Read bassa TƐRƐCƐ 16 Bible Online

TƐRƐCƐ 16 - bassa bible

TƐRƐCƐ 16

¹Na aka ata go Kora yɛu Izha, na shɛ bụjalụ Kohat, na shɛ bujalalo Livai, keeni Datan, na Abiram miaụŋ mu Ɛliab a na shɛ miaụŋ mu Rubɛn keeni On yɛu Pɛlɛt,

²medenji ufwugwo we etwenyi Isrɛl anya kpakwụ-nu-dupu (250), a na shɛ atwa na 'yajɛ ụjɛrụma na ashashɛ tu'ulwatagwụ ta ata hwɛɛ, anaa na kaa du tu'ulwa ta ata ti mepi tebiye, anaa na ee ge teri maa a shɛ ehwurembe.

³Aa ụlwatagwụ no ofwo Moses keeni Aron, ɛɛ hiɛŋ aŋ, Inee hiŋ hwuleji ya! Iwɛnɛ po atwa tu'ulwa tu ga kpaaŋ a shɛ atwa tijilo, AGWANGWAMA kaa du namɛ na aba hwɛɛ. Iwembe po tuba ohi momo mungicingo na tu'ulwa tu ga ta AGWANGWAMAA?

⁴Aka na go Moses hwụjɛ iwɛ ɛtɛ, bee leyi bee ubi eshe ubwa na cɛnjɛ.

⁵Nazhɛ bɛɛ hiɛŋ Kora keeni atwa na 'wa bụ, Beyi ga AGWANGWAMA zhɛ mo ti mbisono atwa na shɛ a na ubwa, bi zhɛ ba nda kaa maa ga bụtụ ata na shɛ bu na bwa na bee teri dongonu bu.

⁶Gabụ go Kora keeni atwa na ubu 'wa, iyi nɛ ahiɛ shɛ hia nda na; beyi ga sugo ma ejejebi[14] maa hiɛ tarɛ ulwa na aba,

⁷maa hi zweni iturɛre na aba, maa hi zhe nu umbe AGWANGWAMA. Bụtụ na AGWANGWAMA teri, asha ubwa zhɛ ba sha bụtụ bi tijilo. Ahiɛba atwa Livai, ahiɛba kaa inee hiŋ hwulejii!

⁸Go Moses hiɛŋ Kora sasana, Shɛlaga ma ahiɛba miaụŋ ma Alivai!

⁹Iyi ticwɛŋ ree yaa hiɛ shanɛ ta Agwatana Isrɛl ihi tileni swooŋ na tu'ulwatagwụ tu ga, maa hi dongonu bu maa hi na ndana bụ ugondu na amɛ udulo ubwa, maa hi na ndana tu'ulwatagwụ tu ga hwɛɛ ugondu?

¹⁰Bi hi suje medenji atwa elele na shɛ atwa bụ Livai, maa hi dongonu bu, ama hi ta dwalakaka waa maa hi shaananɛ onongbo.

¹¹AGWANGWAMA ahiɛ sukakanɛ, tụ gabụ ta atwa na ubu 'wa hwɛɛ. Imbe shɛ inɛ Aron ohio ngulongongono buu?

¹²Go Moses tumwanɛ butumwa maa a suyanɛ Datan keeni Abiram miaụŋ mu Ɛliab, ama ɛ hiɛŋ, Ti zha shɛ ta zhajɛ o!

¹³Iyi ticwɛŋ ree yaa bụ shanɛ tɛ ɛbi ti bɛcinjɛ na cɛnjɛ ti Ijipti tu na ti 'yajɛ ugwungwu, tu na tuwebiye kaa ta fwunga maa ụtụ kwụnɛ nụ ụshɛka ga, maa mama njɛ sasana uhiu tu ni iji?

¹⁴Bu tu suji shi kaa maa ta zha na cɛnjɛ ta ata ti 'yajɛ ugwungwu, tu na kaa tuwebiye ta fwunga na tuba o, bi ti peni shi kaa shihilo shɛ na maa ta ya ogwu shɛ ba keeni cɛnjɛ tu ntuma ma shifwafwa o. Bi zhɛ suu bu ma tu nda sholubo? Ti ci shi ba o.

¹⁵Ibɛ po go Moses njɛ isɛbwɛ tebiye, bɛɛ hiɛŋ AGWANGWAMA. Ta lashɛga apwaŋ aba o. N leshiji shi izhinyɛci okwo ike ni i'ɛlɛ ya aba o. N njɛ shɛ kaa bụtụ be elele iyi iwɛ na amɛ aba o.

¹⁶Go Moses hiɛŋ Kora, Beyi ga zhajɛ ma nu udulo tu'ulwatagwụ wa AGWANGWAMA, tụ gabụ ta atwa elele na ubu 'wa, keeni Aron.

¹⁷Bụtụ bụtụ hiŋ ga shapɛ ujejebi ubwa ulwa tutala, bụtụ bụtụ ga patana iturɛre nu una ubwa maa hi shɛkanɛ aŋ nu umbe AGWANGWAMA. Ejebi ata hwɛɛ namɛ kpakwụ-nu-dupu (250). Tụ gabụ tu ga Aron, bụtụ bụtụ ga 'waŋnɛ du ujejebi ubwa.

¹⁸Bụtụ bụtụ shepi ga ujejebi ubwa bee teri ulwa nu bwa, bee peteni iturɛre nu bwa, ee shikekeni ya no odubo udulo tu'ulwatagwụ, hwɛɛ tu go Moses keeni Aron.

¹⁹Go Kora sotulonu tu'ulwatagwụ ta ata hwɛɛ urubwo uko no odubo udulo ata ụ tu'ulwatagwụ. Nazhɛ ụjɛrụma wa AGWANGWAMA bananɛ tu'ulwatagwụ ta ata hwɛɛ.

²⁰Nazhɛ AGWANGWAMA hiɛŋ Moses, keeni Aron,

²¹Momo bogwu ma na atwa tu'ulwatagwụ tu ga hwɛɛ, iwɛ maa mo iricingo aŋ hwuwayɛ hwuwayɛ go.

²²Ama go Moses na Aron ubi eshe aba na cɛnjɛ, ɛɛ hiɛŋ, Oo Agwatana, na shɛ Agwatana na peni atwa kpaaŋ ihwungwɛ, iwɛnɛ ta bụtụ bu ko gba njɛ iwɛwɛ, ibɛ hŋ ɛbi zhɛ ba nda ya isɛbwɛ na atwa tu'ulwatagwụ tu ga hwɛɛ?

²³Nazhɛ AGWANGWAMA hiɛŋ Moses,

²⁴Mbiso tu'ulwatagwụ tu ga hwɛɛ maa ga a ishɛjɛ e genji udulo Kora, nu una Datan keeni una Abiram.

²⁵Go Moses ishijɛ bee zhe no ofwo Datan keeni Abiram; ibɛ n-nyarɛ mi Isrɛl mu 'wa bụ.

²⁶Bɛɛ hiɛŋ atwa tu'ulwatagwụ ta ata hwɛɛ, Ishɛga ma hi genji odulo ogworozwo ga! To tumongono ma kaa du iyi ya aba ye elele o, shibwonu ɛ zhɛ mo hi sugo hwɛɛ ta aba iwɛ iwɛwɛ ya aba.

²⁷Aa ishɛjɛ ga ee genji udulo Kora, nu una Datan keeni una Abiram. Nazhɛ ga Datan keeni Abiram banɛ ee shikekeni no odulo aba hwɛɛ, te eyikwo aba keeni miaụŋ ma aba.

²⁸Go Moses mbishi atwa ata, bɛɛ hiɛŋ, Epe ɛhi zhɛ hia mapa hwayɛ ga maa AGWANGWAMA n tumwanɛ maa ma ndangana ijɛ hwɛɛ, maa shɛ na tuhaŋsa ti ikɛnyi mi Ama nda iŋ o.

²⁹Yaa shɛ atwa ga 'wi hwayɛ tu'wo tu na ta kwụna atwa elele, kwo kaa yaa shɛ iyi nɛ yo vwutongono atwa elele kiri vwuteni aŋ hwayɛ, asha shɛ AGWANGWAMA ga n tumwanɛ o.

³⁰Ama yaa shɛ AGWANGWAMA njɛ hwayɛ iyi nɛ ta njɛ shɛ la kwukwuŋ maa cɛnjɛ tu kapɛshɛngwa hwayɛ, maa tu tweri aŋ ti iyi elele nɛ aa 'yajɛ hwɛɛ, maa e zwi ne e'uye buumwa buumwa, nazhɛ ɛhi zhɛ hia mapa maa AGWANGWAMA ubwa atwa ga ngbaracɛ fufurɛnjɛ.

³¹Gunu na ti bee hwuwi n-ndumwa ma ata tụdụma hwɛɛ, nazhɛ cɛnjɛ tu bagwụ hwaa ne eririri na ee shikekeni,

³²ibɛ cɛnjɛ tu kapɛshɛngwa tee tweri aŋ, ta atwa nhwaŋ ma aba, ta atwa elele na ga 'wa Kora medenji iyi elele nɛ aa ga 'yajɛ.

³³Gabata ee zwi ne e'uye buumwa buumwa hwɛɛ, ti iyi elele nɛ aa ga 'yajɛ, nazhɛ cɛnjɛ tu twaananụ tee urigeni aŋ. Gana ee beni na ashashɛ tu'ulwatagwụ ta ata aa njɛ ufwu ta.

³⁴Ibɛ po atwa Isrɛl elele na ga namɛ no ofwo aba gezhiji taa hwụjɛ n'ungwa ma aba. Ɛɛ hiɛŋ, Iwɛ maa cɛnjɛ tu ma tu twala du hwayɛ!

³⁵Ama AGWANGWAMA tumwanɛ ulwa woo hwoŋzhinji atwa ata kpakwụ-nu-dupu (250) a na ga 'waŋnɛ iturɛre ɛtɛ.

³⁶Nazhɛ AGWANGWAMA hiɛŋ Moses,

³⁷Mbiso Ɛleaza yɛu Aron bunongbo maa go sugo ejejebi ata maa bacɛnga aŋ nu ulwa ata. Nazhɛ ga garataga ulwa ata taa dụlụ geri bu ko, iwɛnɛ ta a shɛ ejejebi tijilo.

³⁸A shɛ iyi tijilo iwɛnɛ ta a ga shɛkwanua aŋ nu umbe AGWANGWAMA. Iwɛ inɛ ɛtɛ, sugo ejejebi atwa ata 'wi iwɛ iwɛwɛ ya aba maa jibi aŋ maa a shɛ apalụ tụpatakwụ patakwụ maa a shɛ iyi tu'urugono tu utukwu-ụrụpɛ. Ɛ zhɛ a sha iyi nɛ zhɛ na tɛtagana atwa Isrɛl unu.

³⁹Gɛ Ɛleaza bunongbo ata suji ga ejejebi ata ɛtumburɛ atwa ata ge hwoŋni, bee jibi aŋ patakwụ patakwụ gana apalụ maa o no urugono utukwu-ụrụpɛ na aba.

⁴⁰Ijɛ ya tɛtagana atwa Isrɛl unu maa bụtụ be elele na shɛ shɛ ụlamụ Aron kede gwumwongonu maa hwoŋzhingono AGWANGWAMA iturɛre nu utukwu-ụrụpɛ ubwa o, iwɛ aka na bɛɛ zhɛ ba sha gana Kora keeni atwa ubwa. Ijɛ njɛ hwɛɛ nu gana na ta AGWANGWAMA peni Ɛleaza unu tedure no Moses.

⁴¹Ti iyi heri, ibɛ tu'ụlwatagwụ ta atwa Isrɛl hwɛɛ tu ngwulengengeni Moses na Aron, ɛɛ hiɛŋ, Ahiɛba hiɛ kwụnɛ atwa AGWANGWAMA.

⁴²Aka na ta tu'ulwatagwụ ta ata kpaaŋ tu ụlwataganụ Moses na Aron, aa dumangana aŋ n-ndumwa mụ wɛ. Aa mbiyanɛ geri bu udulo ata ụ tu'ulwatagwụ, aa kwụbɛ tu udomu urigeni uŋ, ibɛ ụjɛrụma wa AGWANGWAMA bananɛ aŋ caakwụ.

⁴³Go Moses na Aron zhe nu umbe udulo ata ụ tu'ulwatagwụ.

⁴⁴Nazhɛ AGWANGWAMA hiɛŋ Moses,

⁴⁵Ishɛga maa genji tu'ulwatagwụ tu ga hwɛɛ, iwɛ maa mo hwoŋzhingo aŋ hwuwayɛ hwuwayɛ go. Ibɛ po ee ubi eshe aba na cɛnjɛ.

⁴⁶Go Moses hiɛŋ Aron, Shapɛ ujejebi kakayɛ maa tarɛ ulwa utukwu-ụrụpɛ, maa peteni iturɛre nu bwa, maa shepi uŋ no ofwo atwa tu'ulwatagwụ tu ga hwɛɛ maa urigeni iwɛwɛ ya aba. Iwɛnɛ po AGWANGWAMA na nda isɛbwɛ cebe, tishikpe kaa du tu kwunuo tɛnda.

⁴⁷Ga Aron shepi ga ujejebi ata gana na tu go Moses hiɛŋ bụ, bee gezhiji bee zhe no ofwo na atwa ata sotulonu, tobwolo tishikpe tu kwunuo tɛnda na ashashɛ aba cebe. Bee peteni iturɛre ɛtɛ na akanga ata maa ndana aŋ iyi iwɛwɛ ya aba tu'urugono.

⁴⁸Ibɛ po inɛ ɛtɛ ngwuricinji tishikpe ta ata. Baa banɛ apata bee zhe bee shikeni na ashashɛ n'wo ma ata na atwa na te 'wi shi.

⁴⁹Ufwugwo wa atwa na tishikpe ta ata tụ kwụnɛ namɛ igbɛɛ-icenje-na-akpakwụ-atatụ-ni-dipi-yebi (14,700). Atwa ata kaa namɛ swooŋ na atwa na 'wi ne tigezhe tu Kora.

⁵⁰Aka na te tishikpe ta ata tu hwuwowu, nazhɛ ga Aron gwure pu Moses no ofwo odubo udulo ata ụ tu'ulwatagwụ.