Read bassa TƐRƐCƐ 23 Bible Online

TƐRƐCƐ 23 - bassa bible

TƐRƐCƐ 23

¹Ga Balam hiɛŋ Balak, M meni Otukwu-ụrụpɛ ecenje epe, n sugeni du inɛ ye eyi icenje keeni adagba ecenje epe.

²Ga Balak njɛ ga gana na ti ga Balam hiɛŋ bụ. Ga Balak na Balam to ụrụpɛ no otukwu ata ụrụpɛ, una una 'yajɛ buna bu bwa be eyi bu ko keeni udagba uko.

³Ga Balam hiɛŋ Balak, Shikono epe maa dongonu utukwu bụ ụrụpɛ tuhwoŋzhingo, maa ma zha beye okwo nekeshi AGWANGWAMA mɛ n tɛjɛ uhwaŋna. Iyi elele nɛ kaa bee n kepishingeni hwayɛ, N zhɛ mo bu mbiso iŋ. Bee munji ne bikpekwu bu ko bwooko.

⁴AGWANGWAMA tɛjɛ ga Balam uhwaŋna, ga Balam hiɛŋ bụ, M mowoŋ otukwu-ụrụpɛ ecenje, Ngoo towo du ụrụpɛ nu una una na buna be eyi bu ko keeni udagba uko.

⁵AGWANGWAMA mbishi Balam n-ndumwa mu na baa shɛ ba duma, bɛɛ hiɛŋ bụ, Zhaga gwulo no ofwo Balak maa mbishi bu utumwa ga.

⁶Bee gwuri ga pu bwa, baa kwụbɛ ti bee te shikeni to dongonu ụrụpɛ ubwa u tuhwoŋzhingo medenji ehiu Amoab kpaaŋ.

⁷Ga Balam kwuni ushi ubwa tisho, bɛɛ hiɛŋ, Ga Balak agwuma Moab m bɛcinjɛ na Aram, maa ma banɛ nu nshama mi geri bu uwaŋna-banụ; bɛɛ hiɛŋ, Zhajɛ maa n kelengeni atwa Jekob unu, zhajɛ maa kepengeni Isrɛl.

⁸Gana naa Ngee eri ma kalana atwa na Agwatana te keleni shi unu unuu? Okwo gana naa Ngee eri ma kapangana atwa na AGWANGWAMA te kepengeni shii?

⁹M patanɛ ni ihiŋhiŋ ya aparatayɛ Ngaa kwụbɛ aŋ. Ngaa ngbaracɛ aŋ tu Ngaa patanɛ ne bikpekwu; Ngaa kwụbɛ maa a shɛ atwa na mama gɛgajɛ, anaa na aa rɛcɛ shɛ kaa na anya edenji!

¹⁰Ajalalo Isrɛl a shɛ gana upwupwutu, gaaba eri ba rɛta aaŋ? Go mo 'wo tu'wo ta bụtụ bi tiririri, Ga ukwunanga mu kaa ụ shɛ gana una aba.

¹¹Ga Balak hiɛŋ Balam, Imbe nɛ kwuŋ abɛ n njɛɛ? Ngaa bụ shapɛ maa keleni atwa i'ime mi unu, ama bɛ njɛ shɛ ya iyi elele o, semi uwebiye kiri aba pana aŋ nom.

¹²Ga Balam jishijɛ bụ, bɛɛ hiɛŋ, I shɛ shɛ tilɛɛ suu maa ga shɛ iyi nɛ AGWANGWAMA m mbishi kiri Ngaa shɛ ma duma?

¹³Ga Balak hiɛŋ Balam, Hwure tɛ zhagaga ti zhe no ofwo anya anaa na ɛbi zhɛ ba kwụba umeseyi wa aba kiri shɛ hwɛɛ aba o, maa n keleni aŋ unu apata.

¹⁴Bee zeriji bu ga, ee zhe ni itimɛ ike nɛ ɛɛ hiɛŋ, Zofim ni ihiŋhiŋ ishɛmɛ nɛ ɛɛ hiɛŋ, Pisga. Boo mo otukwu-ụrụpɛ ecenje apata. Boo to ụrụpɛ na buna be eyi keeni udagba nu utukwu-ụrụpɛ ata una una.

¹⁵Ga Balam hiɛŋ Balak, Shikono epe maa dongonu utukwu bụ ụrụpɛ u tuhwoŋzhingo. N zhɛ tuba ma twa na AGWANGWAMA peye.

¹⁶Nazhɛ AGWANGWAMA tɛjɛ ga Balam uhwaŋna, bee mbishi bu n-ndumwa mu na baa shɛ ba duma. Bɛ hiɛŋ bụ, Zhaga gwulo no ofwo Balak maa mbishi bu utumwa ga.

¹⁷Ga Balam gwuri ga pu bwa, bee te jiteni Balak ti bee te shikeni to dongonu ụrụpɛ ubwa u tuhwoŋzhingo medenji ehiu Amoab hwɛɛ. Ga Balak hiɛŋ bụ, Imbe AGWANGWAMA jimɛɛ?

¹⁸Ga Balam kwuni eshi ubwa tisho, bɛɛ hiɛŋ, A Balak yɛu Zipo, zhajɛ maa shɛlaga iwɛ nɛ Ngɛɛ zhɛ ma duma.

¹⁹Agwatana shɛ shɛ gana bụtụ na ba dwa-ụzagwụ o; Bɛ shɛ shɛ kaa gana yɛu bụtụ nɛ yo sheyingo ahaŋsa ubwa o. Iyi elele nɛ baa jɛmɛ, bi zha shɛ ba nda iŋ suu? Bi zha shɛ ba ụrɛcɛnga suu unu we elele na bee shiri? Baa jɛmɛ kaa iwɛ, bi zha shɛ ba nda iŋ suu?

²⁰E m peni-unu maa ma pana aŋ uwebiye, taa ta Agwatana pwonuo aŋ uwebiye, N eri shi mɛ lɛshijɛ iŋ ya o.

²¹A zha shɛ a kwụbɛtana Jekob iyi tusashɛ o, a zha shɛ kaa a kwụbɛtana Isrɛl ụbaụta o. AGWANGWAMA na shɛ Agwatana aba kaa namɛ na aba. Ibɛ po aa ugaga maa agwuma namɛ na ashashɛ aba.

²²Agwatana, ubwa bɛcinjɛ aŋ ni Ijipti; Ubwa kaa twagwụ aŋ ifelu gana binemi.

²³Ge Jekob zasa ilɛyi tishino, kwo kaa tukwupenyi tu na maa atwa na dumanga Isrɛl iwɛ ibɛ o. Atwa zhɛ na duma ya iwɛ Jekob hwuwayɛ, ɛ hiɛŋ, Kwụba ma iyi nɛ Agwatana njɛ!

²⁴Atwa ata ɛ ishijɛ gana bizeci bo o; Bi zha shɛ ba ta ụhinjanụ o, semi aka na tu baa 'imɛ iyi bee dwetweji iŋ; Semi aka na ti bee swe mehieŋ mi iyi nɛ baa kwụnɛ.

²⁵Ga Balak hiɛŋ Balam, Ta kalana aŋ ya unu kwukwuŋ; Ta pana aŋ ya kaa du uwebiye kwukwuŋ?

²⁶Ama ga Balam jishijɛ Balak, bɛɛ hiɛŋ, N ge bi mbishi shi hŋ, maa iyi elele nɛ AGWANGWAMA m mbishi, inɛ ɛtɛ kiri Ngɛɛ zhɛ ma duma?

²⁷Ga Balak hiɛŋ Balam, Hwure tɛ zhagaga ti zhe no ofwo anya, nekeshi Agwatana zhɛ o lono ya maa n kelengeni aŋ unu apata.

²⁸Ga Balak zeriji ga Balam ni ihiŋhiŋ Ishɛmɛ ɛtɛ ɛɛ hiɛŋ, Peo, inɛɛ nɛ ngbaracɛ geri bụ ụshɛka.

²⁹Ga Balam hiɛŋ bụ, M meni otukwu-ụrụpɛ ecenje epe, maa m panɛ du inɛ ye eyi icenje keeni adagba ecenje epe.

³⁰Ga Balak njɛ ga gana na ti ga Balam hiɛŋ bụ, boo to ụrụpɛ na buna be eyi keeni udagba nu utukwu-ụrụpɛ ata una una.