Read bassa TƐRƐCƐ 20 Bible Online

TƐRƐCƐ 20 - bassa bible

TƐRƐCƐ 20

¹Ibɛ tu'ulwatagwụ ta atwa Isrɛl kpaaŋ ti ci Ụshɛka Zin nu upiana uhiiŋ, ee jwe ugba wa aba nu Kadɛsh. Apata ge Miriam 'wi, apata du ee ni bu.

²Meni kaa mu zasaba maa tu'ulwatagwụ ta ata tu swe o, ibɛ po atwa ata ụlwatagwụ maa a sukakanɛ Moses na Aron.

³Aa sukakanɛ Moses keeni Aron nu uwuru, ɛɛ hiɛŋ, I gɛ zhɛ mo tu dobogono maa to 'wo la na aka na ta miaụŋ-mo-bino tu mu 'wi nu umbe AGWANGWAMA!

⁴Iwembe po ehi suje tu'ulwa tu ga ta AGWANGWAMA nụ ụshɛka ga, iwɛ maa to 'wo ti iyimabiga tuu?

⁵Iwembe po ɛhi ti bɛcinjɛ ni Ijipti ehi tu suje no ofwo ga ụwɛ a na iyi elele eri shi ya waŋnaa? To ohiu, to owowo, ta afwafwa, ta apomɛgranati zasaba o. Meni kaa mu zasaba maa ta swa o!

⁶Ibɛ po go Moses keeni Aron beni na tu'ulwatagwụ ta ata, ee zhe no odubo udulo tu'ulwatagwụ, ee ubi shishe sha aba na cɛnjɛ, nazhɛ ụjɛrụma wa AGWANGWAMA bananɛ aŋ caakwụ.

⁷Nazhɛ AGWANGWAMA hiɛŋ Moses,

⁸Zhaga shapa bukwuto ata bụ namɛ nu umbe Ikpɛtɛ ɛtɛ Unu-tutwa, iwɛ maa hi sotulonu tu'ulwatagwụ ta ata hwɛɛ, ahiɛba na Aron. Dumana iwɛ nu utayɛ ata tubala na namba apata ne eshe aba hwɛɛ, meni mu 'wụtụ mi zhɛ ma banɛ nu bwa. Ni inɛ gɛ ibɛ ɛbi zhɛ ba bacɛnganɛ atwa ga meni nu uparatayɛ ata maa e swe, hwɛɛ ti iyimabiga ya aba.

⁹Go Moses beni ga, bee zhe bee shepi bukwuto ata namɛ nu umbe AGWANGWAMA, gana na ti bee peni bu unu.

¹⁰Boo sotulonu ga tu'ulwatagwụ ta ata kpaaŋ nu umbe uparatayɛ ata abana Aron. Go Moses hiɛŋ aŋ, Shɛlaga ma, ahiɛba atwa ga tigezhe, hia jala suu maa ta hiɛ bacɛnganɛ meni nu uparatayɛ ga?

¹¹Go Moses shepi bukwuto bu bwa na azuba bee jibi uparatayɛ ata kpalụ yebi, ibɛ meni mu banɛ duwa. Nazhɛ atwa tu'ulwatagwụ ta ata swe mu, hwɛɛ ti iyimabiga ya aba.

¹²Ama AGWANGWAMA mbishi Moses na Aron, bɛɛ hiɛŋ aŋ, Shɛ ahiɛba hi zhɛ hio sugo ya atwa tu'ulwatagwụ tu ga maa e teni cɛnjɛ ta ata Ngee shileni aŋ la unu maa N zhɛ ma pana aŋ o, iwɛnɛ ta ahiɛ tɛtanɛ shɛ n-ndumwa mi mi rishe maa hiɛ mụnɛ tijilo ti mi ụjɛrụma ne eshe atwa Isrɛl.

¹³Inɛ gɛ ibɛ shɛ meni mi Mɛriba[16] iwɛnɛ po apata atwa Isrɛl ngwulengengeni AGWANGWAMA, bee mbiseni aŋ kaa tijilo tu bwa caakwụ.

¹⁴Go Moses tumwanɛ atumwa, ee beni nu Kadɛsh, ee zhe no ofwo agwuma Idụm. Ɛɛ hiɛŋ bụ, Utumwa na yɛu-bino bu ge Isrɛl utu tumwanɛ na, gabụ du kaa bi mepi ụbaụta na utu vwuteni hwɛɛ.

¹⁵Ogwunukwoshi tu zhe la aa namɛ ni Ijipti shiywa shu ufwugwo. Ibɛ po atwa Ijipti njɛ aŋ ụbaụta, hwɛɛ ta atuba.

¹⁶Aka na atu ugananɛ AGWANGWAMA, baa hwụjɛ n'ungwa mu tu, baa tu tumwananɛ butumwa bwa na banɛ na azuba, bee ti mbiyeni, bɛɛ ti bɛcinjɛ ni Ijipti. Atuba na kaa tu namɛ ya nu Kadɛsh na shɛ ụshɛpwụ na namɛ no tugwungwu ta cɛnjɛ tụ bụ.

¹⁷Ta bụ tabwa, iti leneni ka maa to dulo cɛnjɛ tụ bụ maa ta kashɛka. Ti zha shɛ to tono ehilo, kwo kaa itimɛ ya afwafwa hiŋ o, ti zha shɛ kaa ta swa meni ma a'ibwa hiŋ o. Ama ti zhɛ to dulo ukpekiti wa shɛgwuma, ti zha shɛ ta vwula geri bu u'ala ubiye kwo kaa nu u'ala ugwulwo tutu to puso ogwungwu cɛnjɛ tụ bụ o.

¹⁸Ama ge Idụm hiɛŋ bụ, to dulo epe o. Yaa shɛ ehi mekeni, N zhɛ ma bụ sukakana nu utokwobi.

¹⁹Nazhɛ atwa Isrɛl hiɛŋ bụ, Ukpekiti kiri ata jala maa to dulo. Ama yaa shɛ etu swe meni mi hiŋ ni iyimabiga tu, asha N zhɛ ma bụ tụpa iŋ. Ukpekiti kwakwa ata jala maa to dulo.

²⁰Ge Idụm jishijɛ aŋ sasana, bɛɛ hiɛŋ, Ta kashɛka o! Nazhɛ atwa Idụm banɛ ne ejeshi aba na gembi ufwugwo, a na 'yajɛ ukpahiŋ tebiye maa a sukakanɛ atwa Isrɛl.

²¹Gana na ta atwa Idụm lakanɛ atwa Isrɛl tugwungwu ta aba tudulo, ibɛ po atwa Isrɛl vwụrɛ, ee duri uhwaŋna unya.

²²Nazhɛ tu'ulwa ta atwa Isrɛl kpaaŋ ti beni nu Kadɛsh, ee zhe ni Ishɛmɛ ɛtɛ ɛɛ hiɛŋ, Ho.

²³Nazhɛ AGWANGWAMA hiɛŋ Moses keeni Aron ni Ishɛmɛ ɛtɛ Ho, no tugwungwu ta ata ta atwa Idụm,

²⁴Ga Aron zhɛ bo 'wo, bi zha shɛ bo tono cɛnjɛ ta ata Ngee shileni la atwa Isrɛl unu maa N zhɛ ma pana aŋ o, iwɛnɛ ahiɛ njɛ tigezhe ahiɛ hwụjɛ shɛ unu mu tụpana no ofwo meni maa ata mi Mɛriba.

²⁵Zarɛga Aron keeni yɛu ibwɛ gɛ Ɛleaza maa hi munji ni Ishɛmɛ ɛtɛ Ho.

²⁶Hucoko Aron i'wɛŋnɛ ɛtɛ ibwɛ i tunongbo maa hwuŋtengeni iŋ yɛu ibwɛ gɛ Ɛleaza. Ga Aron zhɛ bo 'wo apata.

²⁷Go Moses njɛ ga gana na ta AGWANGWAMA peni bu unu, ee zhe ee munji ishɛmɛ ɛtɛ ne eshe atwa tu'ulwatagwụ ta ata kpaaŋ.

²⁸Go Moses hwuceci ga otogwo ata Aron, bee hwuŋtengeni aŋ yɛu ibwɛ gɛ Ɛleaza. Nazhɛ ga Aron 'wi ga ni ihiŋhiŋ ishɛmɛ ɛtɛ, nazhɛ ata Moses nɛ Ɛleaza zwe ee gwure.

²⁹Aka na ta atwa tu'ulwatagwụ ta ata hwɛɛ mepi maa ga Aron 'wi, nazhɛ atwa Isrɛl hwɛɛ to-ụkwụla iwɛ tu'wo tu bwa ijitɛ talacɛ.