Read bassa TƐRƐCƐ 21 Bible Online

TƐRƐCƐ 21 - bassa bible

TƐRƐCƐ 21

¹Aka na te Bikenan ata shɛ agwuma Arad, na jɛjɛ tuta ti Kenan hwụjɛ maa atwa Isrɛl dure ba uhwaŋna Atarim, ee ci. Bee zhe baa sukakanɛ aŋ nu ujasa, baa 'imɛ umeseyi wa atwa aba oko bee hwuri.

²Ibɛ po atwa Isrɛl shileni AGWANGWAMA unu, ɛɛ hiɛŋ, Yaa shɛ ebi leni maa ta ala atwa ga gom, asha ti zhɛ te iricingo ashɛpwụ aba hwɛɛ.

³Ibɛ po AGWANGWAMA hwụjɛ tutabwa ta aba, bee mbiyeni aŋ maa e eri atwa Kenan. Ibɛ po ee iricinji aŋ hwɛɛ, ta ashɛpwụ aba. Ibɛ po du oo po apata izeci, ɛɛ hiɛŋ, Homa.[17]

⁴Nazhɛ atwa Isrɛl beni ni Ishɛmɛ ɛtɛ Ho, ee duri Itekwu Ishenje, aa palanganɛ tugwungwu ta atwa Idụm. Ama uhwaŋna ata lukwucinji atwa ata.

⁵Ibɛ po atwa ata kwuni AGWANGWAMA keeni Moses tugagwumana, ɛɛ hiɛŋ, Iwembe po ɛhi ti bɛcinjɛ ni Ijipti maa to 'wo nụ ụshɛka gaa? Ti iyimɛyɛ, te meni mu zasaba o, iyimɛyɛ gɛ kaa i tingɛrɛngɛrɛ i ti shinji ya!

⁶Ibɛ po AGWANGWAMA tumwanɛ ahwa mangayɛ, aa lụmanjɛ atwa ata. Atwa Isrɛl gembi ufwugwo te e 'wi na ahwa ata na lụmanjɛ aŋ.

⁷Nazhɛ atwa ata zhajɛ pu Moses, ɛɛ hiɛŋ bụ, Tɛ njɛ iwɛwɛ, iwɛnɛ atu sukakanɛ AGWANGWAMA hwɛɛ tu gabụ. Tabwa AGWANGWAMA maa go sugo ahwa ga no olugwo tu. Go Moses njɛ ga adua iwɛ atwa ata.

⁸Nazhɛ AGWANGWAMA hiɛŋ Moses, Nda uhwa na bundala, maa peleji bu no bumbolo, iwɛ maa bụtụ be elele na uhwa lụmɛ, yaa shɛ baa mbiyanɛ bụ, bi zhɛ ba zhɛmanana.

⁹Go Moses njɛ ga uhwa ata nu utumburɛ, bee peleji bu no bumbolo, bụtụ be elele na uhwa ga lụmɛ baa mbiyanɛ uhwa ata utumburɛ, bi zhɛ kaa ba zhɛmanana ga.

¹⁰Ibɛ po atwa Isrɛl to tuhwulo, ee jwe ugba wa aba no Obot.

¹¹Ee beni no Obot, ee jwe ugba wa aba ni Iye-abarim, nụ ụshɛka ata namɛ geri bu uwaŋna-banụ ne eririri Moab.

¹²Te e beni apata, ee jwe ugba wa aba nu Ulomu Zɛrɛd.

¹³Te e beni apata, ee jwe ugba wa aba hileniye Urefu Anon, na namɛ nụ ụshɛka ata zhe tutu tugwungwu ta A'amo. Iwɛnɛ po Urefu ata Anon namɛ na ashashɛ tugwungwu tu Moab na A'amo.

¹⁴Iwɛbɛ po yaa jɛmɛ nu Utakada wa ajasa AGWANGWAMA,[18] yɛɛ hiɛŋ, Ụshɛpwụ ata ɛɛ hiɛŋ Wahɛb namɛ na ashashɛ Sufa no olomu Urefu Anon,

¹⁵tuzwo to olomu ata kaa ti zhe tutu ụshɛpwụ ata ɛɛ hiɛŋ, Ari, na namɛ geri bo tugwungwu ta Amoab.

¹⁶Te e beni apata, oo to tuhwulo ee zhe no ofwo oko na ɛɛ hiɛŋ izeci ya aba, U'ibwa meni,[19] aba shɛ ofwo na AGWANGWAMA hiɛŋ Moses, Suje atwa ga maa sotulonu aŋ maa ma pana aŋ meni.

¹⁷Aka ata ibɛ atwa Isrɛl zụnjɛ azunga ga, ɛɛ hiɛŋ, Oo gabụ u'ibwa meni, bɛcinjɛ mụ! Zungangana uŋ ma azunga!

¹⁸Miaụŋ mɛ shɛgwuma muba mi hini u'ibwa ata, keeni ehwurembe atwa ata, No bukwuto ba tugwama keeni, Tidingbengere ta aba kaa ee hini uŋ. Te e beni nụ ụshɛka ata, oo to tuhwulo ee zhe Matana,

¹⁹ee beni nu Matana, ee zhe Nahaliɛl, ee beni nu Nahaliɛl, ee zhe Bamot,

²⁰ee beni nu Bamot, ee zhe nu ulomu na namɛ no tugwungwu ta Amoab, tuta ti ihiŋhiŋ Ishɛmɛ Pisga na ngbaracɛ geri bu ụshɛka.[20]

²¹E'isrɛl tumwanɛ atumwa no ofwo Sihon agwuma Amoab, bɛɛ hiɛŋ,

²²N leneni ka maa ma kashɛka cɛnjɛ tụ bụ. Tɛ zha shɛ ta vwula maa to tono itimɛ ye elele, kwo kaa itimɛ ya afwafwa o, tɛ zha shɛ ta swa meni ma a'ibwa bụ o. Ti zhɛ ta ta ukpekiti wa agwuma tutu ta bana no tugwungwu tụ bụ.

²³Ama ge Sihon leni shi maa E'isrɛl keshici no tugwungwu tu bwa o. Ama bu sotulonu ejeshi ubwa, bee beni bee zhe nụ Ụshɛka Jahaz, baa sukakanɛ E'isrɛl nu ujasa.

²⁴Ibɛ po E'isrɛl kwụnɛ bụ nu utokwobi. Ee leshiji cɛnjɛ ta aba te kwune nu Urefu Anon i ci tuzuba tu Jabok, tutu i ci cɛnjɛ ta A'amon. Iwɛnɛ po A'amon kepi tugwungwu ta aba ta 'yajɛ ikɛnyi tebiye.

²⁵E'isrɛl lesheji ashɛpwụ a'wụtụ Amoab medenji Hɛshbon, ta ashɛpwụ aba a na gwụmwatangwụ anaa na rungwutwonu aŋ, aa gɛgajɛ ya na aba.

²⁶Iwɛnɛ po Hɛshbon ata ubwa shɛ ụshɛpwụ wa agwuma Sihon na shɛ agwuma ata A'amo, na njɛ la ujasa na agwuma ụngwụshɛ Amoab, bee leshiji cɛnjɛ tu bwa kpaaŋ, tutu i ci Urefu Anon.

²⁷Iwɛbɛ po azụnjɛ a zunga, ɛɛ hiɛŋ, Zhaga ma ni Hɛshbon na shɛ ụshɛpwụ ụ'wụtụ wa agwuma Sihon, Ta jala maa ta kwụba te e meeneni uŋ, wee shikeni sasana.

²⁸Aka oko ejeshi agwuma Sihon beni nụ ụshɛpwụ ata ɛɛ hiɛŋ, Hɛshbon gana ulwa, ee hwuri gana bụratụ bu ulwa. Ee iricinji Ari na shɛ ụshɛpwụ wa Amoab; Te ehiu tikpekwu tu na tu namɛ na azuba Anon, e iricinji aŋ hwɛ hwɛɛ.

²⁹Ahiɛba Amoab, ihi wụmanɛ! E hi unzhi, ahiɛba na hia zhɛba Kimosh, na shɛ tuwa ta Amoab! Tuwa ti hiŋ tɛ njɛ maa ge etwenyi hi no gozhogo, Ibɛ po agwuma A'amo ge Sihon tuba 'imɛ miaụŋ mi hiŋ mo o maa a shɛ ajama.

³⁰Ama ti iricinji aŋ te kwune ni Hɛshbon tutu i ci Dibon, Te kwune nu Nashim tutu i ci Nofa, na gwumwonu ni Mɛdiba.

³¹Ibɛ po E'isrɛl jɛjɛ na cɛnjɛ ta A'amo.

³²Na aba ibɛ go Moses tumwanɛ maa a yalajɛ Jazɛ. Ibɛ atwa Isrɛl leshiji uŋ te ekpekpe na rungwutwonu uŋ. Ee unzhi A'amo na ga namɛ la apata.

³³Aa nyɛnjɛ ee duri uhwaŋna Bashan, go Og agwuma Bashan banɛ te ejeshi ubwa hwɛɛ, aa sukakanɛ aŋ nu ujasa no ofwo ata ɛɛ hiɛŋ izeci ya aba, Ɛdrɛi.

³⁴Nazhɛ AGWANGWAMA hiɛŋ Moses, Ta nda inyɛsɛ ibwɛ o, iwɛnɛ ti Ngɛɛ zhɛ mo lono maa eri bu hwɛɛ te ejeshi ubwa keeni cɛnjɛ tu bwa. Nda bụ gana ata abɛ njɛ la Sihon agwuma A'amo na jɛjɛ la ni Hɛshbon.

³⁵Gabata aa kwụnɛ bụ, ta miaụŋ mu bwa me eyi, ta atwa ubwa hwɛɛ, e weŋpeni shi okwo bụtụ bu ko gba o. Ama e leshiji cɛnjɛ tu bwa.