Read bassa TƐRƐCƐ 22 Bible Online

TƐRƐCƐ 22 - bassa bible

TƐRƐCƐ 22

¹Nazhɛ atwa Isrɛl beni apata, ee jwe ugba wa aba nu udadarɛ Moab hileniye Jodan, ne eririri Jɛriko.

²Aka na ga Balak yɛu Zipo kwụbɛ iyi elele nɛ atwa Isrɛl njɛ A'amo.

³Ibɛ po inyɛsɛ shɛ bụ, ta atwa ubwa hwɛɛ, iwɛnɛ ta atwa Isrɛl gembi ufwugwo tebiye, bee lwegeji ta atwa ubwa hwɛɛ.

⁴Ibɛ po Amoab hiɛŋ ehwurembe Amidia, Unyama wa atwa ga wa aŋsatanga iyi elele nɛ i tu rungwutwonu, hwuwayɛ go gana na ta buna be eyi ba aŋsatanga ambɛ na namɛ ni itimɛ. Ibɛ po ga Balak yɛu Zipo na shɛ agwuma Amoab na aka ata,

⁵tumwanɛ atumwa na zhe no ofwo Balam yɛu Bio na namɛ ni Pito, na gwumwonu nu Urefu Yufretis na cɛnjɛ ta atwa ubwa maa a suyanɛ bụ. Ga Balak hiɛŋ bụ, Kwụba, udenji uko banɛ ba na cɛnjɛ ti Ijipti hwɛ hwɛɛ, oo mburusonu na cɛnjɛ tu ga no ofwo elele, oo mo tu zwono inyɛsɛ maa e leshiji cɛnjɛ tu tu.

⁶Ma bụ tabwa maa zhajɛ keleni atwa ata unu, gana na te e tu hwuri ufwugwo, nekeshi ta ala aŋ tụlasụ maa to unzo aŋ maa e beni na cɛnjɛ tu ga. M mepi maa bụtụ be elele ebi peni-uwebiye, bi zhɛ ba kwụba ga uwebiye ata, bụtụ be elele kaa ebi keleni-unu, unu ata tukalana zhɛ wa ima bụ.

⁷Ibɛ po n-nyarɛ ma Amoab keeni n-nyarɛ ma Amidia mi leshiji ga iyi nɛ aa cɛpɛ aŋ iwɛ unu ata tukalana, ee hwuri no ofwo Balam, ee mbishi bu utumwa na ga Balak tumwanɛ aŋ.

⁸Ga Balam hiɛŋ aŋ, Woto ma epe nụ ụjita go, maa Mo hi mbiso beyi iyi elele nɛ AGWANGWAMA m mbishi. Ibɛ po ehwurembe ata Amoab namɛ ga na Balam jita ata.

⁹Nazhɛ Agwatana zhajɛ pu Balam, bɛɛ hiɛŋ bụ, Atwa cee na namɛ pụ bụụ?

¹⁰Ga Balam jishijɛ Agwatana, bɛɛ hiɛŋ, Ga Balak yɛu Zipo, agwuma Moab, ubwa tumwanɛ aŋ pi mi, bɛɛ hiɛŋ,

¹¹Atwa oko banɛ ba ni Ijipti, oo mburusonu na cɛnjɛ tu bwa hwɛɛ, asha ga ma zhajɛ maa Ma kalana aŋ unu iwɛ ubwa, nekeshi ubwa ba ala aŋ tusukakana nu ujasa maa ubwa unzhi aŋ maa e beni na cɛnjɛ tu bwa.

¹²Nazhɛ Agwatana hiɛŋ Balam, Ta zhagaga na atwa ga o. Ta kalana kaa du atwa ata unu kwukwuŋ o, iwɛnɛ to o pwonuo aŋ uwebiye.

¹³Ibɛ po ga Balam ishijɛ ga ti iyi heri nu uvwungwa dididi, bee mbishi ehiu Balak, bɛɛ hiɛŋ aŋ, Zhaga jiyo ma na cɛnjɛ ti hiŋ, AGWANGWAMA lacɛ maa ma zhagaga ne hiŋ.

¹⁴Nazhɛ ehiu ata Moab ishijɛ aa sanɛ ugwulwo no ofwo Balak, ɛɛ hiɛŋ bụ, ga Balam lacɛ maa zhagajɛ no tu.

¹⁵Nazhɛ ga Balak tumwananɛ ehiu anya a na gembi ufwugwo, a na kaa 'yajɛ ụjɛrụma uhwuri ene ebe ehiiŋ.

¹⁶Ee zhe no ofwo Balam, ɛɛ hiɛŋ bụ, Ga Balak yɛu Zipo, hiɛŋ, Kede iyi elele ibu ngwuricinje tizhajɛ no ofwo mi o.

¹⁷Sukwu, zhajɛ maa keleni atwa ata unu iwe mi. N zhɛ ma bụ pana uduciya ụ'wụtụ, N zhɛ kaa ma bụ ndana iyi elele nɛ ɛbi n hiɛŋ.

¹⁸Ama ga Balam jishijɛ aŋ, bɛɛ hiɛŋ, Okwo ga Balak m peni azụrụfa keeni azhɛnarɛya na shini umwono ubwa, N zha shɛ ma kashɛka unu na AGWANGWAMA na shɛ Agwatana mi m peni maa ma nda iyi nɛ 'nyanɛ kwo kaa iyi nɛ gembi o.

¹⁹Sukwu, ma hiɛ tabwa maa hi woto epe nụ ụrụmɛ go, maa ma kaana iyi nɛ AGWANGWAMA zhɛ me m mbishe tumapa.

²⁰Nazhɛ Agwatana zhajɛ pu Balam nụ ụjita ata, bɛɛ hiɛŋ bụ, Yaa shɛ atwa ata zhajɛ maa a bụ suyanɛ, asha ishijɛ maa zhagaga na aba. Ama ga shɛ iyi nɛ Ngee bi mbishi kiri ɛbi zhɛ ba nda.

²¹Ti iyi heri, ga Balam ishijɛ ga nu uvwungwa, bee peteni izhinyɛci ibwɛ ufuridi na aba, baa zhagajɛ ne ehiu ata Moab aa sanɛ.

²²Ama isɛbwɛ ya Agwatana ishijɛ iwɛnɛ ti ga Balam zhɛ. Ibɛ po butumwa ba AGWANGWAMA ba azuba shikeni nu uhwaŋna maa sukakana bụ. Ga Balam ta kaa ba suka izhinyɛci ibwɛ, miaụŋ mu bwa mu ugondu mi yebi mu ta kaa mu hwuri umbe nu bwa.

²³Nazhɛ izhinyɛci ɛtɛ kwụbɛ butumwa ata ba AGWANGWAMA ba azuba ti bee hwucice utokwobi ubwa baa 'waŋnɛ uŋ nu u'ala, bee shikeni nu uhwaŋna. Ibɛ po izhinyɛci vwụrɛ yee genji uhwaŋna, yee teni itimɛ. Ga Balam po izhinyɛci ɛtɛ iyi, iwɛ maa izhinyɛci gwure nu uhwaŋna.

²⁴Nazhɛ butumwa ata ba AGWANGWAMA zhe bee shikeni no ofwo oko na ụlamụ namɛ derere, na ashashɛ ntuma ma afwafwa mi yebi, ụdatụ kaa namɛ nụ ụzalụ hweehwe.

²⁵Aka na ti izhinyɛci ɛtɛ kwụbɛ butumwa ata ba AGWANGWAMA ba azuba, yee meme deci nụ ụdatụ ata, yaa pɛpɛtanɛ uvwɛvwɛjɛ Balam nụ ụdatụ ata. Ga Balam peeneni izhinyɛci ɛtɛ iyi.

²⁶Nazhɛ butumwa ata ba AGWANGWAMA ba azuba to tuhwulo, bee zhe bee shikeni geri-be-eshe no ofwo na namɛ mweeŋ anaa na kaa zasa geri na bụtụ eri ba vwula ya okwo nu u'ala ubiye kwo kaa nu u'ala ugwulwo.

²⁷Aka na ti izhinyɛci ɛtɛ kwụbɛ butumwa ata ba AGWANGWAMA ba azuba, yee leyi yee weci nu ukaka Balam. Ibɛ po isɛbwɛ Balam ishijɛ, boo po izhinyɛci ɛtɛ bukwuto bu bwa.

²⁸Nazhɛ AGWANGWAMA kepishinji unu izhinyɛci ɛtɛ na aka ata, yɛɛ hiɛŋ Balam, Imbe kwuŋ Ngaa bɛ njɛ upo obu mo duboo? Ụtatụ na ya.

²⁹Ga Balam jishijɛ izhinyɛci, bɛɛ hiɛŋ, Iwɛnɛ abụ ma n nda ụpụrụsa. Yaa ga shɛ utokwobi Ngaa 'waŋnɛ asha m bu kwụnua.

³⁰Nazhɛ izhinyɛci hiɛŋ Balam, Shɛ Gamba maa n shɛ izhinyɛci nɛ aba suka cala cala, te kwuni taa na aka na ee bi meci tutu taa hwayɛ? M bu nduwa la gana ga kwukwuŋ hŋ? Ga Balam jishijɛ, bɛɛ hiɛŋ, Awo.

³¹Nazhɛ AGWANGWAMA kepishinji eshe Balam, baa kwụbɛ ta butumwa ba AGWANGWAMA ba azuba hwucice utokwobi, baa 'waŋnɛ uŋ nu u'ala ubwa, bee shikeni nu uhwaŋna. Nazhɛ ga Balam to bizhiri, bee ubi ụpɛshɛka ubwa na cɛnjɛ.

³²Nazhɛ butumwa ata ba AGWANGWAMA hiɛŋ Balam, Iwembe po obo dubo izhinyɛci gɛ bụ gana ga kpalụ tatụụ? Hioko, M banɛ maa ma bụ sukakana, iwɛnɛ ta abụ ga shɛ shɛ ba zha tahaŋnụ tu ga.

³³Ama ti izhinyɛci bụ n kwụbɛ, yaa vwụrɛ kpalụ tatụ. Yaa shɛ yaa ga ma n vwụrɛ shɛ yebe, aga sha m bu kwụnua cebe maa ma ganga iŋ maa i nama.

³⁴Nazhɛ ga Balam hiɛŋ butumwa ata ba AGWANGWAMA, N njɛ iwɛwɛ, N ge mepi shi maa gabụ bi shikeni nu uhwaŋna, maa n sukakanɛ o. Iwɛ ecilo ata, yaa shɛ yee teni shi cɛŋ ne eshe bu maa ma ta tuhwulo, asha N zhɛ mo gwulo.

³⁵Ama butumwa ata hiɛŋ Balam, Zhagaga na atwa ga, ama ga shɛ n-ndumwa mu na Ngee bi mbishi kiri ɛbi zhɛ ba duma. Ga Balam zhagajɛ ga ne ehiu ata baa sanɛ no ofwo Balak.

³⁶Aka na tu ga Balak hwụjɛ maa ga Balam be ci ba, bee teji bu uhwaŋna, tutu ofwo na ɛɛ hiɛŋ, Ari, na shɛ ụshɛpwụ ụ'wụtụ wa Amoab, na namɛ nu ukwunanga tugwungwu ta aba.

³⁷Ga Balak hiɛŋ Balam, Shɛ Gamba suu N tumwanɛ atumwa maa a bụ suyanɛ? Iwembe kwuŋ po ebi zhe shi pi mi na aka ihiiŋ na Ngaa tumwanɛ atumwaa ataa? N eri shi suu ma bụ pana titeni tụ bụ?

³⁸Ga Balam hiɛŋ Balak, N tuwo ya pụ bụ! N 'yajɛ suu ukpahiŋ we elele maa Ma duma iwɛ ye elele? N-ndumwa me elele na Agwatana m mbishi, muba kiri Ngɛɛ zhɛ ma duma.

³⁹Nazhɛ ga Balam zhagajɛ na Balak, ee zhe nụ ụshɛpwụ uko na ɛɛ hiɛŋ, Kiriat-huzot.

⁴⁰Apata ga Balak to ụrụpɛ ni inɛ keeni agwụdụ, bee teri usunda ata bee peni Balam keeni ehiu na zhajɛ nu bwa.

⁴¹Ti iyi heri, ga Balak shepi Balam, ee munji ofwo oko na ɛɛ hiɛŋ Bamot-beal. Apata ga Balam eri ba kwụba umeseyi wa atwa ata Isrɛl.