Read bassa TƐRƐCƐ 24 Bible Online

TƐRƐCƐ 24 - bassa bible

TƐRƐCƐ 24

¹Gana na tu ga Balam kwụbɛ maa i kwụlanɛ AGWANGWAMA maa bu na pana atwa Isrɛl uwebiye, bi zhe shi ya maa bu na dwalakaka iwɛ uwebiye-tupana gana na tu baa ga nda cebe o. Ama bi shepi ya eshe ubwa baa ngbaracɛ geri bu ụshɛka ata.

²Aka na tu baa mbiyanɛ baa kwụbɛ ugba na atwa Isrɛl namɛ na alamụ alamụ aba. Ibɛ po Mpiala ma Agwatana mi 'yagajɛ bụ,

³bee kwuni eshi ubwa tisho, bɛɛ hiɛŋ, Utumwa na ga Balam yɛu Bio ya duma, n-ndumwa mu na bụtụ na eri ba kwụba iyi elele ba duma.

⁴Eshi na bụtụ na ba hwuga n-ndumwa mu na Agwatana a duma bo sho, Ubwa ba kwụba ozobu Agwatana na Hwuri Kpaaŋ, Ubwa na bo woto na cɛnjɛ mɛkɛɛ asha kaa eshe ubwa uteji shi o.

⁵Oo gabụ ge Jekob, kwụba gana na te shidulo shɛ bụ shɛ pilanụ. Keeni ofwo bu tunama.

⁶Gana olomu na njɛsanjɛ taa dụlụ; Gana ehilo na dongonu ụpalanụ Urefu, Gana i'wɛ'wɛ ya alos nɛ AGWANGWAMA bɛrɛ, Gana i'wɛ'wɛ yo osobu nɛ shikekeni ni ipɛlu meni.

⁷Meni mi zhɛ mu na banɛ nu nhilwo mu bwa mu na fwunga. Ɛ zhɛ na bila izɛgwu ya aba ne ehilo na oo zwogono meni. Agwuma aba zhɛ o gombo bo hwulo Agag. Ɛ zhɛ na kaana cɛnjɛ-ta-tugwama ta ba ugombo.

⁸Agwatana ubwa bɛcinjɛ aŋ na cɛnjɛ ti Ijipti; Baa twagwụ aŋ ifelu gana binemi. Ɛ zhɛ na lụmanga anya edenji a na shɛ atwa aba i'ime. Ɛ zhɛ na bwarataga o'umpwo aba rukwu rukwu. Ɛ zhɛ kaa na ibataga aŋ na a'inla aba.

⁹Bu ubeni, bee weci gana bizeci; gana bizeci bo o, gaaba zhɛ ba kara maa zhingicinjɛ bụụ? Bụtụ be elele na ubu peni-uwebiye, ɛ zhɛ a pana du bụtụ ata uwebiye. Bụtụ be elele na kaa ubu keleni-unu, ɛ zhɛ a kalana du bụtụ ata unu.

¹⁰Ga Balak njɛ isɛbwɛ na Balam, bee jibi i'ɛlɛ ibwɛ hweehwe, bɛɛ hiɛŋ Balam, M bu suyanɛ maa keleni atwa i'ime mi unu, kwụba gana na ebi peni aŋ uwebiye kpalụ tatụ.

¹¹Zhaga hwulo ya ujiyo! N ngɛ hiɛŋ N zhɛ ma bụ pana titeni tụ bụ, ama AGWANGWAMA ubu kepeni uhwaŋna maa kede ma bụ pana ya titeni ta ata o.

¹²Ga Balam jishijɛ bụ, bɛɛ hiɛŋ, M mbishi shi la suu atumwa ata abụ tumwanɛ pi mi maa,

¹³Okwo ga Balak m peni azụrụfa keeni azhɛnarɛya na shini umwono ubwa, N zha shɛ ma hanika unu na AGWANGWAMA na shɛ Agwatana mi m peni maa ma nda iyi ibiye kwo kaa inɛ iwɛ ye elele nɛ shɛ ukwulana mu o? Iyi elele nɛ AGWANGWAMA m mbishi, inɛ ɛtɛ kiri Ngɛɛ zhɛ ma duma.

¹⁴Ga Balam hiɛŋ Balak, N zhɛ ya ujiyo no ofwo atwa mi, ama zhajɛ maa mo bu mbiso iyi nɛ atwa ga Isrɛl zhɛ a nda atwa bụ geri-be-eshe.

¹⁵Bee kwuni eshi ubwa tisho, bɛɛ hiɛŋ. Utumwa na ga Balam yɛu Bio ba duma. N-ndumwa mu na bụtụ ata eri ba kwụba iyi elele ba duma.

¹⁶Eshi bụtụ na ba hwuga n-ndumwa mu na Agwatana a duma, Ubwa na ba kwụba ozobu Agwatana na Hwuri Kpaaŋ, Ubwa na bo woto na cɛnjɛ mɛkɛɛ asha eshe ubwa kaa uteji shi o.

¹⁷N kwụbɛ bụ, ama shɛ hwuwayɛ o, Ngaa ngbaracɛ bụ, ama bu gwumwonu su o. Ikpɛsu zhɛ ya banɛ no olugwo Jekob, bidingbengbere ba tugwama zhɛ bɛ ishijɛ no olugwo Isrɛl. Bi zhɛ ba bwarataga itune Moab, bɛɛ zhɛ kaa ba bwarataga okokolo uhiuhiu miaụŋ-me-eyi mi Shɛt hwɛɛ.

¹⁸Ɛ zhɛ a lasụ Idụm, ɛ zhɛ a lasụ atwa i'ime Sɛi du. Atwa Isrɛl tuba zhɛ na kaana gu ukpahiŋ ti'yaga.

¹⁹Bụtụ na zhɛ ba untangana ofwo zhɛ ba banɛ no olugwo Jekob, Ubwa zhɛ ba hwaŋzhɛnga atwa na ga ta vwɛ na ashɛpwụ ata a'wụtụ ti'iricingo hwɛɛ.

²⁰Nazhɛ baa mbiyanɛ atwa Amalɛk, bee kwuni ushi ubwa tisho, bɛɛ hiɛŋ, Udenji Amalɛk, aba kwuni ukpahiŋ ụ'wụtụ ti'yaga hiiŋ na atwa vwɛ, Ama ukwunanga wa aba kaa zhɛ wa sha ti'ilono umɛwɛɛ.

²¹Ba mbiyanɛ udenji Ken, bee kwuni ushi ubwa tisho, bɛɛ hiɛŋ, Ofwo bɛjɛjɛ bụ zhɛ a nama lapiya, Tuhwurugwo tụ bụ kaa tu patanɛ nu uparatayɛ.

²²Okwo ti yaa shɛ bwonu, ahiɛba Eken, ɛ zhɛ kaa me hi iricingo hwɛɛ, na aka na Ashu[21] a hiɛ 'imɛ maa hiɛ shɛ ajama na ujasa yɛ.

²³Ga Balam kwuni eshi ubwa tisho, bɛɛ hiɛŋ, Adooyi! Gaaba tɛ zhɛ ba nama hwuŋ na aka na ta Agwatana zhɛ a nda ijɛɛ?

²⁴Ama ihɛŋtu zhɛ ya banɛ ni Kitim nɛ zhɛ ya nda Ashu keeni Ebɛ ụbaụta. Ɛ zhɛ du kaa a nda aŋ ufwu tụlụkpashɛ.

²⁵Nazhɛ ga Balam ishijɛ baa sanɛ ujiyo ni ihwɛ ibwɛ. Ga Balak sanɛ du geri bwa.