Read bassa TƐRƐCƐ 17 Bible Online

TƐRƐCƐ 17 - bassa bible

TƐRƐCƐ 17

¹Nazhɛ AGWANGWAMA hiɛŋ Moses,

²Mbiso atwa Isrɛl maa ga a bụ panɛ shokwuto umpwa-na-shɛba-shi-yebi. Lashɛga bu ko ne buhwuri-bu-umbe bụ ụlamụ we elele. 'Nyata izeci bụtụ bụtụ no bukwuto bu bwa.

³'Nyata izeci Aron no bukwuto ata shɛ bu na bụ ụlamụ Livai. Bukwuto bu ko ubwa zhɛ ba sha bu na be buhwuri-bu-umbe nụ ụlamụ we elele.

⁴Sugo shu maa tileni shu nu udulo tu'ulwatagwụ nu umbe Ikpɛtɛ ɛtɛ Tiseyida no ofwo ata Ama twa na bụ.

⁵Ama bukwuto ba bụtụ na Ngee teri, ubwa zhɛ ba saba. Inɛ gɛ i shɛ iwɛ maa Mo ngwuricingo tungwulongongo tu na atwa Isrɛl mo bu ngwulongongono.

⁶Go Moses mbishi atwa Isrɛl iwɛ ɛtɛ, ibɛ buhwuri-bu-umbe bu na bu na peni bu bukwuto bu bwa, bu ko banɛ nụ ụlamụ we elele, shaa namɛ umpwa-na-shɛba-shi-yebi. Ee shiyeni du bukwuto Aron na ashashɛ aba.

⁷Go Moses tileni shokwuto sha ata nu umbe AGWANGWAMA na amɛ Udulo ata Tiseyida.

⁸Aka na ti iyi heri, go Moses teni nu Udulo ata Tiseyida, baa kwụbɛ to bukwuto Aron na shɛ bu na bụ ụlamụ Livai hwɛɛ ba saba, bee sumbi, bee 'weri almond na nɛ!

⁹Nazhɛ go Moses bɛcinjɛ shokwuto sha ata hwɛɛ na agba AGWANGWAMA, bee suji shu no ofwo atwa Isrɛl hwɛɛ, aa kwụbɛ shụ. Nazhɛ buhwuri-bu-umbe be elele shepi bukwuto bu bwa.

¹⁰Nazhɛ AGWANGWAMA hiɛŋ Moses, Gwuricingo bukwuto Aron nu umbe Ikpɛtɛ ɛtɛ Tiseyida. Ga a intanɛ bụ apata maa sha iyi nɛ zhɛ na tɛtagana miaụŋ mi tigezhe ma atwa Isrɛl unu, maa yaa shɛ ee genji shi tungwulongongo ta aba, ɛ zhɛ o 'wo.

¹¹Go Moses njɛ ga gana na ta AGWANGWAMA peni bu unu hwɛɛ.

¹²Nazhɛ atwa Isrɛl hiɛŋ Moses, Ti zhɛ to 'wo! Tɛ njɛ ufwu, ti zhɛ to 'wo hwɛɛ tu!

¹³Bụtụ be elele na zhajɛ ya maa dongonu Udulo wa AGWANGWAMA okwo tudongonu, bi zhɛ bo 'wo. Asha ti zhɛ to 'wo ree hwɛɛ tu?