hiŋ kpaaŋ.

²⁴Yaa shɛ kaa ehi teni utegidi iwɛnɛ ta atwa tu'ulwa kpaŋ kpaaŋ a shɛ ogbodu ni ibɛ, asha ga tu'ulwa kpaŋ kpaaŋ tɛ shapɛ yɛu buna be eyi maa e peni AGWANGWAMA ụrụpɛ tuhwoŋzhingo na shɛ ụhiụŋ ụlatụ na ya kwulana bụ, keeni ụrụpɛ tiya u tugom keeni ụrụpɛ tuswa, gana na to okpogo ibɛ shɛ. Iyi nɛ aa shɛ a madanga iŋ, i shɛ usemberi upi maa o to ụrụpɛ iwɛwɛ.

²⁵Bunongbo shɛ ba ndana atwa tu'ulwa ta ata hwɛɛ iyi nɛ maa u urugono iwɛwɛ ya aba, nazhɛ ɛɛ zhɛ a gangana aŋ, iwɛnɛ tu utegidi na aa njɛ ụ shɛ nu umepiteshi; aa 'waŋnɛ kaa iyimɛyɛ nɛ maa e peni AGWANGWAMA ụrụpɛ na dure nu ulwa iwɛ iwɛwɛ keeni iwɛ ti'ina ta aba.

²⁶Ɛ zhɛ kaa a gangana tu'ulwatagwụ ta atwa Isrɛl kpaaŋ keeni agaiŋ na namɛ na ashashɛ aba iwɛwɛ ya aba hwɛɛ, iwɛnɛ ti i'ɛlɛ bụtụ bụtụ namɛ nu utegidi ata aa njɛ.

²⁷Yaa shɛ kaa bụtụ bu ko gba njɛ iwɛwɛ nu umepiteshi, ga shapɛ unasa biywoywo na ta namɛ uywa uko te e meci bu iwɛ ụrụpɛ iwɛwɛ ibwɛ.

²⁸Bunongbo kaa shɛ ba ndana bụtụ ata iyi nɛ maa e urigeni iwɛwɛ ibwɛ nu umbe AGWANGWAMA, ɛ zhɛ kaa a gangana bụ iwɛwɛ ibwɛ.

²⁹Undwa hiŋ shɛ wa sha uko pa bụtụ be elele na njɛ iwɛwɛ nu umepiteshi, okwo baa shɛ yɛu-cɛnjɛ kwo kaa baa shɛ bugaiŋ na ba nda ụlashɛ na ashashɛ hiŋ.

³⁰Ama bụtụ be elele na meme heŋseji baa njɛ iwɛwɛ ne tukwurimi, okwo baa shɛ yɛu-cɛnjɛ kwo kaa baa shɛ bụlashɛ, bụtụ ata twajɛ AGWANGWAMA, bụtụ ata shɛ aa bacɛnga na ashashɛ atwa ubwa,

³¹iwɛnɛ tu baa ngbaracɛ n-ndumwa ma AGWANGWAMA cwɛŋ, bee bweji kaa onu-tupana ubwa oko. Tijama tu bwa tu patanɛ nu uhiuhiu ubwa.

³²Aka na ta atwa Isrɛl ta namɛ nụ ụshɛka, oo to butubwenyi bu ko ugbe tu baa dwaga i'wɛ'wɛ nụ Ụjita-ụhinjanụ.

³³Ibɛ po atwa na to bu ugbe shepi bu no ofwo Moses keeni Aron keeni no ofwo tu'ulwa ta ata hwɛɛ.

³⁴Ee kepi bu tugwo no ofwo oko iwɛnɛ te e mepi shi ijiji iyi nɛ shɛ maa a njɛ bụ.

³⁵Nazhɛ AGWANGWAMA hiɛŋ Moses, Ga a kwụnɛ bụtụ ata, ga tu'ulwatagwụ ti tegeni bu atayɛ hwɛɛ aba no tupohondo tu ugba wa aba.

³⁶Ibɛ po tu'ulwatagwụ ta ata hwɛɛ ti becinji bu no tupohondo tu ugba ata, ee tegeni bu atayɛ, aa kwụnɛ bụ gana na ta AGWANGWAMA peni Moses unu.

³⁷Nazhɛ AGWANGWAMA hiɛŋ Moses,

³⁸Mbiso atwa Isrɛl maa, ga a njɛ ezeje ni izhɛmi yo otogwo aba tutu ofwo na awaŋnɛ aba teje, go o to ihwehwe uduhwa wa ababa ni izhɛmi ye ezeje ata elele.

³⁹Ezeje ata aba ɛhi zhɛ hi na ngbaraka maa hi ne teyinje onu elele na AGWANGWAMA ihi peni maa kaa hi na hwuga-unu wa aba, maa kede hi na 'watatagwụ iyi nɛ eshe hiŋ a kwụba maa hi na nda ukwedeyi iyi nɛ shihaŋsa shi hiŋ sha jala o.

⁴⁰Ezeje ata aba zhɛ ne hi teyingeni maa hi na untangana onu-tupana mi hwɛɛ, maa hi shilono Agwatana hiŋ swooŋ hwɛ hwɛɛ.

⁴¹Gamba n shɛ AGWANGWAMA na shɛ Agwatana hiŋ na ihi bɛcinjɛ ni Ijipti maa ma sha Agwatana hiŋ. Gamba n shɛ AGWANGWAMA na shɛ Agwatana hiŋ.